ຄະນະບໍລິຫານງານສະຫະພັນແມ່ຍິງ ກະຊວງສາທາລະນະສຸກ ຮ່ວມກັບ ສູນຕ້ານເອດ ແລະ ພະຍາດຕິດຕໍ່ທາງເພດສຳພັນ ( ພຕພ ) ໄດ້ຈັດກິດຈະກຳໂຄສະນາວຽກງານສະກັດກັ້ນ-ຕ້ານເຊື້ອເຮສໄອວີພະຍາດເອດ ແລະ ພຕພ ເພື່ອໃຫ້ບັນດາທ່ານທີ່ຕາງໜ້າຈາກອົງການຈັດຕັ້ງມະຫາຊົນອ້ອມຂ້າງກະຊວງໄດ້ມີການແລກປ່ຽນຮຽນຮູ້ທາງດ້ານວິຊາການ, ຂໍ້ມູນຂ່າວສານຕ່າງໆທີ່ກ່ຽວຂ້ອງກັບບັນຫາພະຍາດເອດທີ່ມີຜົນກະທົບຕໍ່ກັບແມ່ຍິງ.
ກິດຈະກຳດັ່ງກ່າວ, ມີຂຶ້ນໃນວັນທີ 15 ກຸມພາ 2019 ໂດຍມີ ທ່ານ ດຣ ນາງ ຜາສຸກ ວົງວິຈິດ ຮອງປະທານຄະນະບໍລິຫານງານສະຫະພັນແມ່ຍິງ ຮອງຫົວໜ້າກົມແຜນການ ແລະ ການຮ່ວມມືສາກົນ ກະຊວງສາທາລະນະສຸກ, ພ້ອມດ້ວຍພະນັກງານທີ່ກ່ຽວຂ້ອງ ແລະ ບັນດາທ່ານທີ່ຕາງໜ້າອົງການຈັດຕັ້ງມະຫາຊົນອ້ອມຂ້າງກະຊວງ ເຂົ້າຮ່ວມ.
ທ່ານ ດຣ ພູທອນ ສຸດທະລັກ ຫົວໜ້າສູນຕ້ານເອດ ແລະ ພຕພ ໃຫ້ຮູ້ເຖິງສະພາບການສະກັດກັ້ນ ແລະ ຕ້ານເຊື້ອເຮສໄອວີ ພະຍາດເອດ ແລະ ພະຍາດຕິດຕໍ່ທາງເພດສຳພັນ ໃນ ສປປ ລາວ ວ່າ:
ໄດ້ສ້າງສະພາບແວດລ້ອມທີ່ເອື້ອອຳນວຍໃນການຕອບໂຕ້ ຕໍ່ເຊື້ອເຮສໄອວີ ແລະ ພະຍາດເອດ ທີ່ມີປະສິດທິຜົນ ໂດຍໄດ້ທົບທວນຄືນກົດໝາຍ ແລະ ນະໂຍບາຍທີ່ຍັງເປັນອຸປະສັກ ໃນການຈັດຕັ້ງປະຕິບັດຄື: ໄດ້ປັບປຸງປື້ມຄູ່ມືໃນການຈັດຕັ້ງປະຕິບັດວຽກງານ; ເຮັດການສຳຫຼວດກຸ່ມ ສາວບໍລິການ; ອົບຮົມວຽກງານຕ້ານການຈຳແນກ ແລະ ລັງກຽດ ໃຫ້ 4 ໂຮງໝໍແຂວງ. ເລີ່ມແຕ່ປີ 1980-2017 ມີຜູ້ຕິດເຊື້ອເຮສໄອວີຈຳນວນ 77,3 ລ້ານຄົນ ໃນທົ່ວໂລກ; ເສຍຊີວິດຍ້ອນເປັນພະຍາດເອດ ຈຳນວນ 35,4 ລ້ານຄົນ;
ສຳລັບຕົວເລກສະສົມແຕ່ ປີ 1990 ຮອດເດືອນ ກັນຍາ 2018 ຈຳນວນແຂວງທີ່ລາຍງານ 18 ແຂວງ, ຈຳນວນຕົວຢ່າງເລືອດທີ່ໄດ້ກວດ 864.116 ຕົວຢ່າງ, ພົບຈຳນວນທີ່ຕິດເຊື້ອເຮສໄອວີ 11.980 ຄົນ ຈຳນວນຜູ້ຕິດເຊື້ອຍັງມີຊີວິດ 9.900 ຄົນ, ຈຳນວນທີ່ເປັນພະຍາດເອດ 5.392 ຄົນ, ຈຳນວນທີ່ຕາຍຍ້ອນພະຍາດເອດ 2.080 ຄົນ. ກິດຈະກຳຄັ້ງນີ້ຍັງໄດ້ເຜີຍແຜ່ຄວາມຮູ້ພື້ນຖານ ແລະ ຖາມ-ຕອບກ່ຽວກັບເຊື້ອເຮສໄອວີ ພະຍາດເອດ, ແຈກລິບບິ້ນແດງ ທີ່ແມ່ນສັນຍາລັກຕ້ານພະຍາດເອດ ແລະ ການຢູ່ຮ່ວມກັນແບບສັນຕິໂດຍບໍ່ມີການຈຳແນກ-ລັງກຽດ; ແຈກຖົງຢາງອະນາໄມໃຫ້ຜູ້ທີ່ມາຮ່ວມກິດກະກໍາ.
