ເມື່ອບໍ່ດົນມານີ້, ທີ່ແຂວງໄຊຍະບູລີ ສປປ ລາວ ໄດ້ຈັດກອງປະຊຸມປຶກສາຫາລືກ່ຽວກັບການຄ້າຊາຍແດນ ແລະ ການທ່ອງທ່ຽວ ລະຫວ່າງແຂວງໄຊຍະບູລີ ນໍາໂດຍທ່ານ ຍັນຍົງ ສີປະເສີດ ຮອງເຈົ້າແຂວງ ພ້ອມດ້ວຍພະແນກການທີ່ກ່ຽວຂ້ອງ ແລະ ແຂວງພິດສະນຸໂລກ ຣາຊະອານາຈັກໄທ ນໍາໂດຍ ທ່ານ ບຸນຊັບ ພານິດສະການ ອຳນວຍການມະຫາວິທະຍາໄລນະເລສວນ ພ້ອມດ້ວຍຄະນະ.
ທ່ານ ຍັນຍົງ ສີປະເສີດ ໄດ້ລາຍງານສະພາບຈຸດພິເສດຂອງແຂວງ ແລະ ການພົວພັນຮ່ວມມືລະຫວ່າງສອງປະເທດທີ່ມີຊາຍແດນຕິດຈອດກັບແຂວງໄຊຍະບູລີ ເຊິ່ງໄລຍະຜ່ານມາ ແມ່ນໄດ້ມີການປະຊຸມ ຮ່ວມມືກັບບັນດາແຂວງຂອງໄທ ກ່ຽວກັບການຮັກສາຄວາມສະຫງົບຕາມບໍລິເວນຊາຍແດນ, ການເຂົ້າ-ອອກຜ່ານດ່ານຕ່າງໆ, ການຄ້າ, ການທ່ອງທ່ຽວ ແລະອື່ນໆ ເຮັດໃຫ້ຊາຍແດນມີຄວາມສະຫງົບ-ປອດໄພ ຮອບດ້ານ, ສ້າງເງື່ອນໄຂໃຫ້ການຄ້າ-ການທ່ອງທ່ຽວ ແລະ ການໄປ-ມາຂອງປະຊາຊົນທັງສອງຊາດມີຄວາມສະດວກຂຶ້ນເທື່ອລະກ້າວ.
ໂອກາດດັ່ງກ່າວ, ທ່ານ ບຸນຊັບ ພານິດສະການ ໄດ້ກ່າວຈຸດປະສົງເພື່ອສຶກສາຄວາມເປັນໄປໄດ້ຂອງການເຊື່ອມໂຍງລະຫວ່າງໄທ, ລາວ ແລະ ຈີນ ໂດຍຜ່ານເສັ້ນທາງຫຼວງຂອງແຂວງໄຊຍະບູລີ ເພື່ອໄປສູ່ເສັ້ນທາງລົດໄຟລາວ-ຈີນ, ເຊິ່ງມີສະຖານີຢູ່ແຂວງຫຼວງພະບາງ, ສຶກສາໂຄງການວິໄຈໄລຍະສອງກ່ຽວກັບ ການເຊື່ອມໂຍງການໄປ-ມາ, ການແລກປ່ຽນສິນຄ້າຂອງປະຊາຊົນ ໂດຍຜ່ານດ່ານແຫ່ງຕ່າງໆ, ສຶກສາເບິ່ງລະບົບເສັ້ນທາງເພື່ອຈະນໍາສົ່ງສິນຄ້າ ໂດຍສະເພາະແມ່ນ ອາຫານທະເລທີ່ຈະສົ່ງໄປຈໍາໜ່າຍຢູ່ບັນດາແຂວງພາກເໜືອຂອງລາວ ແລະ ບັນດາແຂວງຂອງ ສປ ຈີນ ທີ່ບໍ່ຕິດກັບທະເລ ໂດຍອາໄສລົດໄຟລາວ-ຈີນ.
ຈາກນັ້ນ, ທັງສອງຝ່າຍໄດ້ປຶກສາຫາລືກັນກ່ຽວກັບການຄ້າ, ການທ່ອງທ່ຽວທາງທໍາມະຊາດ ແລະ ວັດທະນະທໍາ ເພື່ອປຶກສາຫາລືກ່ຽວກັບການປັບປຸງບັນດາດ່ານຂອງທັງສອງຝ່າຍທີ່ຍັງບໍ່ໄດ້ມາດຖານ ເພື່ອອໍານວຍຄວາມສະດວກໃນການເຂົ້າ- ອອກ, ການຂົນສົ່ງສິນຄ້າ ແລະ ການບໍລິການດ້ານຕ່າງໆ ຢູ່ຈຸດຜ່ານແດນແຕ່ລະແຫ່ງ.