ຫ້ອງວ່າການ ກະຊວງ ປກສ ໄດ້ຈັດກອງປະຊຸມເຜີຍແຜ່ຄໍາແນະນໍາກ່ຽວກັບ ຮູບແບບ ແລະ ການຮ່າງເອກະສານທາງການ ຊຸດທີ II ຂຶ້ນໃນວັນທີ 5 ຕຸລາ 2018 ເພື່ອໃຫ້ບັນດາຫົວໜ້າ-ຮອງກົມ, ຫົວໜ້າ-ຮອງພະແນກ ແລະ ພະນັກງານຫຼັກແຫຼ່ງທົ່ວຫ້ອງວ່າການ ມີຄວາມເປັນເອກະພາບຕໍ່ການຈັດຕັ້ງປະຕິບັດວຽກງານການຮ່າງເອກະສານທາງການຕົວຈິງ.
ເປັນປະທານເຜີຍແຜ່ໂດຍ ພັອ ກຽງຄໍາ ອິນແພງທະວົງ ຮອງຫົວໜ້າຫ້ອງວ່າການ ກະຊວງ ປກສ ໂດຍທ່ານໄດ້ໃຫ້ຮູ້ກ່ຽວກັບ
ດຳລັດ ວ່າດ້ວຍ ເອກະສານທາງການ ສະບັບເລກທີ 239/ລບ ລົງວັນທີ 13 ສິງຫາ 2015 ປະກອບ ມີ 7 ໝວດ 35 ມາດຕາ ເຊິ່ງໃນມາດຕາ 8 ການຄຸ້ມຄອງເອກະສານເຂົ້າ-ອອກ ໄດ້ລະບຸວ່າ: ການຄຸ້ມຄອງເອກະສານເຂົ້າ-ອອກ ແມ່ນການຕິດຕາມ, ກວດກາ, ຊຸກຍູ້, ແຈກຢາຍເອກະສານທາງການໃນການຈັດຕັ້ງຂອງຕົນໃຫ້ຊັດເຈນ, ວ່ອງໄວ, ປອດໄພ, ມີປະສິດທິຜົນ ແລະ ນຳໃຊ້ອຸປະກອນທັນສະໄໝເຂົ້າໃນການຄຸ້ມຄອງເອກະສານທາງການ ລວມທັງຮັບປະກັນການຮັກສາຄວາມລັບຕາມແຕ່ລະກໍລະນີ.
ພັອ ກຽງຄໍາ ອິນແພງທະວົງ
ນອກນັ້ນ, ຍັງໄດ້ເຜີຍແຜ່ເອກະສານຄໍາແນະນໍາ ເລກທີ 2565 /ຫວ ລົງວັນທີ 30 ສິງຫາ 2018 ກ່ຽວກັບ ຮູບແບບເອກະສານ ແລະ ການຮ່າງເອກະສານທາງການ ໃນກໍາລັງ ປກສ; ຂໍ້ຕົກລົງເລກທີ 2697/ຫວ ລົງວັນທີ 11 ກັນຍາ 2018 ວ່າດ້ວຍ ການຄຸ້ມຄອງ ແລະ ບໍລິຫານເອກະສານທາງການຂອງ ຫ້ອງວ່າການ ກະຊວງ ປກສ.
