ພະແນກກວດກາ ແລະ ຄວບຄຸມຢາເສບຕິດ ກອງບັາຊາການ ປກສ ແຂວງຊຽງຂວາງ ໄດ້ສົມທົບກັບ ປກສ ເມືອງຄຳ, ກຸ່ມຍອດລ້ຽງ ແລະ ອໍານາດການປົກຄອງບ້ານ ໄດ້ເຂົ້າໄປທຳລາຍສ່ວນຢາຝີ່ນທີ່ປະຊາຊົນລັກລອບປູກຢູ່ບ້ານຍອດລ້ຽງ ປະມານ 5 ເຮັກຕາ ໃນວັນທີ 24 ມັງກອນ 2019 ກ່ອນຮອດລະດູເກັບກ່ຽວ, ນໍາພາ ໂດຍ ພັທ ວັນສົມ ພຸດທະວົງສີ ຫົວໜ້າພະແນກກວດກາ ແລະ ຄວບຄຸມຢາເສບຕິດ ປກສ ແຂວງຊຽງຂວາງ.
ພັທ ປ່າກໍລໍ ຢົງວື ຮອງຫົວໜ້າພະແນກກວດກາ ແລະ ຄວບຄຸມ ຢາເສບຕິດ ປກສ ແຂວງຊຽງຂວາງ ໃຫ້ສໍາພາດຕໍ່ໜັງສືພິມຄວາມສະຫງົບ ໃນວັນທີ 25 ມັງກອນ ນີ້ວ່າ:
ການທໍາລາຍສວນຝິ່ນໃນຄັ້ງນີ້, ມີທັງໝົດ 3 ຈຸດ ຢູ່ເຂດບ້ານຍອດລ້ຽງ ເມືອງຄໍາ. ໃນນັ້ນ, ຈຸດທີ່ 1 ມີປະມານ 3 ເຮັດຕາ. ຈຸດທີ່ 2. ມີປະມານ 1 ກວ່າເຮັກຕາ ແລະ ຈຸດທີ່ 3, ມີປະມານ 1 ເຮັກຕາ ລວມທັງໝົດປະມານ 5 ເຮັກຕາ, ໂດຍປະຊາຊົນທີ່ລັກລອບປູກທັງໝົດ 8 ຄອບຄົວພາຍໃນບ້ານຍອດລ້ຽງ. ເຊິ່ງບາງຈຸດ
ຕົ້ນຝິ່ນແມ່ນເຕີບໃຫຍ່ ປະມານ 20 ຊັງຕີແມັດ, 40 ຊັງຕີແມັດ ແລະ ບາງຈຸດກໍເປັນດອກແລ້ວ.
ພັທ ປ່າກໍລໍ ຢົງວື ກ່າວອີກວ່າ:
ພາຍໃນເມືອງຄໍາ ມີປະຊາຊົນລັກລອບປູກຝິ່ນ ແລະ ຍັງບໍ່ທັນທໍາລາຍ ປະມານ 4-5 ເຮັກຕາ ແລະ ຈະສືບຕໍ່ປະສານສົມທົບກັບ ປກສ ເມືອງ ແລະ ປກສ ກຸ່ມເກັບກໍາຂໍ້ມູນໃຫ້ຊັດເຈນ ແລ້ວສົມທັບກັນໄປທໍາລາຍຖິ້ມໃຫ້ໝົດກ່ອນເຖິງລະດູການກີດເອົາຝິ່ນ. ພາຍຫຼັງທໍາລາຍແລ້ວໄດ້ເຮັດ ບົດບັນທຶກກັບຄອບຄົວທີ່ປຸກຝິ່ນໃຫ້ຢຸດເຊົ່າ ແລະ ແນະນໍາໃຫ້ເຂົາເຈົ້າຫັນໄປປູກພືດທີ່ໃຫ້ຜົນຜະລິດຫຼາຍກວ່ານີ້.
