ວິທະຍາຄານປ້ອງກັນຊາດ ໄກສອນ ພົມວິຫານ ( ວປກ ) ຈັດພິທີສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ( 20 ມັງກອນ 1949-20 ມັງກອນ 2019 ) ຂຶ້ນໃນວັນທີ 30 ມັງກອນນີ້ ເຂົ້າຮ່ວມໂດຍ ທ່ານ ນາງ ຈັນເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ, ມີແຂກຮັບເຊີນ, ພະນັກງານປະຕິວັດອາວຸໂສ, ຄະນະອໍານວຍການ ແລະ ພະນັກງານຄູ-ອາຈານ ເຂົ້າຮ່ວມ.
ໃນພິທີ, ພົຕ ຄໍາຫຼ້າ ພັນໄຊຍະສຸກ ຫົວໜ້າການເມືອງ ວປກ ໄດ້ຍົກໃຫ້ເຫັນປະຫວັດການເຕີບໃຫຍ່ຂະຫຍາຍຕົວຂອງກອງທັບ ປະຊາຊົນລາວທີ່ຕໍ່ສູ້ຍາດເອົາໄຊຊະນະມາສູ່ປະຊາຊົນລາວບັນດາເຜົ່າ ແລະ ຜົນງານທີ່ພົ້ນເດັ່ນຕະຫຼອດ 70 ປີຜ່ານມາ; ເຊິ່ງທ່ານໄດ້ຍົກໃຫ້ເຫັນບາງຕອນວ່າເປັນຫຍັງຈຶ່ງມີການສ້າງກອງທັບປະຊາຊົນລາວ ກໍຍ້ອນຂະບວນການປະຕິວັດຕໍ່ສູ້ຂອງປະຊາຊົນລາວບັນດາເຜົ່າຜູ້ຮັກຊາດໄດ້ເຕີບໃຫຍ່ຂະຫຍາຍຕົວຢ່າງວ່ອງໄວ, ແຂງແຮງ ແລະ ກວ້າງຂວາງໃນເວລານັ້ນມັນ ໄດ້ຮຽກຮ້ອງໃຫ້ມີການປະຕິວັດລາວ ຕ້ອງໄດ້ມີກໍາລັງແຮງແກ່ນສານໜຶ່ງເອກະພາບກ່ຽວກັບການຈັດຕັ້ງ ເພື່ອຕອບສະໜອງຕາມຄວາມຮຽກຮ້ອງຕ້ອງການຂອງ ໜ້າທີ່ການປະຕິວັດປົດປ່ອຍປະເທດຊາດ;
ເພື່ອຕອບສະໜອງກັບຄວາມຮຽກຮ້ອງຕ້ອງການຂອງພາລະກິດຕໍ່ສູ້ກອບກູ້ເອົາປະເທດຊາດອອກຈາກການຮຸກຮານ ແລະ ຢຶດຄອງຂອງພວກລ່າເມືອງຂຶ້ນ ຝຣັ່ງ ພ້ອມດ້ວຍລູກແຫຼ້ງຕີນມືຂອງພວກເຂົາ, ຢືນຢູ່ຕໍ່ໜ້າເລ່ກົນເພີ່ມທະວີການຮຸກຮານ, ຢຶດຄອງຂອງພວກລ່າເມືອງຂຶ້ນຝຣັ່ງ ແລະ ຂະບວນການປະຕິວັດຕໍ່ສູ້ຂອງປະຊາຊົນລາວບັນດາເຜົ່ານັບມື້ໄດ້ເປີດກວ້າງ, ມັນຮຽກຮ້ອງໃຫ້ມີກໍາລັງ ປະກອບອາວຸດອັນເຂັ້ມແຂງມີການຈັດຕັ້ງນໍາພາ, ບັນຊາເປັນເອກະພາບ ເພື່ອເປັນຫຼັກແຫຼ່ງແກ່ນສານຊຸກດັນໃຫ້ສົງຄາມປະຊາຊົນ ກ້າວໄປເຖິງໄຊຊະນະສຸດທ້າຍ,
ເຊິ່ງ ທ່ານ ເລນິນ ເວົ້າວ່າ:
“ ຢາກກູ້ຊາດ, ປົດປ່ອຍຊາດ ບໍ່ມີເສັ້ນທາງອື່ນໄດ ນອກຈາກເສັ້ນທາງການປະຕິວັດກໍາມະຊີບ ແລະ ຕ້ອງມີເຄື່ອງມືພະເດັດການກໍາມະຊີບ ”.
ສະນັ້ນ, ການສ້າງກອງທັບປະຊາຊົນລາວ ວັນທີ 20 ມັງກອນ 1949 ແມ່ນມີຄວາມໝາຍຄວາມສໍາຄັນທີ່ສຸດ, ມັນແມ່ນເຫດການ ປະຫວັດສາດໜຶ່ງທີ່ສໍາຄັນ, ແມ່ນບາດກ້າວແຫ່ງການຂະຫຍາຍຕົວ ຂອງການປະຕິວັດ, ແມ່ນການເຕີບໃຫຍ່ຂະຫຍາຍຕົວຂອງການປະຕິວັດ, ການເຕີບໃຫຍ່ເຂັ້ມແຂງຂອງກໍາລັງປະກອບອາວຸດປະຕິ ວັດ, ແມ່ນກອງທັບປະຕິວັດຂອງປະຊາຊົນລາວບັນດາເຜົ່າ, ເປັນກໍາລັງຫຼັກແຫຼ່ງໃນຂະບວນການຕໍ່ສູ້ ຂອງປະຊາຊົນລາວ ເພື່ອຄວາມເປັນເອກະລາດແຫ່ງຊາດ.
