ຫ້ອງການເມືອງ ປ້ອງກັນສູນກາງ ເອົາໃຈໃສ່ປະຕິບັດນະໂຍບາຍຕໍ່ ພະນັກງານ – ນັກຮົບ ຢ່າງທົ່ວເຖິງ

ຫ້ອງການເມືອງ ກອງບັນຊາການປ້ອງກັນສູນກາງ ກະຊວງ ປກສ ໄດ້ເອົາໃຈໃສ່ເປັນເຈົ້າການ ໃນການຄົ້ນຄວ້ານໍາສະເໜີຂັ້ນເທິງ ເພື່ອປະຕິບັດນະໂຍບາຍ ແລະ ປະກັນສັງຄົມໃນດ້ານຕ່າງໆ ໃຫ້ພະນັກງານ-ນັກຮົບຢ່າງທົ່ວເຖິງ ແລະ ຮັບປະກັນຄວາມສາມັກຄີພາຍໃນ ຢ່າງໜັກແໜ້ນ.

ໃນກອງປະຊຸມສະຫຼຸບວຽກງານ ປະຈໍາປີ 2018 ແລະ ວາງທິດທາງແຜນການ ປີ 2019 ຂອງ ຫ້ອງການເມືອງ ກອງບັນຊາການປ້ອງກັນສູນກາງ ໃນວັນທີ 19 ກຸມພາ ຜ່ານມາ, ໂດຍການເຂົ້າຮ່ວມຂອງ ພັອ ຄໍາເຄື່ອງ ບຸນວິໄລ ຫົວໜ້າກອງບັນຊາການປ້ອງກັນສູນກາງ, ມີຄະນະກອງບັນຊາການ, ຫ້ອງ, ກອງຮ້ອຍ ແລະ ພະນັກງານ-ນັກຮົບ ເຂົ້າຮ່ວມ.

ພັທ ນາງ ທຸມມາລີ ຄໍາພັນ ຮອງຫົວໜ້າຫ້ອງການເມືອງ ໄດ້ຜ່ານບົດສະຫຼຸບ ໃຫ້ຮູ້ວ່າ:

ປີ 2018, ຄະນະພັກ-ຄະນະບັນຊາ ຫ້ອງການເມືອງ ໄດ້ເອົາໃຈໃສ່ຊີ້ນໍາ-ນໍາພາ ພະນັກງານ-ນັກຮົບ ປະຕິບັດວຽກວິຊາສະເພາະ ດ້ວຍຄວາມຮັບຜິດຊອບສູງ ແລະ ມີຜົນສໍາເລັດ

ເປັນຕົ້ນແມ່ນ ການປະຕິບັດນະໂຍບາຍ ແລະ ປະກັນສັງຄົມ, ໄດ້ເປັນເຈົ້າການຄົ້ນຄວ້ານໍາສະເໜີຂັ້ນເທິງ ເພື່ອປະຕິບັດນະໂຍບາຍຕ່າງໆ ຕໍ່ພະນັກງານ-ນັກຮົບ ເຊັ່ນ:

ພະນັກງານ-ນັກຮົບ ໄດ້ຮັບການເລື່ອນຊັ້ນຂັ້ນຕ່າງໆທັງໝົດ 220 ສະຫາຍ, ສະເໜີພະນັກງານເຖິງອາຍຸກະສຽນບໍານານ 11 ສະຫາຍ, ເຂົ້້າຮັບເບ້ຍບໍານານແລ້ວ 4 ສະຫາຍ, ອະນຸມັດສ້າງຄອບຄົວ 29 ສະຫາຍ, ເບິ່ງແຍງພະນັກງານ-ນັກຮົບ ໃນເວລາເຈັບເປັນ 27 ສະຫາຍ ລວມເປັນເງິນ 93.900.000 ກີບ, ເງິນສະຫວັດດີການ 6 ສະຫາຍ ເປັນເງິນ 1.481.000 ກີບ, ເງິນກິນທານນໍາຄອບຄົວພະນັກງານທີ່ເສຍ ຊີວິດ 3.700.000 ກີບ ແລະ ມອບເງິນອຸດໜູນໃຫ້ຄອບຄົວພະນັກງານເສຍຊີວິດ ລວມທັງໝົດ 463.271.246 ກີບ.

ທ່ານຮອງຫົວໜ້າຫ້ອງການເມືອງ ຍັງໄດ້ກ່າວຕື່ມອີກວ່າ:

ທິດທາງແຜນການໃນປີນີ້, ຫ້ອງການເມືອງ ຈະສືບຕໍ່ເປັນເຈົ້າການຄົ້ນຄວ້າສະເໜີຂັ້ນເທິງ ປະຕິບັດນະໂຍບາຍດ້ານຕ່າງໆຕໍ່ກັບ ພະນັກງານ-ນັກຮົບ ໃນທົ່ວກໍາລັງປ້ອງກັນສູນກາງບົນພື້ນຖານແນວທາງນະໂຍບາຍຂອງພັກ, ລະບຽບກົດໝາຍຂອງລັດ ໃນການສະເໜີເລື່ອນຊັ້ນ ໃຫ້ພະນັກງານ; ພ້ອມກັນນັ້ນ, ກໍຕ້ອງເອົາໃຈໃສ່ເບິ່ງແຍງຕໍ່ຜູ້ທີ່ເຈັບເປັນ, ຊ່ວຍເຫຼືອຄອບຄົວຜູ້ທີ່ພົບຄວາມຫຍຸ້ງຍາກ, ຄອບຄົວຜູ້ເສຍຊີວິດ ແລະອື່ນໆ ຕາມຄວາມສາມາດ ແລະ ເງື່ອນໄຂຕົວຈິງ ເພື່ອເຕົ້າໂຮມຄວາມສາມັກຄີພາຍໃນ ໃຫ້ໜັກແໜ້ນ.