ກະຊວງສາທາລະນະສຸກ ໄດ້ດຳເນີນກອງປະຊຸມກະກຽມເປີດບັ້ນຂະບວນການ ວັນສັກວັກຊີນກັນພະຍາດແຫ່ງຊາດ ເພື່ອຕອບໂຕ້ການລະບາດ ພະຍາດໝາກແດງໃຫຍ່ ແລະ ໝາກແດງນ້ອຍ ທີ່ໂຮງແຮມດອນຈັນພາເລດ ໃນວັນທີ 15 ມີນາ 2019 ໂດຍມີ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີ ກະຊວງການເງິນ, ທ່ານ ນາງ ຄຳຈັນ ພົມແສງສະຫວັນ ຮອງປະທານສູນກາງແນວລາວສ້າງຊາດ, ພ້ອມດ້ວຍບັນດາເຈົ້າແຂວງ-ຮອງເຈົ້າແຂວງ, ແນວລາວສ້າງຊາດ ແຂວງ, ພະແນກສາທາລະນະສຸກ ແຂວງ ແລະ ບັນດາທ່ານຜູ້ຕາງໜ້າຈາກ ອົງການອະນາໄມໂລກ, ອຸຍນີເຊັບ, ກາວີ ແລະ ຄູ່ຮ່ວມພັດທະນາຕ່າງໆ ເຂົ້າຮ່ວມ.
ໃນກອງປະຊຸມ, ທ່ານ ຮສ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ ກ່າວວ່າ:
ກອງປະຊຸມຄັ້ງນີ້ ຈັດຂຶ້ນເພື່ອກະກຽມຄວາມພ້ອມ ໃນການຈັດຕັ້ງປະຕິບັດ ວັນສັກຢາກັນພະຍາດແຫ່ງຊາດ ເພື່ອກຳຈັດພະຍາດໝາກແດງ, ອັນສຳຄັນທີ່ສຸດ ແມ່ນເພື່ອຄົ້ນຄວ້າສົນທະນາ ແລະ ແບ່ງຄວາມຮັບຜິດຊອບ ແລະ ໜ້າທີ່ ໃຫ້ແຕ່ລະພາກສ່ວນ ເພື່ອສ້າງເງື່ອນໄຂເຮັດໃຫ້ ວັນສັກຢາກັນພະຍາດແຫ່ງຊາດ ທີ່ຈະປະຕິບັດໃນມໍ່ໆນີ້ ໃຫ້ບັນລຸ 95% ຂຶ້ນໄປໃນທຸກເມືອງ, ທຸກບ້ານ ເພື່ອປິດຊ່ອງວ່າງດ້ານພູມຄຸ້ມກັນຕໍ່ພະຍາດໝາກແດງ.
ສປປ ລາວ ມີອັດຕາປົກຄຸມສັກຢາກັນພະຍາດໝາກແດງ ຮອບປົກກະຕິທົ່ວປະເທດ ໄດ້ເພີ່ມຂຶ້ນຈາກ 40% ໃນປີ 2007 ມາເປັນ 80% ໃນປີ 2018. ອັນສໍາຄັນ ແມ່ນໄດ້ຈັດວັນສັກຢາກັນພະຍາດໝາກແດງຂຶ້ນ 4 ຄັ້ງ ທົ່ວປະເທດ ຄື: ໃນປີ 2007 (ລຸ່ມ 15 ປີ) ບັນລຸໄດ້ 96%, 2011 (ລຸ່ມ 19 ປີ) ບັນລຸໄດ້ 97%, 2014 (ລຸ່ມ 10 ປີ) ບັນລຸໄດ້ 100% ແລະ ປີ 2017 (ລຸ່ມ 5 ປີ) ບັນລຸໄດ້ 99%.
ແຕ່ເຖິງວ່າ ຈະມີການເພີ່ມຂຶ້ນຂອງອັດຕາປົກຄຸມສັກຢາກັນພະຍາດ ໃນລະບົບປົກກະຕິ ທົ່ວປະເທດ ແລ້ວກໍ່ຕາມ, ແຕ່ຍັງມີ 11 ແຂວງ ຈາກທັງໝົດ 18 ແຂວງ ທົ່ວປະເທດ ທີ່ມີລາຍງານອັດຕາປົກຄຸມສັກຢາກັນພະຍາດໝາກແດງ ຕໍ່າກວ່າ 80%, ໃນນັ້ນມີ 4 ແຂວງຕໍ່າກວ່າ 70%. ດັ່ງນັ້ນ, ຈຶ່ງເຮັດໃຫ້ຫຼາຍທ້ອງຖິ່ນມີພູມຕ້ານທານຂອງຊຸມຊົນຕໍ່າ, ມີຄວາມສ່ຽງສູງຈະເກີດມີການລະບາດ ດັ່ງທີ່ປະກົດຂຶ້ນໃນເວລານີ້.
ເຊິ່ງສ່ອງແສງໃຫ້ເຫັນວ່າ:
ຍັງມີກຸ່ມເປົ້າໝາຍ ພາດໂອກາດມາຕະຫຼອດ ຈຶ່ງເຮັດໃຫ້ກຸ່ມນັ້ນ ກາຍເປັນເປົ້າຈູ່ໂຈມຂອງພະຍາດໝາກແດງໃຫຍ່ ຍ້ອນເຂົາເຈົ້າບໍ່ເຄີຍໄດ້ຮັບວັກຊີນກັນພະຍາດໝາກແດງ ເລີຍ ແມ່ນແຕ່ 1 ເຂັມ.
ເພື່ອຕອບໂຕ້ສະພາບການລະບາດຂອງ ພະຍາດໝາກແດງ ທີ່ກໍາລັງເກີດຂຶ້ນໃນເວລານີ້ ແລະ ເພື່ອສ້າງຖານພູມຄຸ້ມກັນຕໍ່ພະຍາດໝາກແດງໃຫຍ່ ໃນທົ່ວປະເທດ, ບໍ່ມີຄວາມສ່ຽງທີ່ຈະລະບາດຄືນໃໝ່ອີກ, ທາງ ກະຊວງສາທາລະນະສຸກ, ລັດຖະບານແຫ່ງ ສປປ ລາວ ພ້ອມດ້ວຍຄູ່ຮ່ວມພັດທະນາ ໄດ້ຈັດຕັ້ງປະຕິບັດ ວັນສັກວັກຊີນແຫ່ງຊາດ ກັນພະຍາດໝາກແດງ ຂຶ້ນໃນເດືອນມີນາ ແລະ ເມສາ ປີ 2019 ໃນຂອບເຂດທົ່ວປະເທດ, ແນໃສ່ເປົ້າໝາຍເດັກອາຍຸ ລະຫວ່າງ 6 ເດືອນ ຫາລຸ່ມ 10 ປີ ຢູ່ 14 ແຂວງ ຄື: ຜົ້ງສາລີ, ຫຼວງນໍ້າທາ, ອຸດົມໄຊ, ບໍ່ແກ້ວ, ຫຼວງພະບາງ, ຫົວພັນ, ໄຊຍະບູລີ, ຊຽງຂວາງ, ຄໍາມ່ວນ, ສະຫວັນນະເຂດ, ສາລະວັນ, ເຊກອງ, ຈໍາປາສັກ ແລະ ອັດຕະປື ແລະ ລະຫວ່າງ 6 ເດືອນ ຫາລຸ່ມ 20 ປີ ໃນ 4 ແຂວງ ຄື: ນະຄອນຫຼວງວຽງຈັນ, ບໍລິຄໍາໄຊ, ແຂວງວຽງຈັນ ແລະ ໄຊສົມບູນ.
ທັງນີ້, ກໍເພື່ອຕັດຕ່ອງໂສ້ການຕິດຕໍ່ຂອງພະຍາດໝາກແດງໃຫຍ່, ໝາກແດງນ້ອຍ ແລະ ທັງເປັນການຍົກອັດຕາການສັກຢາກັນພະຍາດປົກກະຕິ ໃຫ້ເດັກນ້ອຍລຸ່ມ 1 ປີ ໄດ້ 90% ຂຶ້ນໄປໃນທຸກບ້ານ, ທຸກເມືອງ ໃນຂອບເຂດທົ່ວປະເທດ, ໂດຍມີເປົ້າໝາຍທັງໝົດ 1.869.856 ຄົນ ໃນທົ່ວປະເທດ.