ໃນໄລຍະການສະເຫຼີມສະຫຼອງບຸນປີໃໝ່ລາວ ພສ 2562, ເຈົ້າໜ້າທີ່ ກົມຕໍາຫຼວດຈະລາຈອນ ກົມໃຫຍ່ຕໍາຫຼວດ ກະຊວງ ປກສ ລົງຕັ້ງຈຸດກວດກາການສັນຈອນ ແລະ ຈັບຄວາມໄວຢູ່ເສັ້ນທາງເລກທີ 13 ເໜືອ ແລະ ເສັ້ນທາງເລກທີ 13 ໃຕ້ ມາແຕ່ວັນທີ 9-16 ເມສາ 2019 ຈັບຄວາມໄວຂອງລົດທັງໝົດ 1.232 ຄັນ ພົບນັກຂັບຂີ່ລະເມີດດ້ວຍການໃຊ້ຄວາມໄວເກີນ 579 ຄັນ.
ພັທ ແກ້ວມາລາ ແສງທອງ ຮອງຫົວໜ້າກົມຕໍາຫຼວດຈະລາຈອນ ຜູ້ຊີ້ນໍາວຽກງານກວດກາການປະຕິບັດກົດໝາຍ ກ່າວວ່າ:
ໃນໄລຍະປີໃໝ່ລາວນີ້, ເຈົ້າໜ້າທີ່ກົມຕໍາຫຼວດຈະລາຈອນ ໄດ້ສຸມໃສ່ຕັ້ງຈຸດກວດກາຍານພາຫະນະ, ຜູ້ຂັບຂີ່ ແລະ ເອກະສານການນໍາໃຊ້ພາຫະນະ, ການບັນທຸກຂົນສົ່ງສິນຄ້າ, ການຂົນສົ່ງໂດຍສານເກີນ, ຄວາມໄວ, ທາດເຫຼົ້າ, ບໍ່ໃສ່ໝວກກັນກະທົບ, ບໍ່ຮັດສາຍແອວນິລະໄພ ແລະອື່ນໆ ຢູ່ຕາມເສັ້ນທາງເລກທີ 13 ເໜືອ ແຕ່ຂອບເຂດນະຄອນຫຼວງວຽງຈັນ-ວັງວຽງ ແລະ ເສັ້ນທາງເລກທີ 13 ໃຕ້ ແຕ່ຂອບເຂດ ນະຄອນຫຼວງວຽງຈັນ-ບໍລິຄໍາໄຊ.
ມາແຕ່ວັນທີ 9-16 ເມສາ 2019 ຜ່ານການປະຕິບັດໜ້າທີ່ ພົບນັກຂັບຂີ່ລະເມີດກົດລະບຽບຈະລາຈອນທັງໝົດ 801 ຄັນ ເຊິ່ງໃນນີ້ພົບວ່າ:
ຄວາມໄວເກີນ 579 ຄັນ, ບໍ່ມີໃບຂັບຂີ່ 47 ຄັນ, ບໍ່ຖືໃບຂັບຂີ່ 18 ຄັນ, ບໍ່ຖືທະບຽນ 2 ຄັນ, ທະບຽນໝົດກໍານົດ 8 ຄັນ, ເຕັກນິກໝົດກໍານົດ 11 ຄັນ, ບໍ່ກວດກາເຕັກນິກ 7 ຄັນ, ຂົນສົ່ງບໍ່ຖືກຕ້ອງ 2 ຄັນ, ບໍ່ມີໃບອາກອນ 5 ຄັນ, ບໍ່ມີໃບອະນຸຍາດດໍາເນີນທຸລະກິດ 3 ຄັນ, ໃສ່ເຄື່ອງສູງເກີນ 15 ຄັນ, ບັນທຸກຄົນເກີນ 6 ຄັນ, ບໍ່ມີປະກັນໄພ 16 ຄັນ, ບໍ່ເສຍຄ່າທາງ 79 ຄັນ ແລະ ບໍ່ມີໃບອະນຸຍາດແລ່ນລົດ 3 ຄັນ.
ຕໍ່ກັບຜູ້ລະເມີດກົດລະບຽບຈະລາຈອນດັ່ງກ່າວ, ສ່ວນຫຼາຍແມ່ນພະນັກງານ 188 ຄົນ, ທະຫານ 106 ຄົນ, ຕໍາຫຼວດ 91 ຄົນ, ປະຊາຊົນ 82 ຄົນ, ກໍາມະກອນ 71 ຄົນ, ຄ້າຂາຍ 147 ຄົນ, ນັກຮຽນ-ສຶກສາ 13 ຄົນ ແລະ ຊາວຕ່າງປະເທດ 103 ຄົນ; ຜ່ານການກວດກາ ພົບເຫັນນັກຂັບຂີ່ລະເມີດກົດລະບຽບດັ່ງກ່າວນັ້ນ ເຈົ້າໜ້າທີ່ໄດ້ສຶກສາອົບຮົມກ່າວເຕືອນກັບທີ່ ໄດ້ທັງໝົດ 387 ຄົນ, ຂຽນບິນປັບໃໝ 100 ໃບ, ຂຽນໃບສັ່ງໃຫ້ 314 ໃບ, ກັກໃບຂັບຂີ່ໄດ້ 201 ໃບ ແລະ ທະບຽນລົດໄດ້ 113 ໃບ.
