ໄລຍະການສະຫຼອງບຸນປີໃໝ່ລາວ ພສ 2562, ເຈົ້າໜ້າທີ່ຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ລົງຕັ້ງຈຸດກວດກາຍານພາຫະນະ, ຈັບຄວາມໄວ ແລະ ກວດກາທາດເຫຼົ້າ ຢູ່ຕາມເສັ້ນທາງຕ່າງໆ ທັງໝົດ 7 ຈຸດ ໃນວັນທີ 14-16 ເມສາ 2019; ຜ່ານການປະຕິບັດໜ້າທີ່ ພົບນັກຂັບຂີ່ລະເມີດກົດລະບຽບຈະລາຈອນ ທັງໝົດ 188 ຄົນ ໃນນີ້ດື່ມສິ່ງມຶນເມົາແລ້ວຂັບຂີ່ ມີທາດເຫຼົ້າເກີນກໍານົດ ຢູ່ທີ່ 38 ຄົນ.
ພັທ ເພັງສະຫວັນ ທໍາມາບູນ ຫົວໜ້າພະແນກຕໍາຫຼວດຈະລາຈອນ ນະຄອນຫຼວງວຽງຈັນ ກ່າວຕໍ່ສື່ມວນຊົນ ໃນວັນທີ 18 ເມສາ 2019 ວ່າ:
ໃນໄລຍະເທດສະການສະຫຼອງບຸນປີໃໝ່ລາວ ພສ 2562, ເຈົ້າໜ້າທີ່ຕໍາຫຼວດຈະລາຈອນ ນະຄອນຫຼວງວຽງຈັນ ໄດ້ລົງຕັ້ງຈຸດກວດກາຍານພາຫະນະ, ຈັບຄວາມໄວ ແລະ ກວດກາທາດເຫຼົ້້າ ຢູ່ຕາມເສັ້ນທາງຕ່າງໆພາຍໃນຕົວເມືອງ ແລະ ເທດສະບານ ທັງໝົດ 7 ຈຸດ ຄື:
- ຖະໜົນທ່າເດື່ອ ບໍລິເວນໜ້າສວນວັດທະນະທໍາ
- ເສັ້ນທາງ 450 ປີ ບໍລິເວນຈຸດ 4 ແຍກນາຄວາຍ
- ເສັ້ນທາງ 13 ໃຕ້ ບໍລິເວນໜ້າສະໜາມກິລາຫຼັກ 16, ເສັ້ນທາງເລກ 10 ເຂດບ້ານທ່າງ່ອນ
- ເສັ້ນທາງເລກທີ 13 ເໜືອ ເຂດບ້ານໜອງຄັນຄູ
- ເສັ້ນທາງເລກທີ 11 ເຂດບ້ານອ່າງໃຫຍ່
- ເສັ້ນທາງນາຄູນນ້ອຍ ຫາເຂດທ່າງ່ອນ
ຜ່ານການຈັດຕັ້ງປະຕິບັດຂອງເຈົ້າໜ້າທີ່ ສາມາດກວດພົບນັກຂັບຂີ່ລະເມີດທັງໝົດ 188 ຄົນ ໃນນີ້ລະເມີດດ້ານຄວາມໄວເກີນ 57 ຄົນ, ດື່ມສິ່ງມຶນເມົາທີ່ມີທາດເຫຼົ້້າເກີນ 0,25 ມິນລີກຼາມ ແລ້ວຂັບຂີ່ລົດ 38 ຄົນ ແລະ ອື່ນໆ.
ຕໍ່ກັບບັນຫາດັ່ງກ່າວທີ່ນັກຂັບຂີ່ລະເມີດນີ້, ເຈົ້າໜ້າທີ່ ສຶກສາອົບຮົມກັບທີ່ໄດ້ 137 ຄົນ, ຂຽນໃບສັ່ງໃຫ້ 51 ຄົນ, ກັກເອກະສານລົດໄດ້ 52 ໃບ ແລະ ກັກລົດ 1 ຄັນ.
ນອກຈາກການກວດກາແລ້ວຢູ່ ນະຄອນຫຼວງວຽງຈັນ ແລ້ວ ຍັງມີອຸບັດຕິເຫດເກີດຂຶ້ນ ໃນໄລຍະປີໃໝ່ລາວ ເຊິ່ງເລີ່ມແຕ່ວັນທີ 14-16 ເມສາ ຜ່ານມາ ເກີດຂຶ້ນທັງໝົດ 20 ຄັ້ງ, ສົ່ງຜົນເຮັດໃຫ້ພາຫະເປ່ເພ ຈໍານວນ 40 ຄັນ, ຄົນໄດ້ຮັບບາດເຈັບ 29 ຄົນ ແລະ ເສຍຊີວິດທັງໝົດ 5 ຄົນ.
ສ່ວນເມືອງທີ່ເກີດອຸບັດຕິເຫດຫຼາຍກວ່າໝູ່ ແມ່ນ: ເມືອງສີໂຄດຕະບອງ ເກີດຂຶ້ນ 7 ຄັ້ງ, ເມືອງໄຊທານີ 4 ຄັ້ງ, ເມືອງໄຊເສດຖາ, ເມືອງນາຊາຍທອງ ແລະ ເມືອງຈັນທະບູລີ ເມືອງລະ 2 ຄັ້ງ, ເມືອງຫາດຊາຍຟອງ, ເມືອງປາກງື່ມ ແລະ ເມືອງສັງທອງ ເມືອງລະ 1 ຄັ້ງ, ສ່ວນເມືອງສີສັດຕະນາກ ບໍ່ມີອຸບັດຕິເຫດເກີດຂຶ້ນ.