ໃນຕອນເຊົ້າຂອງວັນທີ 30 ກໍລະກົດ ເວລາປະມານ 7:00 ໂມງ, ເກີດ ໄພນ້ຳຖ້ວມທີ່ເມືອງນານ ເຮັດໃຫ້ບ້ານເຮືອນ ແລະ ພື້ນທີ່ທຳການຜະລິດຂອງປະຊາຊົນ ຕາມລ້ອງແມ່ນ້ຳນານ. ໃນນັ້ນ, ມີຜົນກະທົບ 8 ບ້ານ 372 ຄອບຄົວ ເຊັ່ນ: ບ້ານນາຝາຍ 4 ຄອບຄົວ, ບ້ານປ່າໄຜ່ 35 ຄອບຄົວ, ບ້ານສີມຸງຄຸນ 35 ຄອບຄົວ, ບ້ານສີບຸນເຮືອງ 130 ຄອບຄົວ, ບ້ານນາເລົາ 120 ຄອບຄົວ, ບ້ານໂພນຫີນ 10 ຄອບຄົວ, ບ້ານນາເຄີນ 37 ຄອບຄົວ ແລະ ບ້ານທາດ 1 ຄອບຄົວ ທີ່ຖືກຜົນກະທົບຫຼາຍທີ່ສຸດ; ປະຊາຊົນບາງຄອບຄົວໄດ້ພຽງເຄື່ອງນຸ່ງຄາຄີງ ແລະ ມີບາງຄົນຍັງຕິດຢູ່ໃນເຮືອນ.
ເຫດການຄັ້ງນີ້ ໄດ້ສ້າງຄວາມເສຍຫາຍຫຼາຍກວ່າທຸກປີທີ່ຜ່ານມາ. ແຕ່ຫຼາຍຄັ້ງຜ່ານມານັ້ນ, ມີຄົນເສຍຊີວິດ ສຳລັບຄັ້ງນີ້ ມີພຽງຜູ້ໄດ້ຮັບບາດເຈັບ ບໍ່ມີຄົນເສຍຊີວິດ, ສ່ວນຂໍ້ມູນຄວາມເສຍຫາຍຍັງຢູ່ໃນຂັ້ນຕອນການເກັບກຳຂໍ້ມູນ, ເບື້ອງຕົ້ນອົງການປົກຄອງເມືືອງ ໄດ້ສົ່ງກຳລັງເຈົ້າໜ້າທີ່ທະຫານ-ຕ່ຳຫຼວດ ຂອງກອງບັນຊາການເມືອງ ເຂົ້າຊ່ວຍເຫຼືອປະຊາຊົນທີ່ຕິດຄ້າງຢູ່ໃນເຮືອນ ພ້ອມທັງຊ່ວຍປ້ອງກັນຜົນກະທົບໃຫ້ບາງຄອບຄົວ ແລະ ຈັດຕັ້ງການປ້ອງກັນເວນຍາມ ເຝົ້າລະວັງຕະຫຼອດ 24 ຊົ່ວໂມງ ເນື່ອງຈາກຝົນຍັງສືບຕໍ່ຕົກລົງມາ, ສ່ວນລະດັບນ້ຳໄດ້ຫຼຸດລົງເກືອບເຂົ້າສູ່ພາວະປົກກະຕິແລ້ວ.
ປະຊາຊົນບາງຄອບຄົວໄດ້ຮັບການເບິ່ງແຍງຢ່າງໃກ້ສິດຈາກອົງການປົກຄອງເມືອງ. ປັດຈຸບັນ, ປະຊາຊົນຜູ້ມີເງື່ອນໄຂໄດ້ເຂົ້າອະນາໄມເຮືອນຂອງຕົນ ໂດຍສົມທົບກັບເຈົ້າໜ້າທີ່ຕໍ່າຫຼວດ, ທະຫານເມືອງ ແລະ ທະຫານຈາກກອງພັນ 414 ກອງບັນຊາການທະຫານແຂວງເຂົ້າຊ່ວຍເຫຼືອ. ແຕ່ສິ່ງທີ່ປະຊາຊົນຕ້ອງການເປັນອັນຮີບດ່ວນໃນປັດຈຸບັນແມ່ນເຄື່ອງນຸ່ງຮົ່ມ, ສະບຽງອາຫານ ແລະ ນ້ຳດື່ມ ເພື່ອບັນເທົາໄພເບື້ອງຕົ້ນ, ເຊິ່ງຕອນແລງຂອງວັນທີ່ 30 ກໍລະກົດນີ້ ໄດ້ຮັບການຊ່ວຍເຫຼືອເບື້ອງຕົ້ນ ຈາກອົງການປົກຄອງແຂວງໄຊຍະບູລີ ເປັນເງິນສົດ 5.000.000 ກີບ ແລະ ອົງການປົກຄອງເມືອງໄຊຍະບູລີ ມອບນ້ຳດື່ມ ແລະ ໝີ່ເລັດຮູບ ມູນຄ່າ 2.400.000 ກີບ.
ປັດຈຸບັນ, ອົງການປົກຄອງແຂວງຫຼວງພະບາງ ໄດ້ຕັ້ງຈຸດຮັບເຄື່ອງບໍລິຈາກຢູ່ຫ້ອງວ່າການປົກຄອງແຂວງ ພ້ອມນີ້ ຫຼາຍພາກສ່ວນໃນສັງຄົມ ກໍໄດ້ຈັດຕັ້ງກຸ່ມລະດົມການບໍລິຈາກ ເພື່ອນຳເຄື່ອງໄປມອບບັນເທົາໄພໃຫ້ປະຊາ ຊົນໃນໄວໆນີ້.
