ກອງປະຊຸມສະຫຼຸບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ປະຈຳປີ 2019 ແລະ ທິດທາງແຜນການປີ 2020, ຂອງໜ່ວຍພັກຮາກຖານ ກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງ ປກສ ຄັ້ງວັນທີ 20 ສິງຫາ 2019, ເປັນປະທານ ໂດຍສະຫາຍ ພັອ ກົງສີ ສຸວັນນະຕຸ້ມ ເລຂາໜ່ວຍພັກຮາກຖານ ຫົວ ໜ້າກົມຕຳຫຼວດຈະລາຈອນ, ມີບັນດາ ສະມາຊິກພັກ ແລະ ພະນັກງານ-ນັກຮົບ ເຂົ້າຮ່ວມ ໂດຍໃຫ້ຮູ້ວ່າ: ຜ່ານການຕີລາຄາແບ່ງປະເພດສະມາຊິກພັກ ແລະ ມະຫາຊົນ ໃນບັ້ນດຳເນີນຊີວິດການເມືອງໃນທົ່ວກົມມີສະມາຊິກພັກ ໃນປະເພດແຂງ 77 ສະຫາຍ ກວມ 80,20% ໃນຈຳນວນສະມາຊິກພັກ ທັງໝົດ 95 ສະຫາຍ.
ສະຫາຍ ພັທ ຄຳສອນ ສີດາວົງ ປະທານກວດກາພັກ ຮອງຫົວໜ້າ ກົມຈະລາຈອນ ກ່າວວ່າ: ຄະນະພັກ ກົມຕຳຫຼວດຈະລາຈອນ ໄດ້ເອົາໃຈໃສ່ຊີ້ນຳ – ນຳພາບັນດາຈຸພັກ ສຸມໃສ່ເຮັດວຽກງານສຶກສາອົບຮົມການເມືອງ – ແນວຄິດໃຫ້ພະນັກງານສະມາຊິກພັກ ເພື່ອໃຫ້ເຂົາເຈົ້າມີຄຸນສົມບັດສິນທຳປະຕິວັດ, ມີຄວາມສັດຊື່ບໍລິສຸດ ເພື່ອເຮັດສຳເລັດໜ້າທີ່ການເມືອງທີ່ການຈັດຕັ້ງຂັ້ນເທິງມອບໝາຍໃຫ້. ຜ່ານການຕີລາຄາຈັດແບ່ງປະເພດສະມາຊິກພັກ ຈຳນວນສະມາຊິກພັກ ທັງໝົດ 95 ສະຫາຍ ຍິງ 13 ສະຫາຍ, ປະເພດແຂງ 77 ສະຫາຍ ຍິງ 12 ສະຫາຍ ກວມ 80, 20%, ປະເພດກາງ 17 ສະຫາຍ ຍິງ 1 ສະຫາຍ 19,76% ແລະ ມະຫາຊົນ ທັງໝົດ 81 ສະຫາຍ ຍິງ 26 ສະຫາຍ ໄດ້ປະເພດແຂງ 28 ສະຫາຍ ຍິງ 9 ສະຫາຍ 34, 56% ແລະ ປະເພດກາງ 49 ສະ ຫາຍ ຍິງ 17 ສະຫາຍ ກວມເອົາ 60,49% ສາມາດຈັດແບ່ງປະເພດສະມາຊິກພັກ ແລະ ໜ່ວຍພັກໄດ້ໜ່ວຍພັກແຂງ.
ໃນຕໍ່ໜ້າ, ຄະນະພັກ ກົມຕຳຫຼວດຈະລາຈອນ ຈະສືບຕໍ່ສູ້ຊົນສ້າງໜ່ວຍພັກໃຫ້ໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ, ສ້າງສະມາຊິກພັກໃຫ້ເປັນສະມາຊິກເຂັ້ມແຂງ ແລະ ແຂງໃຫ້ໄດ້ 90%; ເດັດດ່ຽວຕ້ານບໍ່ໃຫ້ມີສະມາຊິກພັກອ່ອນ ແລະ ສູ້ຊົນປະຕິບັດ 4 ຄາດໝາຍ 3 ຂະບວນການຈຸດສຸມ 4 ຂະບວນການປິ່ນອ້ອມ ເຮັດໃຫ້ອຸບັດຕິເຫດບົນທ້ອງຖະໜົນຫຼຸດລົງ, ປູກຈິດສໍານຶກໃຫ້ປວງຊົນຕື່ນຕົວປະຕິບັດກົດລະບຽບການສັນຈອນຢ່າງໜັກແໜ້ນ, ສູ້ຊົນສ້າງກໍາລັງຕໍາຫຼວດຈະລາຈອນ ໃຫ້ກາຍເປັນຕໍາຫຼວດຂອງປະຊາຊົນ ຮັບໃຊ້ປະຊາຊົນ, ຈົງຮັກພັກດີຕໍ່ພັກຕໍ່ປະເທດຊາດ, ບໍລິສຸດສັດຊື່ປອດໃສຂາວສະອາດ, ມີຈັນຍາບັນ, ມີຈັນຍາທໍາ ແລະ ຕື່ນຕົວເຮັດໜ້າທີ່ບໍລິການ ປະຊາຊົນ ດ້ວຍຄວາມບໍລິສຸດສັດຊື່, ຫັນເຂົ້າສູ່ການຄຸ້ມຄອງ, ກໍ່ສ້າງກໍາລັງຕໍາຫຼວດຈະລາຈອນ ໃຫ້ມີຄວາມເຂັ້ມແຂງທາງດ້ານການຈັດຕັ້ງ, ມີລະບຽບແບບແຜນເກັ່ງດ້ານວຽກງານວິຊາສະເພາະ ແລະ ທັນສະໄໝ.
