ວັນທີ 10 ກັນຍາ 2019, ກອງບັນຊາການ ທະຫານນະຄອນຫຼວງວຽງຈັນ ໄດ້ຈັດກອງປະຊຸມສະຫຼຸບວຽກງານ ຮອບດ້ານປະຈຳປີ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍ ປີ 2019; ໂດຍການເປັນກຽດເຂົ້າຮ່ວມຂອງ ພົຈວ ສີພອນ ຈັນສົມວົງ ຫົວໜ້າການເມືອງ ກອງບັນຊາການທະຫານນະຄອນຫຼວງວຽງຈັນ ແລະ ພັອ ສີ ທະວີໄຊ ຫົວໜ້າການທະຫານ ກອງບັນຊາການທະຫານນະຄອນຫຼວງວຽງຈັນ; ມີຫົວໜ້າຫ້ອງການປ້ອງກັນຊາດ-ປ້ອງກັນຄວາມສະຫງົບນະຄອນຫຼວງວຽງຈັນ ພ້ອມດ້ວຍຄະນະພັກ-ຄະນະບັນຊາ, ພະນັກງານຫຼັກແຫຼ່ງທົ່ວອົງການ 5 ຫ້ອງ ແລະ ກົມກອງອ້ອມຂ້າງທີ່ຂຶ້ນກັບ ເຂົ້າຮ່ວມ.
ໃນໂອກາດນີ້, ພັທ ດາວບິນ ເລີດລີວັນ ຫົວໜ້າຫ້ອງການ ກອງບັນຊາການ ທະຫານນະຄອນຫຼວງວຽງຈັນ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດວຽກງານຂອງຕົນໃນໄລຍະ 6 ເດືອນຜ່ານມາ; ເຊິ່ງໄດ້ຍົກໃຫ້ເຫັນເຖິງຜົນງານອັນພົ້ນເດັ່ນຫຼາຍດ້ານ ເປັນຕົ້ນແມ່ນຄະນະພັກ-ຄະນະບັນຊາທຸກຂັ້ນໄດ້ເອົາໃຈໃສ່ຊີ້ນຳ-ນຳພາພະນັກງານ-ນັກຮົບ ຂອງຕົນເຮັດໜ້າທີ່ວຽກງານຕາມພາລະບົດບາດຂອງກົມກອງ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ຂັ້ນເທິງວາງອອກຢ່າງເຂັ້ມງວດ; ໃນນັ້ນ, ໄດ້ຖືເອົາວຽກງານການສຶກສາອົບຮົມການເມືອງ-ແນວ ຄິດເປັນກົກ ໂດຍສ້າງໃຫ້ພະນັກງານ-ນັກຮົບ ມີຄວາມອຸ່ນອຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກ, ຈັດຕັ້ງກໍາລັງລົງກໍ່ສ້າງຮາກຖານການເມືອງແບບມູນເຊື້ອ ໂດຍປະສານສົມທົບແໜ້ນກັບ ອຳນາດການປົກຄອງທ້ອງຖິ່ນ ແລະ ກຳລັງທຸກພາກສ່ວນທີ່ກ່ຽວຂ້ອງ ເຮັດໜ້າທີ່ຕິດຕາມສະພາບປະກົດການຫຍໍ້ທໍ້ທີ່ ຈະເກີດຂຶ້ນ ແລະ ແກ້ໄຂໃຫ້ທັນເວລາຮັບປະກັນຄວາມສະຫງົບໂດຍພື້ນຖານ; ພ້ອມກັນນັ້ນ, ກໍຍັງໄດ້ຈັດຕັ້ງກຳລັງທຸກ
ພາກສ່ວນເຂົ້າປ້ອງກັນໃນວັນບຸນປະຫວັດສາດສຳຄັນຕ່າງໆຂອງຊາດທີ່ຈັດຂຶ້ນ ເວົ້າສະເພາະແມ່ນຢູ່ພາຍໃນຂອບເຂດນະຄອນຫຼວງວຽງຈັນ ໃຫ້ມີຄວາມສະຫງົບປອດໄພ 100%, ຖືເອົາວຽກງານການອົບຮົມ-ຫັດແອບ ປະຈຳປີ ເປັນວຽກງານໜຶ່ງທີ່ສຳຄັນໃນການປັບປຸງລະບຽບແບບແຜນ, ຝຶກຝົນກຳລັງແຮງກາຍ ເປັນຕົ້ນແມ່ນອົບຮົມ-ຫັດແອບທາງດ້ານສິນລະປະຍຸດ-ຍຸດທະວິທີ ໃຫ້ນາຍ ແລະ ພົນທະຫານ ຢູ່ໃນທົ່ວກົມກອງ ໃຫ້ມີຄວາມໜັກແໜ້ນເຂັ້ມແຂງ, ມີຄວາມຊຳນິຊຳນານ, ເອົາໃຈໃສ່ໃນການຈັດຕັ້ງລະບົບປະຈຳການຕະຫຼອດ 24 ຊົ່ວໂມງ ກຽມພ້ອມສູ້ຮົບໄດ້ທຸກເວລາ.
ສ່ວນວຽກງານການແກ້ໄຂຊີວິດການເປັນຢູ່ແມ່ນໄດ້ຊີ້ນຳໃຫ້ແຕ່ລະກົມກອງສ້າງເງື່ອນໄຂເຮັດໜ້າທີ່ຕາມທ່າແຮງບົ່ມຊ້ອນຂອງກົມກອງ ຕາມທິດນຳເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໂດຍຖືເອົາການປູກ-ການລ້ຽງເປັນຕົ້ນຕໍ; ພ້ອມນີ້, ກອງປະຊຸມຍັງໄດ້ຜ່ານທິດທາງແຜນການປະຈຳ 6 ເດືອນທ້າຍປີ 2018, ຈາກນັ້ນ ໃນກອງປະຊຸມຍັງໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ແກ່ 30 ໜ່ວຍພັກທີ່ຂຶ້ນກັບກົມກອງຂອງຕົນຢ່າງສົມກຽດ.