ໃນວັນທີ 4 ກັນຍາ ທີ່ຜ່ານມາ, ເຈົ້າໜ້າທີ່ ປກສ ເມືອງຈັນທະບູລີ ນະຄອນຫຼວງວຽງຈັນ ຕິດຕາມກັກຕົວຄົນຮ້າຍ 1 ຄົນ ທີ່ກໍ່ເຫດໃຊ້ມີດຍາວ ປະມານ 40 ຊັງຕີແມັດ ປຸ້ນຊັບ ຂອງປະຊາຊົນ ຢູ່ບ້ານໂພນສະຫວ່າງ ເມືອງຈັນທະບູລີ ພາຍຫຼັງຫຼົບໜີໄດ້ພຽງ 1 ວັນ.
ໜ່ວຍງານສືບສວນ-ສອບສວນ ຄະດີອາຍາ ປກສ ເມືອງຈັນທະບູລີ ໃຫ້ຮູ້ວ່າ: ໃນວັນທີ 3 ກັນຍາ 2019, ຜູ້ເສຍຫາຍໄດ້ເຂົ້າແຈ້ງຄວາມວ່າ: ເວລາປະມານ 3:00 ໂມງ ມີຄົນຮ້າຍ 1 ຄົນ ເຂົ້າມາປຸ້ນຊັບ ຢູ່ເຮືອນບ້ານໂພນສະຫ່ວາງ ເມືອງຈັນທະບູລີ ໄດ້ເງິນໄປຈຳນວນ 1.500.000 ກີບ ແລະ 300 ໂດລາສະຫະລັດ, ເມື່ອເຈົ້າໜ້າທີ່ວິຊາສະເພາະລົງເກັບກຳຂໍ້ມູນຫຼັກຖານ, ຮ່ອງຮ້ອຍຕ່າງໆຂອງການກໍ່ເຫດ ຈຶ່ງສາມາດລວບລວມຂໍ້ມູນຫຼັກຖານ ແລະ ປື້ມບັນຊີເປົ້າໝາຍຕິດຕາມ. ມາຮອດວັນທີ 4 ກັນຍາ 2019, ກໍສາມາດກັກຕົວເປົ້າໝາຍໄດ້ຊື່ ທ້າວ ສອນໄຊ ອາຍຸ 42 ປີ ບ້ານໂພນສະຫວ່າງ ໄປສອບສວນ.
ທ້າວ ສອນໄຊ ສາລະພາບວ່າ: ໄດ້ອອກຈາກເຮືອນໄປເຊົ່າຫ້ອງແຖວກັບໝູ່ຢູ່ບ້ານໂພນສະຫວ່າງ, ເວລາປະມານ 12:00 ໂມງ ຂອງວັນທີ 2 ກັນຍາ 2019 ໄດ້ພາກັນຫຼິ້ນການພະນັນ (ຫຼິ້ນໄພ້) ຮອດເວລາ 3:00 ໂມງຂອງວັນ ທີ 3 ກັນຍາ ຕົນເອງໄດ້ເສຍເງິນໝົດຕົວ ຈຳນວນ 300.000 ກີບ ຈຶ່ງເກີດມີແນວຄິດຢາກລັກຊັບ ຫຼື ປຸ້ນຊັບ ຂອງພົນລະເມືອງ ເລີຍອອກຈາກຫ້ອງແຖວໄປຊອກຫາລັກຊັບ-ປຸ້ນຊັບ ໂດຍການກະກຽມມີດຍາວປະມານ 40 ຊັງຕີແມັດ ຕິດຕົວໄປນຳ ເມື່ອຂັບລົດຈັກອອກຈາກຫ້ອງແຖວໄປຕາມຮ່ອມບ້ານເຂດບ້ານໂພນສະຫວ່າງ ເຫັນເຮືອນວິນລາ ຫຼັງໜຶ່ງຕັ້ງຢູ່ແຄມທາງຂ້າງເຮືອນເປັນຮ່ອມນ້ອຍ ແລະ ມີຄວາມມືດ ຈຶ່ງຂັບລົດໄປຈອດໄວ້ຮ່ອມທີ່ມືດນັ້ນ ແລ້ວປິນກໍາແພງເຂົ້າໄປໃນບໍລິເວນເຮືອນ ແລະ ສັງເກດເຫັນປ່ອງຢູ່ປະຕູທາງເຂົ້າເຮືອນຄົວທີ່ຍັງເຮັດບໍ່ສຳເລັດ.
ພາຍຫຼັງປີນເຂົ້າປ່ອງດັ່ງກ່າວໄດ້ແລ້ວ ໄດ້ຊອກຄົ້ນເອົາເຄື່ອງຢູ່ຫ້ອງໂຖງໄດ້ ເຫັນກະເປົາພາຍສີດໍານ້ອຍ 1 ໜ່ວຍ. ຈາກນັ້ນ, ໄດ້ເຂົ້າໄປຫ້ອງນອນທີ່ເຫັນວ່າບໍ່ໄດ້ລ໋ອກປະຕູ ເມື່ອໄຂເຂົ້າໄປໃນຫ້ອງ ເຫັນມີແມ່ຍິງ 1 ຄົນ ນອນຢູ່ໃນຫ້ອງ ແລະ ເຫັນກະເປົານ້ອຍສີແດງຕັ້ງຢູ່ໂຕະຂ້າງຕຽງນອນ. ທັນໃດນັ້ນ, ແມ່ຍິງຄົນນັ້ນໄດ້ຮູ້ສຶກຕົວຕົນ ຈຶ່ງຖອຍອອກມານອກຫ້ອງມາຢູ່ເຮືອນຄົວ ຖ້າປະມານ 5 ນາທີ. ເມື່ອບໍ່ມີໃຜອອກມາ, ຕົນກໍໄດ້ເຂົ້າໄປອີກ ຍິງຄົນນັ້ນໄດ້ຕື່ນຂຶ້ນມາຕົນ ຈຶ່ງນອນລົງຂ້າງຕຽງ ແລ້ວຕັດສິນໃຈລຸກຂຶ້ນ ພ້ອມທັງເອົາມີດຈີ້ຜູ້ຍິງຄົນນັ້ນ ແລ້ວຈັບເອົາກະເປົາເງິນ ພ້ອມທັງຫັນຫຼັງ ແລ່ນກັບໄປທາງເຮືອນຄົວປີນກໍາເເພງ ຂັບລົດຈັກຫຼົບໜີ. ເມື່ອຂັບລົດມາເຮືອນພໍ່ ຢູ່ບ້ານໂພນສະຫວ່າງ ຄົ້ນເບິ່ງກະເປົ້າເງິນມີເງິນປະມານ 1.500.000 ກີບ ແລະ ເງິນໂດລາ 300 ໂດລາ, ເມື່ອໄດ້ເງິນແລ້ວ ກໍນໍາໄປໃຊ້ຈ່າຍສ່ວນຕົວຈົນໝົດ ສ່ວນເງິນໂດລາ ແມ່ນໄດ້ຈ່າຍໄປແລ້ວ 100 ໂດລາ ຈຶ່ງຖືກເຈົ້າໜ້າທີ່ກັກຕົວ.
ເຈົ້າໜ້າທີ່ ປກສ ເມືອງຈັນທະບູລີ ໃຫ້ຮູ້ວ່າ: ທ້າວ ສອນໄຊ ແມ່ນມີເຈດຕະນາປຸ້ນຊັບແທ້, ເຊິ່ງສະແດງອອກໃຫ້ເຫັນວ່າ ຜູ້ກ່ຽວແມ່ນຮູ້ດີກ່ຽວກັບສະພາບພື້ນທີ່ ແລະ ໃຊ້ເວລາໃນການຕິດຕາມໄລຍະສັ້ນໆ ແລ້ວປີນກໍາແພງເຂົ້າໄປໃນເຄຫະສະຖານ ເພື່ອລົງມືໃຊ້ມີດຈີ້ເອົາຊັບ. ຕໍ່ກັບການກະທໍາດັ່ງກ່າວ, ໄດ້ສ້າງຄວາມເສຍຫາຍ ທາງດ້ານຊັບຂອງບຸກຄົນອື່ນເປັນການກະທໍາທີ່ຜິດຕໍ່ປະມວນກົດໝາຍອາຍາທີ່ໄດ້ກໍານົດໄວ້ໃນມາດຕາ 230 ແລະ ກຳລັງສະຫຼຸບສຳນວນຄະດີສົ່ງໄອຍະການຕາມກົດໝາຍ.
