ໃນວັນທີ 11 ເມສາ 2020, ຄອບຄົວແກ້ວໄຊຍະຈັກ ຢູ່ບ້ານໜອງໄຮ ເມືອງຫາດຊາຍຟອງ ນະຄອນຫຼວງວຽງຈັນ ໄດ້ແຈກເຂົ້າກ່ອງ, ຜ້າປິດປາກ ແລະ ນໍ້າດື່ມ ລວມມູນປະມານ 10 ລ້ານກີບ ໃຫ້ພະນັກງານແພດໝໍ, ທະຫານ, ຕໍາຫຼວດ ແລະ ກູ້ໄພ; ເພື່ອເປັນການປະກອບສ່ວນທາງດ້ານສະບຽງອາຫານໃຫ້ຜູ້ປະຕິບັດວຽກງານຕ້ານພະຍາດ COVID-19 ໃຫ້ມີກໍາລັງໃຈ ແລະ ກຳລັງກາຍປະຕິບັດວຽກງານດັ່ງກ່າວໃຫ້ປະສົບຜົນສໍາເລັດ.
ທ່ານ ນາງ ຝົນ ແກ້ວໄຊຍະຈັກ ໄດ້ຕາງໜ້າໃຫ້ຄອບຄົວແກ້ວໄຊຍະຈັກ ກ່າວວ່າ: ການແຈກອາຫານໃນຄັ້ງນີ້ ປະກອບມີ: ເຂົ້າກ່ອງ ຈໍານວນ 500 ກ່ອງ, ຜ້າປິດປາກ ຈໍານວນ 20 ກັບ ແລະ ນໍ້າດື່ມ ຈໍານວນ 30 ແພັກ ລວມມູນຄ່າປະມານ 10 ລ້ານກີບ ໂດຍຈຸດປະສົງທີ່ມອບໃຫ້ພະນັກງານແພດໝໍ, ທະຫານ, ຕໍາຫຼວດ ແລະ ກູ້ໄພ ທີ່ເປັນກຳລັງສໍາຄັນໃນການປະຕິບັດວຽກງານຕ້ານພະຍາດ COVID-19; ກໍເພື່ອໃຫ້ເຂົາເຈົ້າມີກຳລັງກາຍແຂງແຮງ ແລະ ເປັນການໃຫ້ກຳລັງໃຈໃຫ້ພວກເຂົາປະຕິບັດວຽກງານຕ້ານພະຍາດ COVID-19 ໃຫ້ໄດ້ຮັບຜົນສໍາເລັດ.
