ໃນໄລຍະຜ່ານມາ, ມີຫຼາຍໂຄງການ ກໍ່ສ້າງເສັ້ນທາງໃນນະຄອນຫຼວງວຽງຈັນ ຢຸດສະງັກ ຍ້ອນບັນດາບໍລິສັດຮັບເໝົາກໍ່ສ້າງ ບໍ່ມີທຶນໃນການສືບຕໍ່ກໍ່ສ້າງ; ເຊິ່ງນັບແຕ່ປີ 2014 ເປັນຕົ້ນມາ ມີ 2 ໂຄງການກໍ່ສ້າງເສັ້ນທາງທີ່ຢຸດສະງັກແບບຊໍາເຮື້ອ ຄື: ໂຄງການກໍ່ສ້າງເສັ້ນທາງ T5 ແລະ T6.
ທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫຼວງວຽງຈັນ ຊີ້ແຈງຕໍ່ກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນນະຄອນຫຼວງວຽງ ຈັນຊຸດທີ I ວ່າ: ໂຄງການກໍ່ສ້າງເສັ້ນ ທາງ T5 ເລີ່ມແຕ່ຂ້າງໂຮງໝໍ 150 ຕຽງ-ບ້ານຊຳເກດ (ເສັ້ນທາງດົງໂດກ-ສີເກີດ) ມີຄວາມຍາວ 5,2 ກິໂລແມັດ, ເຊິ່ງກໍ່ ສ້າງເປັນທາງປູເບຕົງກວ້າງ 12 ແມັດ ມີທາງຍ່າງ 2 ເບື້ອງ ມີຮ່ອງລະບາຍນ້ຳ ແລະ ໄຟເຍືອງທາງທັງສອງເບື້ອງມູນ ຄ່າ 115 ຕື້ກວ່າກີບ ການກໍ່ສ້າງໄດ້ແບ່ງອອກເປັນ 2 ສັນຍາ ຄື: ສັນຍາ ທີ 1 ບໍລິສັດ STD ກໍ່ສ້າງ ຂົວທາງຈຳກັດເປັນຜູ້ຮັບເໝົາ ມູນຄ່າຕາມສັນຍາ 66,39 ຕື້ກວ່າກີບ ວຽກປະຕິບັດໄດ້ພຽງແຕ່ 17,4% ແລະ ຢຸດເຊົາການກໍ່ສ້າງແຕ່ປີ 2014 ຍ້ອນບໍລິສັດບໍ່ມີທຶນໃນການສືບຕໍ່ກໍ່ສ້າງ, ສັນຍາທີ 2 ບໍລິສັດສົມພູມີກໍ່ສ້າງ ຂົວທາງ ເປັນຜູ້ຮັບເໝົາ ມູນຄ່າຕາມສັນຍາ 48,68 ຕື້ກວ່າກີບ ວຽກປະຕິບັດສຳເລັດພຽງແຕ່ 10,2% ຢຸດເຊົາການກໍ່ສ້າງແຕ່ປີ 2014 ຍ້ອນບໍລິສັດບໍ່ມີທຶນໃນການກໍ່ສ້າງ.
ພາຍຫຼັງທັງ 2 ບໍລິສັດ ບໍ່ສາມາດນຳທຶນມາກໍ່ສ້າງໄດ້ ຈຶ່ງໄດ້ມອບສິດໃຫ້ບໍລິສັດ ສີວິໄຊກໍ່ສ້າງຂົວທາງຈຳກັດ ຮ່ວມ ກັບບໍລິສັດ ປັກກິ່ງຈົງເຫິງຄຸນຫຼຸນບໍລິຫານການລົງທຶນຈຳກັດຜູ້ດຽວ ມາສືບຕໍ່ກໍ່ສ້າງ ຕາມສັນຍາໃນປີ 2017 ໄດ້ສືບຕໍ່ປະຕິບັດໜ້າວຽກ ໄດ້ 19% ກໍໄດ້ຢຸດເຊົາ ຍ້ອນບໍ່ມີທຶນໃນການກໍ່ສ້າງ.
ເສັ້ນທາງ T6 ເລີ່ມແຕ່ຖະໜົນໄກ ສອນ (ບ້ານພະຂາວ)-ໂຮງແຮມຄອນປະສົງ-ບ້ານຫ້ວຍຫົງ-ບ້ານໜອງພະຍາ ແມ່ນບໍລິສັດ ວຽງຈັນມໍເຕີ້ ຈຳກັດ ຮ່ວມກັບບໍລິສັດ ທະນູຄຳ ກໍ່ສ້າງຂົວທາງຈຳກັດ ເປັນຜູ້ຮັບເໝົາລົງທຶນ ມູນຄ່າ 147,7 ຕື້ກີບ ສັນຍາສິ້ນສຸດປີ 2014 ປະຕິບັດວຽກໄດ້ 30,34% ໄດ້ຢຸດເຊົາໃນປີ 2015; ຕໍ່ມາໄລຍະກອງປະຊຸມປີ 2015 ນະຄອນຫຼວງ ໄດ້ມອບໄລຍະທາງແຕ່ໂຮງແຮມຄອນປະສົງຫາບ້ານພະຂາວ ຍາວ 850 ແມັດ ປູເບຕົງໃຫ້ ບໍລິສັດ ຢູນານກໍ່ສ້າງ ໂດຍນຳໃຊ້ເງິນກູ້ດອກເບ້ຍຕ່ຳຂອງ ສປ ຈີນ ມາກໍ່ສ້າງຈິ່ງສຳເລັດ ສ່ວນວຽກທີ່ບໍລິສັດ ວຽງຈັນ ມໍເຕີ້ ຈຳກັດ ຮ່ວມກັບບໍລິສັດ ທະນູຄຳກໍ່ ສ້າງຂົວທາງຈຳກັດ ທີ່ຮັບຜິດຊອບແມ່ນມີຄວາມຊັກຊ້າ; ສະນັ້ນ, ພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນ ໄດ້ເຊີນ 2 ບໍລິສັດດັ່ງກ່າວມາ ປຶກສາຫາລືເພື່ອຫາທາງອອກ ໂດຍສະເໜີໃຫ້ 2 ບໍລິສັດຢຸດເຊົາ, ແຕ່ 2 ບໍລິສັດບໍ່ຍອມຢຸດເຊົາ ແລະ ບໍລິສັດ ກໍໄດ້ຕົກລົງສ້ອມແປງຄືນໃໝ່ ເພື່ອໃຫ້ສັນຈອນໄປ-ມາໄດ້ດີຂຶ້ນກວ່າເກົ່າ; ສ່ວນບັນດາວຽກຊັກຊ້າ ແລະ ບໍ່ໄປຕາມແຜນ ຍ້ອນບໍລິສັດຂາດທຶນຮອນໃນການກໍ່ສ້າງ ອີກດ້ານໜຶ່ງເບື້ອງລັດກໍບໍ່ສາມາດຕອບ ສະໜອງເງື່ອນໄຂໃນການຊຳລະສະສາງ ເນື່ອງຈາກວ່າງົບປະມານມີຈຳນວນຈຳກັດ. 
