ໃນວັນທີ 26 ກັນຍາ 2018 ທີ່ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ, ຄະນະນໍາກະຊວງ ປກສ ນໍາໂດຍ ພົຕ ສິນທະວົງ ໄຊຍະກອນ ຮອງລັດຖະມົນຕີກະຊວງ ປກສ ໄດ້ນໍາພວງມາລາເຂົ້າວາງຕໍ່ໜ້າຮູບຖ່າຍຂອງສະຫາຍ ເຈິນ ດ່າຍ ກວາງ ກໍາມະການກົມການເມືອງສູນກາງພັກຄອມມູນິດ ຫວຽດນາມ ປະທານປະເທດແຫ່ງ ສສ ຫວຽດນາມ ເພື່ອສະແດງຄວາມໄວ້ອາໄລຕໍ່ການຈາກໄປ ຢ່າງບໍ່ມີວັນກັບຄືນມາຂອງສະຫາຍ ທີ່ໄດ້ເສຍຊີວິດຍ້ອນພະຍາດຮ້າຍແຮງ ໃນວັນທີ 21 ກັນຍາ 2018, ລວມອາຍຸໄດ້ 62 ປີ ( ເກີດເມື່ອວັນທີ 12 ຕຸລາ 1956 -21 ກັນຍາ 2018 ).
ສະຫາຍ ເຈິນ ດ່າຍ ກວາງ ໄດ້ດໍາລົງຕໍາແໜ່ງປະທານປະເທດ ສສ ຫວຽດນາມ ໃນເດືອນເມສາ 2016; ພາຍຫຼັງທີ່ດໍາລົງຕໍາແໜ່ງຢູ່ກະຊວງພາຍໃນຂອງ ສສ ຫວຽດນາມ ເປັນເວລາ 40 ປີ ແລະ ຂຶ້ນຊື່ວ່າເປັນຜູ້ນໍາດີເດັ່ນໃນການບໍລິຫານປະເທດຕະຫຼອດມາ.
ສະຫາຍ ເຈິນ ດ່າຍ ກວາງ ເປັນຜູ້ໜຶ່ງທີ່ປະກອບສ່ວນອັນສໍາຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຂອງ ສສ ຫວຽດນາມ ໂດຍສະເພາະໃນຂົງເຂດວຽກງານປ້ອງກັນຊາດ, ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍພາຍໃນປະເທດ.
ເຂົ້າວາງພວງມາລາຕໍ່ໜ້າຮູບຖ່າຍຂອງສະຫາຍ ເຈິນ ດ່າຍ ກວາງ
ນອກນັ້ນ, ຍັງເປັນຜູ້ໜຶ່ງທີ່ປະກອບສ່ວນອັນສຳຄັນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຕະຫຼອດມາ.
