ຫໍພິພິທະພັນ ໄກສອນ ພົມວິຫານ ໄດ້ຈັດກອງປະຊຸມສຳມະນາວິທະຍາສາດ ຄັ້ງທີ I ກ່ຽວກັບ ຊີວິດ ແລະ ການເຄື່ອນໄຫວປະຕິວັດຂອງ ທ່ານ ໜູຮັກ ພູມສະຫວັນ ໄລຍະປີ 1914-1975 ຂຶ້ນໃນວັນທີ 10 ຕຸລາ 2018, ໃຫ້ກຽດເປັນປະທານໂດຍ ທ່ານ ປອ ສິງທອງ ສິງຫາປັນຍາ ຮັກສາການຫົວໜ້າຄະນະຮັບຜິດຊອບຫໍພິພິທະພັນ ໄກສອນ ພົມວິຫານ ມີ ພົຕ ສິນທະວົງ ໄຊຍະກອນ ຮອງລັດຖະມົນຕີກະຊວງ ປກສ ມີບັນດາຜູ້ຊົງຄຸນວຸດທິໃກ້ຊິດຕິດແທດທີ່ເຄີຍດຳລົງຊີວິດ ແລະ ເຄື່ອນໄຫວເຮັດວຽກຮ່ວມກັບ ທ່ານ ໜູຮັກ ພູມສະຫວັນ, ອະດີດການນຳຂັ້ນສູງພັກ-ລັດ, ນັກຄົ້ນຄວ້າ ແລະ ພະນັກງານອາວຸໂສທີ່ກ່ຽວຂ້ອງ ເຂົ້າຮ່ວມ.
ທ່ານ ປອ ສິງທອງ ສິງຫາປັນຍາ ໃຫ້ຮູ້ໂດຍຫຍໍ້ວ່າ:
ທ່ານ ໜູຮັກ ພູມສະຫວັນ ເກີດເມື່ອວັນທີ 9 ເມສາ 1914 ທີ່ບ້ານພາລຸກາ ເມືອງຫວ້ານໃຫຍ່ ແຂວງມຸກດາຫານ (ປະເທດໄທ); ຕັ້ງຢູ່ແຄມນໍ້າຂອງທາງຝັ່ງຂວາປະເທດລາວ, ເປັນບ້ານປຸກຢູ່ອາໄສຕາມດິນໄຮ່-ນາ ຊຶ່ງອາໄສດິນນາຄາດໄຖຫວ່ານກ້າປູກເຂົ້າ ແລະ ຫາປາລ້ຽງຊີບຢູ່ກັບນໍ້າຂອງ ໂດຍໃຊ້ເຮືອແພໄປມາຫາສູ່ກັນລະຫວ່າງ ລາວ-ໄທ, ບ້ານແມ່ນຢູ່ເຊິ່ງກັບບ້ານຈອມແກ້ວ ເມືອງຄັນທະບູລີ ແຂວງສະຫວັນນະເຂດ, ຊາວບ້ານຊາວເມືອງທັງສອງຝັ່ງຊ້າຍ-ຂວາ ຖືວ່າເປັນຊົນຊາດເຜົ່າລາວດຽວກັນ; ຕະຫຼອດໄລຍະຜ່ານມາ, ທ່ານໄດ້ປ່ຽນທັດສະນະຈາກນາຍທຶນນ້ອຍມາເປັນນັກປະຕິວັດ ຈາກຫຼັງມືເປັນໜ້າມື ໂດຍເດັດຂາດຢ່າງມະຫັດສະຈັນ, ທ່ານມີຄວາມຮັກຊາດລາວຢ່າງດູດດື່ມ, ອຸທິດຕົນເອງແກ່ການປະຕິວັດເພື່ອຊາດ, ເພື່ອປະຊາຊົນ ແລະ ເພື່ອການປະຕິວັດຢ່າງແທ້ຈິງ, ມີອຸດົມການຕໍ່ສູ້ກູ້ຊາດ, ເດັດດ່ຽວໜຽວແໜ້ນນຳພາການປະຕິບັດພາລະກິດປົດປ່ອຍຊາດຈົນເຖິງໄຊຊະນະສຸດທ້າຍ, ເປັນຜູ້ນຳແຫ່ງສັນຍາລັກຂອງພັກທີ່ມີຄວາມຈົງຮັກພັກດີ, ບໍລິສຸດສັດຊື່ຂາວສະອາດຢ່າງແທ້ຈິງທັງສ້າງຄວາມສາມັກຄີພາຍໃນພັກ-ພາຍໃນຊາດລາວ ໄດ້ເປັນຢ່າງດີຕະຫຼອດມາ ແລະ ສາມາດຕີເອົາຊະນະສັດຕູຜູ້ຮຸກຮານ ພ້ອມທັງປົດປ່ອຍປະເທດຊາດໄດ້ຢ່າງສົມບູນ ໃນປີ 1975.
ການສຳມະນານີ້ ແມ່ນເປັນການຢັ້ງຢືນຄືນມູນເຊື້ອຂອງ ທ່ານ ໜູຮັກ ພູມສະຫວັນ ເພື່ອເປັນການເກັບກຳ, ຮີບໂຮມ, ຮຽບຮຽງເອົາເຫດການປະຫວັດສາດ ແລະ ບົດຂຽນຄວາມຊົງຈຳ ແລະ ການດຳລົງຊີວິດຕ່າງໆຂອງ ທ່ານ ໜູຮັກ ພູມສະຫວັນ ມາເປັນຂໍ້ມູນພື້ນຖານໃຫ້ແກ່ການຈັດວາງສະແດງຮູບພາບ, ວັດຖຸພັນ ແລະ ກຽມເປີດອະນຸສອນສະຖານຂອງ ທ່ານ ໜູຮັກ ພູມສະຫວັນ ຢ່າງເປັນທາງການໃນຕົ້ນປີ 2019 ໃຫ້ເປັນຂະບວນຟົດຟື້ນ ເພື່ອໃຫ້ຄົນຮຸ່ນຫຼັງໄດ້ເຂົ້າມາທ່ຽວຊົມ ແລະ ເກັບກ່ຽວເອົາມູນເຊື້ອຂອງເພິ່ນ ໄປຜັນຂະຫຍາຍເຂົ້າໃນການປະຕິບັດວຽກງານຂອງຕົນໃຫ້ເກີດປະໂຫຍດສູງສຸດ.
