ສະຫະພັນຍິງປືນແຫ່ງຊາດລາວ ໄດ້ສຳເລັດການແຂ່ງຂັນກິລາຍິງປືນ ໄອພີເອສຊີ ລະດັບ III ເພື່ອຊີງຂັນ ນາຍົກລັດຖະມົນຕີ ສປປ ລາວ, ເຂົ້າຮ່ວມເປັນປະທານໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີແຫ່ງ ສປປ ລາວ, ມີບັນດາລັດຖະມົນຕີ-ຮອງລັດຖະມົນຕີຈາກ ກະຊວງ ປກສ, ກະຊວງສຶກສາທິການ ແລະ ກິລາ, ກະຊວງອ້ອມຂ້າງ, ຫົວໜ້າກົມ, ບັນດາຄູຝຶກ, ນັກກິລາ ແລະ ແຂກຮັບເຊີນ ເຂົ້າຮ່ວມ.
ພົຕ ສິນທະວົງ ໄຊຍະກອນ ຮອງລັດຖະມົນຕີ ກະຊວງ ປກສ ທັງເປັນປະທານສະຫະພັນຍິງປືນແຫ່ງຊາດລາວ ກ່າວໃນພິທີມອບຂັນລາງວັນໃຫ້ແກ່ຜູ້ຊະນະ ການແຂ່ງຂັນຍິງປືນ ໃນວັນທີ 28 ຕຸລານີ້ວ່າ:
ການແຂ່ງຂັນກິລາຍິງ ປືນ ໄອພີເອສຊີ ລະດັບ III ເພື່ອຊີງຂັນ ນາຍົກລັດລະມົນຕີແຫ່ງ ສປປ ລາວ ຄັ້ງທີ I ໄດ້ຈັດຂຶ້ນໃນລະຫວ່າງວັນທີ 26-28 ຕຸລານີ້ ທີ່ສະໜາມຍິງປືນ 5 ເມສາ ເຊິ່ງມີນັກກິລາເຂົ້າຮ່ວມການແຂ່ງຂັນທັງໝົດ 128 ຄົນ ທີ່ມາຈາກປະເທດກໍາປູເຈຍ, ໄທ, ຈີນ, ຮົງກົງ, ໂປແລນ ແລະ ລາວ ເຊິ່ງເປັນຄັ້ງທໍາອິດທີ່ຈັດຢູ່ໃນ ສປປ ລາວ ໂດຍການແຂ່ງຂັນປະກອບມີທັງໝົດ 6 ປະເພດຄື: ປະເພດໂປຣດັກຊັ່ນ, ສະແຕນດາດ, ໂອເພັນ, ຄລາດຊິກ, ລີໂວເວີ ແລະ ປະເພດໂປຣດັກຊັ່ນອອບຕິກ; ສຳລັບຜູ້ທີ່ຊະນະ ແມ່ນໄດ້ຮັບຫຼຽນລາງວັນ ແລະ ຂັນລາງວັນ.
ຜ່ານການແຂ່ງຂັນF ຊະນະເລີດໃນແຕ່ລະປະເພດປະກອບມີຄື: ປະເພດໂປຣດັກຊັ່ນ ລາງວັນທີ 1 ແມ່ນ ທ້າວ ຫັດຊະນະ ວິຈິດປະຕິມາ, ລາງວັນທີ 2 ແມ່ນ ທ້າວ ເອກ ວົງມີ ທັງສອງຄົນມາຈາກປະເທດໄທ, ລາງວັນທີ 3 ແມ່ນ ທ້າວ ຫົງພະຈັນ ດາລາວົງ ຈາກປະເທດລາວ; ປະເພດສະແຕນດາດ, ລາງວັນທີ 1 ແມ່ນ ທ້າວ ທະນະກອນ ບໍລິສຸດ, ລາງວັນທີ 2 ແມ່ນ ທ້າວ ທໍາມະສັກ ວົງລັກສັກ, ລາງວັນທີ 3 ແມ່ນ ທ້າວ ນະລົງສັກ ແກ້ວເມືອງເພັດ ທັງສາມຄົນມາຈາກປະເທດໄທ; ປະເພດໂປຣດັກຊັ່ນອອບຕິກ, ລາງວັນທີ 1 ແມ່ນ ທ້າວ ສຸນັນ ວັດທະບູນ, ລາງວັນທີ 2 ແມ່ນ ນາງ ອາໂນໄທ ເມືອງມະນີ ທັງສອງແມ່ນນັກກິລາປະເທດລາວ ແລະ ລາງວັນທີ 3 ແມ່ນ ນາງ ວັງ ຢີທຽນ ມາຈາກປະເທດຈີນ.
ນອກນີ້, ຍັງມີລາງວັນລາງວັນອື່ນໆອີກຈໍານວນຫຼວງຫຼາຍ. ໃຫ້ກຽດມອບຫຼຽນ ແລະ ຂັນລາງວັນໂດຍ ທ່ານ ສອນໄຊ ສີພັນດອນ, ພົຕ ສົມແກ້ວ ສີລາວົງ ລັດຖະມົນຕີກະຊວງ ປກສ ແລະ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ.
