ວັນທີ 31 ຕຸລາຜ່ານມານີ້, ພະນະທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ ພ້ອມຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ເຈິ່ນເກີ້ມຕູ້ ເລຂາທິການສູນກາງພັກ ປະທານຄະນະກຳມະການກວດກາສູນກາງພັກ ກອມມູນິດ ສສ ຫວຽດນາມ ພ້ອມດ້ວຍຄະນະ.
ພະນະທ່ານ ບຸນຍັງ ວໍລະຈິດ ໄດ້ກ່າວຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການທີ່ມາຢ້ຽມຢາມ ແລະ ເຮັດວຽກຮ່ວມກັບ ຄະນະກວດກາສູນກາງພັກປະຊາຊົນປະຕິວັດລາວ ໃນຄັ້ງນີ້ ໂດຍສະເພາະແມ່ນການພົວພັນຮ່ວມມືຮອບດ້ານ ແລະ ຄວາມສາມັກຄີແບບພິເສດລະຫວ່າງ ສອງພັກ-ສອງລັດ ກໍຄືປະຊາຊົນສອງຊາດ ລາວ-ຫວຽດນາມ ທີ່ໄດ້ຮ່ວມມືຊ່ວຍເຫຼືອເຊິ່ງກັນແລະກັນ ຕະຫຼອດໄລຍະຜ່ານມາ ເປັນຕົ້ນແມ່ນການກໍ່ສ້າງບຸກຄະລາກອນ, ການພັດທະນາເສດຖະກິດ-ສັງຄົມ ແລະ ທາງດ້ານອື່ນໆມີຜົນສຳເລັດເປັນຢ່າງດີ.
ຈາກນັ້ນ, ສະຫາຍ ເຈິ່ນເກີ້ມຕູ້ ໄດ້ລາຍງານສະພາບກ່ຽວກັບ ການມາຢ້ຽມຢາມເຮັດວຽກຮ່ວມກັບ ຄະນະກວດກາສູນກາງພັກປະຊາຊົນປະຕິວັດລາວ ເປັນຕົ້ນການຈັດຕັ້ງປະຕິບັດວຽກງານຕິດຕາມ-ກວດກາພັກ, ວຽກງານກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ ເພື່ອຊອກໃຫ້ເຫັນຂໍ້ສະດວກ ແລະ ຂໍ້ຫຍຸ້ງຍາກໃນການປະຕິບັດວຽກງານກວດກາ ແລະ ວຽກງານຈຸດສຸມທີ່ຈະຕ້ອງໄດ້ຮ່ວມກັນປະຕິບັດ ໃຫ້ມີຜົນສຳເລັດໃນຕໍ່ໜ້າ
ສະຫາຍ ເຈິ່ນເກີ້ມຕູ້
ພ້ອມທັງເປັນການປະຕິບັດບົດບັນທຶກການຮ່ວມມືສອງອົງການກວດກາ ຂອງສອງພັກ ໄລຍະປີ 2016-2021 ທີ່ໄດ້ຮ່ວມກັນເຊັນໃນວັນທີ 24 ພຶດສະພາ 2016 ເພື່ອ ສືບຕໍ່ແລກປ່ຽນທາງດ້ານຄະນະຜູ້ແທນໃນຫຼາຍລະດັບແຕ່ສູນກາງ ລົງຮອດທ້ອງຖິ່ນ ໂດຍສະເພາະ ແມ່ນການສົ່ງເສີມບັນດາແຂວງ ທີ່ມີຊາຍແດນຕິດຈອດກັນໄດ້ໄປ-ມາຫາສູ່ແລກປ່ຽນບົດຮຽນເຊິ່ງກັນແລະກັນ
ພ້ອມທັງການຊ່ວຍເຫຼືອກໍ່ສ້າງພະນັກງານຂອງລາວກ່ຽວກັບ ວຽກງານກວດກາພັກ, ກວດກາລັດ, ສະກັດກັ້ນ ແລະ ຕ້ານການສໍ້ລາດບັງຫຼວງ ທັງໄລຍະສັ້ນ ແລະ ຍາວ ໃນປີ 2019 ໃຫ້ມີຄວາມລະອຽດ, ໂປ່ງໃສ ແລະ ມີປະສິດທິພາບ.
