ກອງປະຊຸມສ້າງແຜນກໍານົດ ພະນັກງານນໍາພາ-ບັນຊາ ຂັ້ນຄຸ້ມຄອງ ກະຊວງ ປກສ ໄດ້ຈັດຂຶ້ນໃນວັນທີ 13-16 ພະຈິກ 2018, ເປັນປະທານໂດຍ ພົຕ ສົມແກ້ວ ສີລາວົງ ເລຂາທິການສູນກາງພັກ ເລຂາຄະນະພັກກະຊວງ ລັດຖະມົນຕີກະຊວງ ປກສ, ມີຄະນະປະຈໍາພັກ, ຄະນະພັກກະຊວງ, ຄະນະພັກກົມໃຫຍ່, ຫ້ອງວ່າການ, ກົມ, ກອງບັນຊາການ, ວິທະຍາຄານ, ກອງບັນຊາການ ປກສ ແຂວງ, ປກສ ນະຄອນຫຼວງວຽງຈັນ ແລະ ພະນັກງານຫຼັກແຫຼ່ງ ເຂົ້າຮ່ວມ.
ພົຕ ສົມແກ້ວ ສີລາວົງ ກ່າວເປີດກອງປະຊຸມ ວ່າ:
ກອງປະຊຸມດັ່ງກ່າວນີ້ ຈະດໍາເນີນເປັນເວລາ 4 ວັນ ໂດຍຈະໄດ້ທາບທາມພະນັກງານນຳພາ-ບັນຊາ ຂັ້ນຄຸ້ມຄອງ ກະຊວງ ປກສ 3 ຮອບ.
ກອງປະຊຸມໄດ້ມີການແຕ່ງຕັ້ງຄະນະຮັບຜິດຊອບຊີ້ນໍາ ແລະ ອະນຸກໍາມະການຊ່ວຍວຽກ ເພື່ອເຮັດໜ້າທີ່ໃນການກະກຽມດ້ານຕ່າງໆທີ່ໄດ້ສົມທົບກັບ ຄະນະຈັດຕັ້ງສູນກາງພັກ ເພື່ອດໍາເນີນໄປຢ່າງຖືກຕ້ອງຕາມທິດ, ຄາດໝາຍ ແລະ ຮັບປະກັນດ້ານເນື້ອໃນທີ່ກໍານົດໃນມະຕິເລກທີ 030, 032 ຂອງກົມການເມືອງສູນກາງພັກ ກໍຄືຄໍາແນະນໍາຂອງຄະນະຈັດຕັ້ງສູນກາງພັກ ເລກທີ 292 ລົງວັນທີ 26 ເມສາ 2018, ເພື່ອຊອກໃຫ້ເຫັນ, ບໍາລຸງສ້າງ, ຈັດວາງ, ສັບຊ້ອນ ແລະ ນໍາໃຊ້ຜູ້ທີ່ມີຄວາມຮູ້-ຄວາມສາມາດ, ຄົບມາດຖານ-ເງື່ອນໄຂ ຢູ່ຕໍາແໜ່ງງານຂັ້ນນໍາພາ-ບັນຊາຕາມເປົ້າໝາຍແຜນໄລຍະຍາວ. ດັ່ງນັ້ນ, ວຽກງານສ້າງແຜນກໍານົດພະນັກງານຈຶ່ງເປັນໜ້າທີ່ຄວາມຮັບຜິດຊອບໂດຍກົງ, ເປັນວຽກປົກກະຕິໃນຊີວິດການເມືອງຂອງ ຄະນະພັກແຕ່ລະຂັ້ນ.
ສາມາດເວົ້າໄດ້ວ່າ: ເປັນວຽກງານພະນັກງານມີບົດບາດສໍາຄັນ ແລະ ເປັນປັດໃຈຕັດສິນໄຊຊະນະ ຫຼື ປະລາໄຊຂອງການຈັດຕັ້ງ ເຊິ່ງລວມໄປເຖິງການຄົງຕົວ ແລະ ຂະຫຍາຍຕົວຂອງ ລະບອບປະຊາທິປະໄຕ ທີ່ ພັກປະຊາຊົນປະຕິວັດລາວ ເປັນຜູ້ຈັດຕັ້ງນໍາພາ ເພື່ອກ້າວສູ່ຈຸດໝາຍສັງຄົມນິຍົມ.
ພົຕ ສົມແກ້ວ ສີລາວົງ
ຫຼັງຈາກນັ້ນ, ກອງປະຊຸມຍັງໄດ້ມີການຜ່ານມະຕິຂອງ ກົມການເມືອງສູນກາງພັກ ສະບັບເລກທີ 032/ກມສພ ລົງວັນທີ 3 ມັງກອນ 2018 ວ່າດ້ວຍ ວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ, ມະຕິຂອງ ກົມການເມືອງສູນກາງພັກ ສະບັບເລກທີ 030/ກມສພ ລົງວັນທີ 03 ມັງກອນ2018 ວ່າດ້ວຍ ມາດຖານຂອງພະນັກງານນໍາພາ-ຄຸ້ມຄອງ, ຜ່ານຄໍາສັ່ງແນະນໍາ ເລກທີ 292/ຄຈສພ ລົງວັນທີ 26 ເມສາ 2018 ວ່າດ້ວຍ ການຈັດຕັ້ງປະຕິບັດມະຕິຂອງ ກົມການເມືອງສູນກາງພັກ ສະບັບເລກທີ 030-032/ກມສພ ແລະ ແນະນໍາວິທີການທາບທາມຕົວຈິງ ພ້ອມທັງໄດ້ມີການປ່ອນບັດໃນການທາບທາມ ຮອບທີ I.
