ກົມເສນາຮັກ ກົມໃຫຍ່ພະລາທິການ ກະຊວງ ປກສ ແຫ່ງ ສປປ ລາວ ແລະ ກົມເສນາຮັກ ກະຊວງຕຳຫຼວດ ແຫ່ງ ສສ ຫວຽດນາມ ໄດ້ຈັດກອງປະຊຸມພົບປະແລກປ່ຽນບົດຮຽນວຽກງານວິຊາສະເພາະດ້ານການແພດ ຮ່ວມກັນ ໃນວັນທີ 13 ພະຈິກ 2018 ທີ່ນະຄອນຫຼວງວຽງຈັນ, ນໍາພາໂດຍ ພັອ ດຣ ນາງ ວິໄລວັນ ດວງສະຫວັນ ຫົວໜ້າກົມເສນາຮັກ ແລະ ພົຈວ ຫງວຽນຄັ້ກທຸຍ ຮອງຫົວໜ້າກົມເສນາຮັກ ພ້ອມດ້ວຍຄະນະຜູ້ແທນທັງສອງຝ່າຍ ເຂົ້າຮ່ວມ.
ການພົບປະຂອງສອງກົມໃນຄັ້ງນີ້ ເພື່ອສືບຕໍ່ຮັດແໜ້ນຄວາມສາມັກຄີລະຫວ່າງ ໂຮງໝໍ 198 ສສ ຫວຽດນາມ ແລະ ໂຮງໝໍ 5 ເມສາ ກະຊວງ ປກສ ໃຫ້ມີຄວາມແໜ້ນແຟ້ນຍິ່ງໆຂຶ້ນ, ພ້ອມທັງແລກປ່ຽນບົດຮຽນທາງການແພດ, ການບໍລິການຄົນເຈັບ ເພື່ອເຮັດໃຫ້ໂຮງໝໍຂອງສອງກະຊວງ ມີປະສິດທິຜົນ ແລະ ມີຄຸນນະພາບ, ສາມາດຮັບປະກັນໄດ້ໃນການປິ່ນປົວສຸຂະພາບຂອງ ພະນັກງານ-ນັກຮົບ ແລະ ປະຊາຊົນຜູ້ທີ່ເຂົ້າມາປິ່ນປົວໃນໂຮງໝໍ ໃຫ້ມີຄວາມເພິ່ງພໍໃຈ. ພ້ອມທັງນໍາເອົາຄວາມເປັນຫ່ວງເປັນໄຍມາສູ່ວົງການແພດ ແລະ ສະແດງໃຫ້ເຫັນເຖິງສາຍພົວພັນ, ມິດຕະພາບ, ຄວາມສາມັກຄີທີ່ໄດ້ຜູກພັນກັນຕະຫຼອດມາ.
ຕະຫຼອດໄລຍະທີ່ຜ່ານມາ, ທັງສອງພາກສ່ວນແມ່ນ ໄດ້ມີສາຍພົວພັນຢ່າງສະໜິດແໜ້ນ ລວມທັງການແລກປ່ຽນບົດຮຽນຊ່ວຍເຫຼືອເຊິ່ງກັນແລະກັນ, ພ້ອມທັງມີຜົນສໍາເລັດໃນຂົງເຂດວຽກງານສາທາລະນະສຸກ ຂອງສອງກໍາລັງ.
ກົມເສນາຮັກ ສປປ ລາວ – ສສ ຫວຽດນາມ
ຈາກນັ້ນ, ຄະນະຜູ້ແທນກົມເສນາຮັກ ສສ ຫວຽດນາມ ເຂົ້າພົບປະກັບ ພັອ ທອງສຸກ ຍ່າເອີ ລາວລີ ຮອງຫົວໜ້າກົມໃຫຍ່ພະລາທິການ, ເຊິ່ງທ່ານໄດ້ສະແດງຄວາມຂອບໃຈຕໍ່ກັບ ຄະນະຜູ້ແທນກົມເສນາຮັກ ກະຊວງຕໍາຫຼວດ ສສ ຫວຽດນາມ ທີ່ໄດ້ນໍາເອົາບົດຮຽນ ແລະ ເຕັກນິກວິຊາການອັນໃໝ່ມາພົບປະແລກປ່ຽນກັບ ຄະນະຜູ້ແທນກົມເສນາຮັກ ກະຊວງປ້ອງກັນຄວາມສະຫງົບ ລາວ ເພື່ອເປັນການພ້ອມກັນເສີມສ້າງພັດທະນາວຽກງານເສນາຮັກ ຂອງສອງກະຊວງ ໃຫ້ປະສົບຜົນສຳເລັດ ແລະ ໄດ້ຮັບໝາກຜົນສູງຂຶ້ນກວ່າເກົ່າ.