ໃນວັນທີ 15 ພະຈິກ 2018, ກະຊວງແຮງງານ ແລະ ສະຫວັດດີການສັງຄົມ ຮ່ວມກັບ ບໍລິສັດ ໄອຈ໋ອບ ໄດ້ຮ່ວມກັນຖະແຫຼງຂ່າວກ່ຽວກັບ ການຈັດງານຕະຫຼາດນັດແຮງງານ ປະຈໍາປີ 2018 ເຊິ່ງຈະເລີ່ມໃນລະຫວ່າງວັນທີ 14-16 ທັນວາ 2018 ທີ່ສູນການຄ້າ ທົ່ງຂັນຄໍາ ເມືອງຈັນທະບູລີ ນະຄອນຫຼວງວຽງຈັນ ເພື່ອເຮັດໃຫ້ຜູ້ທີ່ຕ້ອງການຊອກວຽກເຮັດງານທໍາ ເປັນຕົ້ນແມ່ນ ນັກຮຽນ-ນັກສຶກສາທີ່ຈົບໃໝ່ ຍັງບໍ່ທັນມີວຽກເຮັດສາມາດເຂົ້າໄປທ່ຽວຊົມ ແລະ ສະໝັກວຽກໄດ້ຕາມໃຈມັກ ເນື່ອງຈາກມີຫຼາຍພາກສ່ວນ ເຂົ້າຮ່ວມ.
ທ່ານ ດຣ ຄໍາແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ກ່າວວ່າ:
ການຈັດງານນັດພົບແຮງງານໃນປີນີ້ ຈະໄດ້ມີການຕັ້ງບູດຂອງຫົວໜ່ວຍທຸລະກິດ, ຫົວໜ່ວຍການຜະລິດ, ການບໍລິການ ແລະ ບໍລິສັດບໍລິການຈັດຫາງານ ເພື່ອໃຫ້ຄຳແນະນຳຂັ້ນຕອນຂອງການສະໝັກງານ, ການຂຶ້ນທະບຽນ, ການສຳພາດ ແລະ ການເຮັດສັນຍາແຮງງານ.
ທ່ານ ດຣ ຄໍາແພງ ໄຊສົມແພງ
ໃນນັ້ນ, ຈະມີບັນດາສູນຝຶກ ແລະ ວິທະຍາໄລຕ່າງໆ ທີ່ຈະມາສະແດງກິດຈະກຳການຝຶກ, ການໃຫ້ຄຳແນະນຳດ້ານອາຊີບ, ການຂຶ້ນທະບຽນການຝຶກ ແລະ ຈະມີການວາງສະແດງສິນຄ້າຫັດຖະກຳ, ຜະລິດຕະພັນກະສິກຳ, ຜະລິດຕະພັນພູມປັນຍາຂອງຊາວບ້ານ ແລະອື່ນໆ. ນອກຈາກນັ້ນ, ຍັງຈະມີບູດຂອງຈຸດບໍລິການຈັດຫາງານ ຈໍານວນ 9 ແຂວງ ເພື່ອອໍານວຍຄວາມສະດວກໃຫ້ຄໍາປຶກສາໃຫ້ທັງຜູ້ຊອກວຽກເຮັດງານທໍາ ແລະ ຜູ້ໃຊ້ແຮງງານກ່ຽວກັບ ການຂຶ້ນທະບຽນ ແລະ ການນໍາໃຊ້ເວັບໄຊບໍລິການຈັດຫາງານສາທາລະນະຊົນ. ເຊິ່ງບັນດາບໍລິສັດ, ຫົວໜ່ວຍແຮງງານ ແລະ ໂຄງການລົງທຶນຕ່າງໆ ແມ່ນມີຄວາມຕ້ອງການແຮງງານເພື່ອບັນຈຸເຂົ້າຕຳແໜ່ງວ່າງເຖິງ 2.000 ກວ່າຕໍາແໜ່ງ.
ດັ່ງນັ້ນ, ຈຶ່ງຂໍຖືໂອກາດເຊີນຊວນອົງການຈັດຕັ້ງຕ່າງໆ ທັງພາກລັດ ແລະ ເອກະຊົນທັງພາຍໃນ ແລະ ຕ່າງປະເທດ, ຫົວໜ່ວຍແຮງງານ, ໂຄງການລົງທຶນ, ຊາວໜຸ່ມ, ນັກຮຽນຮູ້ນັກສຶກສາ, ປັນຍາຊົນ, ສື່ມວນຊົນ ລວມເຖິງ ພໍ່ຄ້າຊາວຂາຍຕ່າງໆ ແລະ ປະຊາຊົນລາວທຸກທົ່ວໜ້າ ເຂົ້າຮ່ວມງານຕະຫຼາດນັດແຮງງານໃນຄັ້ງນີ້ ເພື່ອເປັນການປະກອບສ່ວນອັນສຳຄັນໃນການສົ່ງເສີມການມີວຽກເຮັດງານທຳ, ຫຼຸດຜ່ອນການວ່າງງານ ແລະ ເປັນຂົວຕໍ່ທີ່ເຊື່ອມຈອດກັນລະຫວ່າງ ຜູ້ໃຊ້ແຮງງານ ແລະ ຜູ້ອອກແຮງງານ ອີກດ້ວຍ.
