ກອງປະຊຸມສະໄໝສາມັນ ເທື່ອທີ 6 ຂອງ ສະພາແຫ່ງຊາດ ຊຸດທີ VIII ໄດ້ເປີດຂຶ້ນຢ່າງເປັນທາງການ ໃນວັນທີ 20 ພະຈິກ – 21 ທັນວາ 2018, ໂດຍມີ ທ່ານ ບຸນຍັງ ວໍລະຈິດ ປະທານປະເທດ ນາຍົກ-ຮອງນາຍົກລັດຖະມົນຕີ ລັດຖະມົນຕີ-ຮອງລັດຖະມົນຕີ, ເຈົ້າແຂວງ-ຮອງເຈົ້າແຂວງ, ອະດີດການນໍາພັກ-ລັດ, ພະນັກງານອາວຸໂສບໍານານ, ສະມາຊິກສະພາແຫ່ງຊາດ, ຕາງໜ້າຈາກກະຊວງ-ອົງການ ແລະ ພະນັກງານກ່ຽວຂ້ອງ ເຂົ້າຮ່ວມ.
ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ທັງເປັນປະທານກອງປະຊຸມ ຂຶ້ນກ່າວໄຂກອງປະຊຸມ ວ່າ:
ກອງປະຊຸມສະໄໝສາມັນ ເທື່ອທີ 6 ຂອງ ສະພາແຫ່ງຊາດ ຊຸດທີ VIII ໄຂຂຶ້ນເພື່ອຈັດຕັ້ງປະຕິບັດພາລະໜ້າທີ່ຂອງ ສະພາແຫ່ງຊາດ ໃນຖານະທີ່ເປັນອົງການຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນລາວບັນດາເຜົ່າ, ເປັນອົງການສູງສຸດແຫ່ງອໍານາດລັດ, ເປັນອົງການນິຕິບັນຍັດຕາມທີ່ໄດ້ກໍານົດໄວ້ໃນ ລັດຖະທໍາມະນູນ ແລະ ກົດໝາຍ; ເຊິ່ງກອງປະຊຸມຄັ້ງນີ້ ຈະໄດ້ຮັບຟັງການລາຍງານຂອງ ທ່ານນາຍົກລັດຖະມົນຕີ ກ່ຽວກັບ ການຈັດຕັ້ງປະຕິບັດວຽກງານທີ່ພົ້ນເດັ່ນ ປະຈໍາປີ 2018 ແລະ ທິດທາງແຜນການວຽກງານຈຸດສຸມ ປີ 2019 ຂອງລັດຖະບານ, ຮັບຟັງການລາຍງານຂອງ ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ກ່ຽວກັບ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ປະຈໍາປີ 2018 ແລະ ທິດທາງແຜນການ ປະຈໍາປີ 2019, ຮັບຟັງການລາຍງານຂອງອົງການກວດສອບແຫ່ງລັດ ກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2018 ແລະ ແຜນການທິດທາງປະຈໍາປີ 2019, ບົດລາຍງານອົງການກວດສອບແຫ່ງລັດ ຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2017, ຮັບຟັງການລາຍງານຂອງ ອົງການກວດກາລັດຖະບານ ກ່ຽວກັບ ການກວດກາຕາມຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016 ແລະ ຮັບຟັງການປະກອບຄໍາເຫັນຂອງຕາງໜ້າຄະນະປະຈໍາສະພາແຫ່ງຊາດ ຕໍ່ບົດລາຍງານຂອງ ທ່ານນາຍົກລັດຖະມົນຕີ ກ່ຽວກັບ ການຈັດຕັ້ງປະຕິບັດວຽກງານທີ່ພົ້ນເດັ່ນ ປະຈໍາປີ 2018 ແລະ ທິດທາງແຜນການ ປະຈໍາປີ 2019, ສະພາບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ, ແຜນງົບປະມານແຫ່ງລັດ ແລະ ແຜນເງິນຕາ ປະຈໍາປີ 2018 ແລະ ທິດທາງແຜນການ ປະຈໍາປີ 2019 ແລະ ພິຈາລະນາ, ຮັບຮອງເອົາການແຕ່ງຕັ້ງຜູ້ວ່າທະນາຄານແຫ່ງ ສປປ ລາວ.
ນອກຈາກນີ້, ກອງປະຊຸມ ຍັງຈະໄດ້ຮັບຟັງການລາຍງານ ຕໍ່ຜົນການຈັດຕັ້ງປະຕິບັດເຄື່ອນໄຫວວຽກງານທີ່ພົ້ນເດັ່ນ ປະຈໍາປີ 2018 ແລະ ວາງທິດທາງແຜນການ ປະຈໍາປີ 2019 ຂອງບັນດາອົງການ, ກະຊວງ, ແຂວງ, ພ້ອມທັງຄົ້ນຄວ້າພິຈາລະນາກົດໝາຍສະປັບປຸງ ແລະ ສ້າງໃໝ່ທັງໝົດ 8 ສະບັບ. ໃນນີ້, ກົດໝາຍສ້າງໃໝ່ມີສະເພາະກົດໝາຍ ວ່າດ້ວຍ ຄົນພິການ, ກົດໝາຍ ວ່າດ້ວຍ ຄວາມປອດໄພຈາກລັງສີ, ກົດໝາຍ ວ່າດ້ວຍ ລາຍເຊັນເອເລັກໂຕຣນິກ, ກົດໝາຍ ວ່າດ້ວຍ ການປະກັນສຸຂະພາບ, ກົດໝາຍ ວ່າດ້ວຍ ການລົດໄຟ, ກົດໝາຍ ວ່າດ້ວຍ ສໍານັກງານຜູ້ຕາງໜ້າ ສປປ ລາວ ປະຈໍາຢູ່ຕ່າງປະເທດ ແລະ ກົດໝາຍ ວ່າດ້ວຍ ທີ່ດິນ.