ຂ່າວຕ່າງປະເທດລາຍງານ ໃນວັນທີ 6 ທັນວາ ນີ້ວ່າ: ລັດຖະບານມຽນມາ ນຳໂດຍທ່ານ ນາງ ອອງຊານ ຊູຈີ ອອກຖະແຫຼງປິດຄ້າຍຜູ້ອົບພະຍົບຊາວໂຣຮີງຢາຫຼາຍແຫ່ງ ຫຼັງຈາກຊາວໂຣຮີງຢາ ແລະ ຜູ້ໄຮ້ທີ່ຢູ່ເກືອບ 130.000 ຄົນ ອາໄສຢູ່ຮ່ວມກັນຢ່າງແອອັດໃນລັດຍະໄຂ່ທາງພາກຕາເວັນຕົກຂອງມຽນມາ ຕັ້ງແຕ່ກໍ່ເຫດຄວາມຂັດແຍ້ງ 6 ປີ ກ່ອນ.
ຕາມແຜນການທີ່ແຈ້ງໄວ້ວ່າ: ຜູ້ໄຮ້ທີ່ຢູ່ອາໃສຈະໄດ້ຮັບໂຍກຍ້າຍໄປຫາທີ່ພັກຖາວອນ ເພື່ອປັບປຸງສະພາບພື້ນທີ່ບໍລິເວນຄ້າຍຜູ້ອົບພະຍົບ. ແຕ່ຜູ້ແທນສະຫະປະຊາຊາດໃນມຽນມາ ກ່າວເຕືອນໃນເດືອນກັນຍາ ທີ່ຜ່າຍນມາວ່າ ການປິດຄ້າຍພັກຈະເຮັດໃຫ້ຜູ້ອົບພະຍົບຫຼາຍແຫ່ງສ່ຽງຕໍ່ການແບ່ງແຍກເຊື້ອຊາດຫຼາຍຂຶ້ນ ແລະ ຂັດກັບສິດທິມະນຸດຂັ້ນພື້ນຖານ. ນອກຈາກນີ້, ຍັງເຮັດໃຫ້ປະຊາຊົນຈຳນວນຫຼວງຫຼາຍຕ້ອງສ່ຽງອົບພະຍົບໜີໄປເສັ້ນທາງທີ່ອັນຕະລາຍ; ເຊິ່ງໃນວັນທີ 4 ທັນວາ ທີ່ຜ່ານມາ, ມີເຮືອຊາວຜູ້ອົບພະຍົບຊາຍ ຈຳນວນ 20 ຄົນ ທີ່ຄາດວ່າເປັນຊາວມຸດສະລິມໂຣຮີງຢາ ໄປຈອດເຮືອທຽບທ່າທີ່ເກາະສຸມາຕຣາຂອງອິນໂດເນເຊຍ, ເຊິ່ງເປັນເຮືອທີ່ແລ່ນອອກມາຈາກປະເທດມຽນມາ ແລະ ບັງກລາເທດ ໃນອາທິດຜ່ານມາ.
ໂຄສົກສຳນັກງານປະສານງານດ້ານມະນຸດສະທຳຂອງສະຫະປະຊາຊາດໃນມຽນມາ ຖະແຫຼງການວ່າ ລັດຖະບານມຽນມາ ຄວນມຸ່ງເນັ້ນການໃຫ້ປະຊາຊົນກັບສູ່ເຮືອນຢ່າງປອດໄພ ກ່ອນປິດຄ້າຍຜູ້ອົບພະຍົບ.