ໃນວັນທີ 9 ມັງກອນ 2019, ກະຊວງ ປກສ ໄດ້ປະກາດເລື່ອນຊັ້ນ ພັນໂທ ຂຶ້ນ ພັນເອກ ໃຫ້ນາຍຕໍາຫຼວດຈໍານວນ 11 ສະຫາຍ ທີ່ມີຜົນງານດີເດັ່ນ ແລະ ຄົບມາດຖານເງື່ອນການເລື່ອນຊັ້ນຕາມກົດໝາຍ.
ໃຫ້ກຽດປະດັບຊັ້ນຄັ້ງນີ້ ໂດຍ ພົທ ວິໄລ ຫຼ້າຄໍາຟອງ ລັດຖະມົນຕີກະຊວງ ປກສ, ມີຄະນະລັດຖະມົນຕີ, ຫົວໜ້າ-ຮອງກົມໃຫຍ່, ກອງບັນຊາການ, ວິທະຍາຄານ, ກົມກອງອ້ອມຂ້າງກະຊວງ ແລະ ກອງບັນຊາການ ປກສ ແຂວງ ເຂົ້າຮ່ວມ.
ນາຍຕໍຫຼວດທີ່ໄດ້ຮັບການເລື່ອນຊັ້ນຄັ້ງນີ້ ປະກອບມີ:
- ພັທ ທອງສະຫວັນ ເຮືອງພົມມີ ກອງບັນຊາການ ປກສ ແຂວງວຽງຈັນ,
- ພັທ ວັນໄຊ ສີໄຊຍະລາດ ກອງບັນຊາການ ປກສ ແຂວງສະຫວັນນະເຂດ,
- ພັທ ບົວພັນ ອິນປັນຍາ ກອງບັນຊາການ ປກສ ແຂວງໄຊສົມບູນ,
- ພັທ ພິມມະສອນ ທໍາມະວົງ ກົມໃຫຍ່ການເມືອງ ປກສ,
- ພັທ ພອນໄຊ ຍົດສົມບັດ ຫ້ອງວ່າການກະຊວງ ປກສ,
- ພັທ ໜູຈອນ ກ້ອນທອງດໍາ ກົມໃຫຍ່ພາລາທິການ,
- ພັທ ຄິດທະວົງ ສຸລິຍາ ກົມໃຫຍ່ສັນຕິບານ,
- ພັທ ຄໍາແຝງ ວັນດີໄຊ ກົມໃຫຍ່ຕໍາຫຼວດ,
- ພັທ ຫຸມພັນ ເພັດບຸນມີ ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ,
- ພັທ ບຸນລຽນ ສະອາດສີ ກົມກວດກາ-ກວດການ,
- ພັທ ບັນເທົາ ພິມພິສານ ກົມຄົ້ນຄວ້າວິທະຍາສາດ ແລະ ປະຫວັດສາດ.
ໃນໂອກາດນີ້, ພົທ ວິໄລ ຫຼ້າຄໍາຟອງ ໄດ້ໂອລົມຕໍ່ນາຍຕໍາຫຼວດທີ່ໄດ້ຮັບການເລື່ອນຊັ້ນ ເຊິ່ງໄດ້ຊີ້ນໍາໃຫ້ທຸກສະຫາຍຕ້ອງເອົາໃຈໃສ່ເພີ່ມຄວາມຮັບຜິດຊອບຕໍ່ໜ້າທີ່ການເມືອງຂອງຕົນຢ່າງສູງ, ເປັນພະນັກງານການນໍາ ທີ່ສາມາດນໍາພາ-ບັນຊາທີ່ເຂັ້ມແຂງ, ມີແບບແຜນ, ແກ້ໄຂວຽກງານສະເພາະໜ້າ ແລະ ຍາວນານ ໃຫ້ມີຜົນສໍາເລັດຢ່າງເດັດດຽວ, ເປັນທໍາ, ແກ້ໄຂໃຫ້ໄດ້ທຸກວຽກງານຢ່າງມີປະສິດທິພາບສູງ.
