ແຂວງຜົ້ງສາລີ ຈັດພິທີສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ໃນຕອນເຊົ້າ ວັນທີ 16 ມັງກອນ 2019 ທີ່ສະໜາມກິລາເທດສະບານ ໂດຍການເຂົ້າຮ່ວມຂອງ ທ່ານ ຄຳເຈນ ວົງໂພສີ ເຈົ້າແຂວງໆຜົ້ງສາລີ ມີບັນດາການນຳພັກ-ລັດແຂວງ, ພະນັກງານອາວຸໂສບໍານານ, ນາຍ ແລະ ພົນທະຫານ, ນາຍ ແລະ ພົນຕຳຫຼວດ, ພະນັກງານລັດຖະກອນ ແລະ ມວນຊົນຊາວແຂວງຜົ້ງສາລີເຂົ້າຮ່ວມ.
ໃນພິທີ, ມີການເດີນສວນສະໜາມໃນນີ້, ມີກ້ອນກຳລັງຂອງກຳລັງປ້ອງກັນຊາດຊາຍ, ກ້ອນກຳລັງປ້ອງກັນຊາດຍິງ, ກ້ອນກຳລັງນາຍສີບປ້ອງກັນຊາດຊາຍ, ກ້ອນກຳລັງປ້ອງກັນຄວາມສະຫງົບຍິງ, ກ້ອນກຳລັງປ້ອງກັນຄວາມສະຫງົບຊາຍ, ກ້ອນກຳລັງກອງຫຼອນ, ກ້ອນກຳລັງບັນດາເຜົ່າ, ກ້ອນກຳລັງເຍົາວະຊົນ, ກ້ອນກຳລັງອົງການຈັດຕັ້ງມະຫາຊົນ, ກ້ອນກຳລັງກິລາມວຍປ້ອງກັນຕົວປ້ອງກັນຊາດ, ກ້ອນກຳລັງກິລາມວຍປ້ອງກັນຕົວກຳລັງປ້ອງກັນຄວາມສະຫງົບ.
ໃນໂອກາດນີ້, ທ່ານ ຄຳເຈນ ວົງໂພສີ ໄດ້ກ່າວໃນພິທີວ່າ:
ເມື່ອຫວນຄືນກ່ອນໜ້ານີ້ 70 ປີ ຄືວັນທີ 20 ມັງກອນ 1949 ກອງ ລາດສະວົງເຊິ່ງເປັນຕົ້ນກຳເນີດຂອງກອງທັບປະຊາຊົນລາວ ໃນປັດຈຸບັນໄດ້ຮັບການສ້າງຕັ້ງຂຶ້ນຢູ່ເຂດທີ່ໝັ້ນແຂວງຫົວພັນ ໂດຍແມ່ນປະທານ ໄກສອນ ພົມວິຫານ ເປັນຜູ້ນຳພາກໍ່ຕັ້ງ ແລະ ຊີ້ນຳບັນຊາໂດຍກົງ, ພາຍຫຼັງສ້າງຕັ້ງຂຶ້ນກໍປະເຊີນໜ້າກັບການຕໍ່ສູ້ປົດປ່ອຍຊາດຈາກຜູ້ຮຸກຮານກໍຄື: ຈັກກະພັດລ່າເມືອງຂຶ້ນແບບເກົ່າ ແລະ ໃໝ່ ກອງທັບລາວໄດ້ສູ້ຮົບຢ່າງມີໄຊ ແລະ ການເຕີບໃຫຍ່ຂະຫຍາຍຕົວນັບແຕ່ມື້ສ້າງຕັ້ງຈົນຮອດປັດຈຸບັນ ພາຍໃຕ້ການນຳພາອັນປີຊາສາມາດສະຫຼາດສ່ອງໃສຂອງພັກປະຊາຊົນ ປະຕິວັດລາວ.
ກອງທັບປະຊາຊົນລາວ ໄດ້ຜ່ານຜ່າອຸປະສັກນາໆປະການ, ບໍ່ຈັກວ່າເທົ່າໃດ ແລະ ເຕັມໄປດ້ວຍການເສຍສະຫຼະອັນໃຫຍ່ຫຼວງໃນພາລະກິດຕໍ່ສູ້ປົດປ່ອຍຊາດ, ເຮັດສໍາເລັດພາລະກໍາປະຫວັດສາດທີ່ພັກ ແລະ ປະຊາຊົນມອບໝາຍໃຫ້ຢ່າງມີໄຊ, ສາມາດຕີເອົາຊະນະຈັກກະພັດລ່າເມືອງຂຶ້ນຝຣັ່ງ, ຈັກກະພັດອາເມລິກາ ແລະ ລູກ ແຫ່ຼງຕີນມືຂອງພວກເຂົາສາມາດປົດປ່ອຍປະເທດຊາດ ໄດ້ຢ່າງສົມບູນ ແລະ ສະຖາປະນາເປັນປະເທດ ສປປ ລາວ ໃນວັນທີ 2 ທັນວາ 1975 ຢ່າງສະຫງ່າງາມ.
ສໍາລັບ ແຂວງຜົ້ງສາລີ ແມ່ນໄດ້ຕິດພັນຢ່າງສະໜິດແໜ້ນກັບການປະຕິວັດຊາດ ເປັນກຳລັງປະກອບອາວຸດທ້ອງຖິ່ນ ແລະ ປະຊາຊົນບັນດາເຜົ່າ ແຂວງຜົ້ງສາລີ ໄດ້ຕໍ່່ສູ້ຢ່າງພິລະອາດຫານ ຈົນປະກາດເປັນແຂວງເຕົ້້າໂຮມ ແລະ ກາຍເປັນແຂວງວິລະຊົນທີ່ຕໍ່ສູ້ກັບສັດຕູຜູ້ຮຸກຮານ ຈົນໄດ້ຮັບໄຊຊະນະເປັນກ້າວໆມາ.
ໂອກາດນີ້ ຜູ້ເຂົ້າຮ່ວມຍັງໄດ້ ຊົມການສະແດງກິລາມວຍຂອງກຳລັງປ້ອງກັນຕົວປ້ອງກັນຊາດ, ກິລາມວຍປ້ອງກັນຕົວກຳລັງປ້ອງກັນຄວາມສະຫງົບ ແລະ ຊົມການວາງສະແດງຮູບພາບມູນເຊື້ອ ຂອງກອງບັນຊາການທະຫານ ແຂວງຜົ້ງສາລີ, ທ່ຽວຊົມຕະຫຼາດນັດ ທີ່ວາງສະແດງສິນຄ້າໂອດ໊ອບຂອງແຂວງ ແລະ ສິນຄ້າອື່ນໆອີກ.
