ກະຊວງສາທາລະນະສຸກຈັດກອງປະຊຸມເຜີຍແຜ່ກົດໝາຍວ່າດ້ວຍ ການໃຫ້ວັກຊີນກັນພະຍາດໃຫ້ 5 ແຂວງພາກເໜືອ ໃນວັນທີ 21 ມັງກອນ 2019 ຢູ່ທີ່ແຂວງຫຼວງພະບາງ ໂດຍການເຂົ້າຮ່ວມເປັນປະທານຂອງທ່ານ ຮສ ດຣ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ, ມີທ່ານ ວົງສະຫວັນ ເທບພະຈັນ ຮອງເຈົ້າ ແຂວງໆຫຼວງພະບາງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ; ເຊິ່ງມາຈາກແຂວງຫຼວງພະບາງ, ຫຼວງນໍ້າທາ, ບໍ່ແກ້ວ, ອຸດົມໄຊ, ໄຊຍະບູລີ ແລະ ແຂວງຜົ້ງສາລີ.
ກົດໝາຍວ່າດ້ວຍ ການໃຫ້ວັກຊີນກັນພະຍາດປະກາດໃຊ້ຢ່າງເປັນທາງການ ໃນເດືອນສິງຫາ 2018 ມີທັງໝົດ 13 ພາກ 96 ມາດຕາ ໂດຍໄດ້ກໍານົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ຕິດຕາມ ແລະ ການເຄື່ອນໄຫວວັກຊີນກັນພະຍາດ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງໃຫ້ທົ່ວ ເຖິງ.
ທ່ານ ປອ ດຣ ບຸນເພັງ ພິລາວົງ ຫົວໜ້າກົມອະນາໄມ ແລະ ສົ່ງເສີມສຸຂະພາບກ່າວວ່າ:
ປັດຈຸບັນ ສປປ ລາວ ມີວັກຊີນກັນພະຍາດສໍາລັບເດັກທັງໝົດ 11 ຊະນິດ ແລະ ຄາດວ່າຈະນຳເອົາວັກຊີນໃໝ່ມານໍາໃຊ້ອີກຈໍານວນ 2 ຊະນິດຄື: ວັກຊີນກັນພະຍາດມະເຮັງປາກມົດລູກ ແລະ ວັກຊີນປ້ອງກັນພະຍາດຖອກທ້ອງ.
ວັກຊີນກັນພະຍາດ ແມ່ນເຕັກໂນໂລຊີທາງຊີວະວິທະຍາປະເພດໜຶ່ງທີ່ມີປະສິດທິພາບໃນການປ້ອງກັນເດັກນ້ອຍບໍ່ໃຫ້ເຈັບໄຂ້ໄດ້ປ່ວຍ ດ້ວຍການກະຕຸ້ນໃຫ້ຮ່າງກາຍສ້າງພູມຄຸ້ມກັນອັນແຂງແກ່ນ ແລະ ຄົງທານ ” ການທີ່ເດັກໄດ້ຮັບວັກຊີນມັນ ແມ່ນສິດທິມະນຸດພື້ນຖານເພື່ອຄວາມຢູ່ລອດ, ການເຕີບໂຕພັດທະນາຮ່າງກາຍ ແລະ ມັນສະໝອງ ເພື່ອກາຍເປັນບຸກ ຄະລາກອນທີ່ມີຄຸນນະພາບຂອງປະເທດຊາດໃນອະນາຄົດ ”.
ໂອກາດດຽວກັນ, ທ່ານລັດຖະມົນຕີກະຊວງສາທາລະນະສຸກ ຍັງໄດ້ເນັ້ນໃຫ້ພາກສ່ວນທີ່ກ່ຽວຂ້ອງ ເອົາໃຈໃສ່ສືບຕໍ່ຂະຫຍາຍ ແລະ ລົງເຄື່ອນໄຫວ, ຕິດຕາມການໃຫ້ວັກຊີນກັນພະຍາດໃນເຂດຫ່າງໄກສອກຫຼີກ ຫຼື ເຂດຊົນນະບົດ ເພື່ອເປັນການຫຼຸດຜ່ອນການເຈັບເປັນ, ການເສຍຊີວິດຂອງແມ່ຍິງ ແລະ ເດັກນ້ອຍ ໃນຂອບເຂດ ທົ່ວປະເທດ ພ້ອມທັງເຮັດໃຫ້ພົນລະເມືອງລາວທຸກຄົນມີສຸຂະພາບດີ, ບັນລຸເປົ້າໝາຍສະຫັດສະວັດດ້ານການພັດທະນາທີ່ຍືນຍົງ; ນໍາເອົາປະເທດຊາດຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2020 ອີກດ້ວຍ.
