ສານປະຊາຊົນສູງສຸດ ( ສປສສ ) ໄດ້ວາງຄາດໝາຍສູ້ຊົນ ໃນການເອົາໃຈໃສ່ພິຈາລະນາແກ້ໄຂຄະດີ ໃຫ້ມີຄວາມວ່ອງໄວບັນລຸ 85% ຕໍ່ປີ ແລະ ຮັບປະກັນການຕັດສິນຄະດີ ມີຄຸນນະພາບ, ອັດຕາມການຂໍອຸທອນ ຢູ່ໃນລະດັບ 15% ແລະ ການຂໍລົບລ້າງໃຫ້ຫຼຸດລົງ ເມື່ອທຽບໃສ່ປີຜ່ານມາ.
ກອງປະຊຸມສະຫຼຸບການເຄື່ອນໄຫວວຽກງານ ປີ 2018 ແລະ ທິດທາງແຜນການ ປີ 2019 ຂອງ ສານປະຊາຊົນ ເພື່ອຍົກສູງປະສິດທິພາບ ໃນການຄຸ້ມຄອງບໍລິຫານສານ ບໍລິຫານຄະດີ ໃຫ້ມີຄຸນນະພາບ ແລະ ມີປະສິດທິພາບສູງ ທີ່ຈັດຂຶ້ນໃນວັນທີ 14-15 ກຸມພາ 2019 ເປັນປະທານໂດຍ ທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດ, ມີບັນດາຜູ້ແທນຈາກ ສານປະຊາຊົນສູງສຸດ, ສານປະຊາຊົນ ໃນນະຄອນຫຼວງວຽງຈັນ, ສານປະຊາຊົນພາກເໜືອ-ພາກໃຕ້ ແລະ ສານປະຊາຊົນແຂວງ ເຂົ້າຮ່ວມ.
ເຊິ່ງໃນກອງປະຊຸມດັ່ງກ່າວ, ທ່ານ ຄໍາພາ ແສງດາຣາ ຮອງປະທານສານປະຊາຊົນສູງສຸດ ໄດ້ຂຶ້ນຜ່ານບົດສະຫຼຸບ ໃຫ້ຮູ້ວ່າ:
ເພື່ອບັນລຸຄາດໝາຍດັ່ງກ່າວ, ສານປະຊາຊົນສູງສຸດ ຈະສຸມໃສ່ຊຸກຍູ້ໃຫ້ສານແຕ່ລະຂັ້ນ ສືບຕໍ່ສຶກສາອົບຮົມການເມືອງ-ແນວຄິດໃຫ້ ຜູ້ພິພາກສາ ແລະ ພະນັກງານຂອງສານ ມີຄຸນທາດການເມືອງໜັກແໜ້ນ, ມີຈັນຍາບັນ-ຈັນຍາທຳ, ນ້ຳໃຈຮັກຊາດ, ຮັບໃຊ້ປະຊາຊົນ, ມີສະຕິເຄົາລົບປະຕິບັດກົດໝາຍຢ່າງເຂັ້ມງວດ ຕິດພັນກັບ ການຕິດຕາມກວດກາ-ປະເມີນ ຜູ້ພິພາກສາ ດີ-ເກັ່ງ ໃຫ້ໄດ້ຕາມມາດຕະຖານ-ເງື່ອນໄຂທີ່ວາງໄວ້.
ຄຽງຄູ່ກັບ ການສຸມໃສ່ຍົກສູງປະສິດທິພາບການດຳເນີນຄະດີຢູ່ສານຂັ້ນຕົ້ນ ແລະ ຂັ້ນອຸທອນ ໃນບາງດ້ານ ເຊັ່ນ:
ຈັດຕັ້ງປະຕິບັດການຕັດສິນດ້ວຍ ຜູ້ພິພາກສາຜູ້ດຽວ ຢູ່ສານປະຊາຊົນຂັ້ນຕົ້ນ ໃຫ້ໄດ້ຮັບຜົນດີ, ແກ້ໄຂບັນຫາຜູ້ພິພາກສາບໍ່ພຽງພໍ ແລະ ການຕັດສິນຄະດີຊັກຊ້າ ພ້ອມທັງສ້າງຄວາມເຊື່ອໝັ້ນ, ເຊື່ອຖືຂອງປະຊາຊົນຕໍ່ການດຳເນີນຄະດີຢູ່ສານຂັ້ນຕົ້ນ, ມີກົນໄກສົ່ງເສີມໃຫ້ຄູ່ຄວາມ, ປະຊາຊົນ, ຂະແໜງການກ່ຽວຂ້ອງກັບການດຳເນີນຄະດີ ມີສ່ວນຮ່ວມໃນການປະກອບ, ສະໜອງຂໍ້ມູນຫຼັ້ກຖານໃຫ້ແກ່ສານ ແລະ ຄູ່ຄວາມ, ປະຊາຊົນ ຕິດຕາມກວດກາການດຳເນີນຄະດີຂອງ ຜູ້ພິພາກສາ ຢ່າງເຂັ້ມງວດ.
ປີ 2018 ຜ່ານມາ, ການຈັດຕັ້ງປະຕິບັດ ເຮັດໃຫ້ການພິຈາລະນາແກ້ໄຂຄະດີຂອງສານ ແຕ່ລະຂັ້ນ ມີຄວາມວ່ອງໄວ ແລະ ມີຄຸນນະພາບດີຂຶ້ນ ເຊິ່ງໃນນີ້ ມີ:
- ການຕັດສິນຄະຂອງສານຂັ້ນຕົ້ນໄດ້ 90,41% ( ແຜນການກຳນົດໄວ້ 85% ລື່ນ 5,41% ), ຄູ່ຄວາມບໍ່ພໍໃຈຂໍອຸທອນ ກວມເອົາ 14,31% ( ແຜນການນຳນົດໄວ້ 15% ລື່ນ 0,69% );
- ສານຂັ້ນອຸທອນພິພາກສາຄະດີ ໄດ້ 86,86% ( ແຜນການກຳນົດໄວ້ 85% ລື່ນ 1,86% ), ຄູ່ຄວາມບໍ່ພໍໃຈຂໍລົບລ້າງ 42,73% ( ຫຼຸດລົງ ຖ້າທຽບໃສ່ປີຜ່ານມາ ແມ່ນ 52,20% );
- ສານປະຊາຊົນສູງສຸດ ພິພາກສາຄະດີໄດ້ 88,09% ( ແຜນການກຳນົດໄວ້ 85% ລື່ນ 3,09% ), ຄະດີຂັ້ນຂັ້ນຮື້ຟື້ນ 68 ເລື່ອງ ກວມເອົາ 0,3% ຂອງຄະດີທີ່ສານຕັດສິນໃຊ້ໄດ້ເດັດຂາດ 18,917 ເລື່ອງ ( ຫຼຸດລົງ ຖ້າທຽບໃສ່ແຜນການກຳນົດໄວ້ 0,5% ).
ນອກນັ້ນ, ກໍໄດ້ຄົ້ນຄວ້າອອກຄໍາຊີ້ຂາດກ່ຽວກັບ ໂທດປະຫານຊີວິດ 50 ເລື່ອງ ແລະ ຄຳຊີ້ຂາດກ່ຽວກັບ ສິດອຳນາດສານ 6 ເລື່ອງ.