ວັນທີ 14 ກຸມພາ 2019, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ kim Hojlund Christensen ເອກອັກຄະລັດຖະທູດດານມາກ ປະຈໍາ ສປປ ລາວ ພ້ອມຄະນະ ເພື່ອປຶກສາຫາລືກ່ຽວກັບການສົ່ງເສີມດ້ານການຄ້າ ແລະ ການລົງທຶນລະຫວ່າງນັກລົງທຶນຂອງປະເທດລາວ ແລະ ດານມາກ ໂດຍສະເພາະແມ່ນຕ້ອງການຮັບຮູ້ຂໍ້ມູນພື້ນຖານໃນການເລີ່ມຕົ້ນການລົງທຶນຢູ່ ສປປ ລາວ.
ໂອກາດນີ້, ທ່ານ ສອນໄຊ ສີພັນດອນ ໄດ້ສະແດງຄວາມຕ້ອນຮັບຢ່າງອົບອຸ່ນ ແລະ ສະແດງຄວາມຊົມເຊີຍຕໍ່ເອກອັກຄະລັດຖະທູດດານມາກ ທີ່ຍາມໃດກໍເຫັນໄດ້ຄວາມສໍາ ຄັນຂອງວຽກງານການລົງທຶນຂອງສອງປະເທດ ອັນໄດ້ສ້າງເງື່ອນໄຂປະກອບສ່ວນໃນການສ້າງວຽກເຮັດງານທໍາໃຫ້ປະຊາຊົນລາວຫຼາຍຂຶ້ນ ເປັນຕົ້ນແມ່ນ: ບໍລິສັດເບຍ ຄາດສະເບີກ ທີ່ມາລົງທຶນຢູ່ ສປປ ລາວ ເຊິ່ງສ້າງໃຫ້ ສປປ ລາວ ມີການສົ່ງອອກສິນຄ້າເພີ່ມຂຶ້ນອີກ.
ທ່ານ kim Hojlund Christensen ໄດ້ລາຍງານກ່ຽວກັບການລົງທຶນ ລະຫວ່າງນັກລົງທຶນ ຂອງປະເທດລາວ ແລະ ດານມາກ ໃນໄລຍະຜ່ານມາ ໃຫ້ທ່ານຮອງນາຍົກລັດຖະມົນຕີຮັບຮູ້ ແລະ ສະແດງຄວາມຊົມເຊີຍຕໍ່ ສປປ ລາວ ທີ່ເອົາໃຈໃສ່ໃນການຮ່ວມລົງທຶນນໍາກັນຕະຫຼອດມາ ແລະ ຫວັງຢ່າງຍິ່ງວ່າຈະໄດ້ຮັບການຮ່ວມມືກັນຕະຫຼອດໄປ. ທັງນີ້ກໍເພື່ອເຮັດໃຫ້ການລົງທຶນລະຫວ່າງສອງປະເທດມີປະສິດທິພາບຫຼາຍຂຶ້ນກວ່າເກົ່າ.
