ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ ໄດ້ມີທິດຊີ້ນຳໃຫ້ບັນດາຄະນະນຳຂອງ ສານປະຊາຊົນສູງສຸດ, ສານປະຊາຊົນ ໃນນະຄອນຫຼວງວຽງຈັນ, ສານປະຊາຊົນພາກເໜືອກາງ-ພາກໃຕ້ ແລະ ສານປະຊາຊົນແຂວງ ຕະຫຼອດຮອດພະນັກງານສານໃນຂອບເຂດທົ່ວປະເທດ ເອົາໃຈໃສ່ປະເມີນຜົນ ຄຸນນະພາບການຕັດສິນຄະດີ ຢູ່ສານ ໃຫ້ມີຄວາມວ່ອງໄວ, ໂປ່ງໃສ, ຖືກຕ້ອງ ແລະ ຮັບປະກັນຄວາມຍຸຕິທຳ ໃນສັງຄົມ.
ທິດຊີ້ນຳດັ່ງກ່າວ ມີຂຶ້ນໃນໂອກາດທີ່ ທ່ານ ຄຳພັນ ພົມມະທັດ ໄດ້ເປັນກຽດເຂົ້າຮ່ວມໂອ້ລົມຕໍ່ ພິທີປິດກອງປະຊຸມສະຫຼຸບການເຄື່ອນໄຫວວຽກງານ ປີ 2018 ແລະ ທິດທາງແຜນການ ປີ 2019 ຂອງ ສານປະຊາຊົນ ເພື່ອຍົກສູງປະສິດທິພາບໃນການຄຸ້ມຄອງບໍລິຫານສານ-ບໍລິຫານຄະດີ ໃຫ້ມີຄຸນນະພາບ ແລະ ມີປະສິດທິພາບສູງ ທີ່ຈັດຂຶ້ນໃນວັນທີ 15 ກຸມພາ 2019 ພາຍຫຼັງດຳເນີນມາເປັນເວລາ 2 ວັນ, ເປັນປະທານໂດຍ ທ່ານ ຄຳພັນ ສິດທິດຳພາ ປະທານສານປະຊາຊົນສູງສຸດ.
ທ່ານ ຄຳພັນ ພົມມະທັດ ທັງເປັນເລຂາທິການສູນກາງພັກ ແລະ ຫົວໜ້າຫ້ອງວ່າການສູນກາງພັກ ກ່າວວ່າ:
ເພື່ອສ້າງໃຫ້ປະຊາຊົນຮູ້ສຶກ ຫຼື ສຳຜັດໄດ້ວ່າ ເຂົາເຈົ້າໄດ້ຮັບການປະຕິບັດທີ່ຖືກຕ້ອງ ແລະ ເໝາະສົມຈາກການປະຕິບັດໜ້າທີ່ຂອງ ຜູ້ພິພາກສາ ແລະ ພະນັກງານຂອງສານ, ໃຫ້ເຂົາເຈົ້າຮູ້ສຶກວ່າ ໄດ້ຮັບຄວາມຍຸຕິທຳຈາກການຕັດສິນຄະດີຂອງສານ.
ກ່ອນອື່ນໝົດ, ພະນັກງານການນຳຂອງສານແຕ່ລະຂັ້ນ ຄວນເອົາໃຈໃສ່ຕື່ມໃນການປະເມີນຜົນ ຄຸນນະພາບການດຳເນີນຄະດີ ວ່າຈາກຊຸມປີຜ່ານ ແລະ ສະພາບຕົວຈິງປັດຈຸບັນ ຄະດີທີ່ດຳເນີນໄປມີຈຸດໃດທີ່ຄວນໄດ້ປັບປຸງແກ້ໄຂ ໂດຍສະເພາະ ບັນດາຄະດີ ເຖິງວ່າຕັດສິນໄປແລ້ວຫຼາຍຄະດີ ກໍບໍ່ສາມາດປະຕິບັດໄດ້, ບໍ່ໄດ້ຮັບການຍອມຮັບຈາກຄູ່ກໍລະນີ ສະແດງອອກຄື: ພາກັນຂໍອຸທອນ, ບໍ່ຂໍອຸທອນ ແລະ ບໍ່ສົນໃຈການຕັດສິນ ໂດຍສະເພາະ ຢູ່ເຂດຊົນນະບົດຫ່າງໄກ, ໃຊ້ພຽງກົດຂອງບ້ານ, ປະເພນີຂອງຊຸມຊົນ ແລະ ສຸດທ້າຍມາການຕັດສິນ ກໍປະຕິບັດຍາກ;
ເຊິ່ງບັນຫານີ້ຄວນມີການປະເມີນວ່າ ການປະຕິບັດຕົວຈິງເປັນແນວໃດ, ມີການປ່ຽນແປງຮູບການຄືແນວໃດ ໂດຍສະເພາະ ຄະດີທີ່ກ່ຽວຂ້ອງກັບເຄືອຍາດຕ່າງໆ.
ອີກບັນຫາໜຶ່ງ, ພະນັກງານສານ ຄວນປະເມີນເບິ່ງຄຸນນະພາບຂອງ ການຕັດສິນຄະດີ ຕື່ມອີກ. ຈາກນັ້ນ, ຈຶ່ງຊອກໃຫ້ເຫັນວ່າ ບັນຫາທີ່ພົ້ນເດັ່ນທີ່ຄວນໄດ້ເອົາໃຈໃສ່ ບໍ່ວ່າຈະເປັນການພິຈາລະນາຄະດີ ກໍຄືໃນການຄົ້ນຄວ້າຫານິຕິກຳຕ່າງໆ ເພື່ອເຮັດໃຫ້ການຈັດຕັ້ງປະຕິບັດເປັນໄປໄດ້ສູງກວ່າເກົ່າ ຫຼື ນັບທັງການປະສານຕ່າງໆ ແມ່ນຈຸດໃດທີ່ຄວນປັບປຸງ, ອັນນີ້ຄວນໄດ້ປະເມີນຄືນເບິ່ງຄຸນນະພາບ; ເຊິ່ງການປະເມີນຖືວ່າ ເປັນການຫງ່ຽງຫູຟັງຫາງສຽງຈາກສັງຄົມ ເພື່ອສະກັດກັ້ນບັນຫາສຽງຈົ່ມວ່າ ຈາກປະຊາຊົນ ກໍຄື ຄູ່ກໍລະນີ.