ຄະນະສະຫະພັນກໍາມະບານ 18 ກົມກອງ ອ້ອມຂ້າງກະຊວງ ປກສ ຈໍານວນ 80 ສະຫາຍ ນຳໂດຍ ພັທ ສົມພອນ ວົງສຸທິ ຄະນະບໍລິຫານງານສູນກາງສະຫະພັນກໍາມະບານລາວ ປະທານຄະນະບໍລິຫານສະຫະພັນກໍາມະບານກະຊວງ ປກສ ໄດ້ເຂົ້າຢ້ຽມຊົມຫໍພິພິທະພັນ ໄກສອນ ພົມວິຫານ, ໃນວັນທີ 26 ເມສາ 2019 ເນື່ອງໃນໂອກາດວັນກຳມະກອນສາກົນ ຄົບຮອບ 133 ປີ ( 1 ພຶດສະພາ 1886-1 ພຶດສະພາ 2019 ) ເພື່ອເປັນການລະນຶກເຖິງມູນເຊື້ອປະຫວັດສາດຂອງວັນດັ່ງກ່າວ ໃຫ້ພະນັກງານ-ນັກຮົບມີຄວາມຮັບຮູ້ ແລະ ເຂົ້າໃຈ.
ພັທ ສົມພອນ ວົງສຸທິ ກ່າວ ວ່າ:
ການເຂົ້າຢ້ຽມຊົມຫໍພິພິທະພັນ ໄກສອນ ພົມວິຫານ ໃນຄັ້ງນີ້ ກໍເພື່ອໃຫ້ສະມາຊິກກຳມະບານ ອ້ອມຂ້າງກະຊວງ ປກສ ໄດ້ຫວນຄືນເຖິງມູນເຊື້ອປະຫວັດສາດ ຂອງຊາດລາວໃນໄລຍະສະໄໝຕໍ່ສູ້ກູ້ຊາດ, ຕ້ານພວກຈັກກະພັດລ່າເມືອງຂຶ້ນແບບເກົ່າ ແລະ ແບບໃໝ່, ເນື່ອງໃນໂອກາດສຳຄັນດັ່ງກ່າວ ໂດຍພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນ ປະຕິວັດລາວ ເຊິ່ງແມ່ນປະທານ ໄກສອນ ພົມວິຫານ ຜູ້ນຳພາທີ່ແສນເຄົາລົບຮັກເປັນຜູ້ຈັດຕັ້ງນຳພາຂະບວນການຕໍ່ສູ້ຂອງ ກອງທັບ ແລະ ປະຊາຊົນລາວ ແຕ່ເໜືອຮອດໃຕ້ໄດ້ຮັບຜົນສຳເລັດ ເປັນກ້າວໆ, ຈົນມາຮອດວັນທີ 2 ທັນວາ 1975 ປະເທດເຮົາກໍໄດ້ ສະຖາປະນາເປັນ ສປປ ລາວ, ພາຍຫຼັງປະເທດຊາດໄດ້ຮັບການປົດປ່ອຍ ພັກເຮົາກໍ່ໄດ້ວາງຍຸດທະສາດໃນການປະຕິບັດສອງໜ້າທີ່ສຳຄັນ ຄື: ປົກປັກຮັກສາ ແລະ ສ້າງສາພັດທະນາປະເທດຊາດ ຈົນໄດ້ຮັບຄວາມຈະເລີນຮຸ່ງເຮືອງສີວິໄລມາຮອດທຸກວັນນີ້.
ວັນທີ 14 ກໍລະກົດ ປີ 1889 ກອງປະຊຸມພັກຄອມມູນິດສາກົນ ຄັ້ງທີ II ໄດ້ໄຂຂຶ້ນຢູ່ທີ່ນະຄອນຫຼວງປາຣີ ( ປະເທດຝຣັ່ງ ), ມີຜູ້ເຂົ້າຮ່ວມກອງປະຊຸມ 393 ຄົນ ເຊິ່ງມາຈາກ 22 ປະເທດ; ໃນກອງປະຊຸມໄດ້ຜ່ານໂຄງການດໍາເນີນງານສຳຄັນ ຄື: ຊົນຊັ້ນກໍາມະກອນ ສາມັກຄີຕໍ່ສູ້ເພື່ອປະຕິບັດຄໍາຂວັນ “ມື້ໜຶ່ງເຮັດວຽກ 8 ຊົ່ວໂມງ ແລະ ກໍານົດເອົາວັນທີ 1 ພຶດສະພາ 1886 ເປັນວັນກໍາມະກອນສາກົນ, ນັບແຕ່ນັ້ນມາ ວັນທີ 1 ພຶດສະພາ ຂອງທຸກໆປີ ຈຶ່ງໄດ້ກາຍເປັນວັນບຸນໃຫຍ່ຂອງຊົນຊັ້ນກໍາມະກອນໃນທົ່ວໂລກ; ສະເພາະຢູ່ ສປປ ລາວ ຂອງທຸກໆປີ ຊົນຊັ້ນກໍາມະກອນ ແລະ ຊາວຜູ້ອອກແຮງງານ ກໍໄດ້ຈັດຕັ້ງໂຮມຊຸມນຸມໃຫຍ່ ເພື່ອລະນຶກເຖິງມູນເຊື້ອສາມັກຄີຕໍ່ສູ້ຂອງຊາວກໍາມະກອນ ເພື່ອເປັນການປົກປ້ອງສິດ ແລະ ຜົນປະໂຫຍດອັນຊອບທໍາຂອງກໍາມະກອນ ແລະ ຊາວຜູ້ອອກແຮງງານ.