ວັນທີ 23 ເມສາ 2019 ຜ່ານມານີ້, ກອງບັນຊາການ ປກສ ແຂວງວຽງຈັນ ໄດ້ຈັດພິທີມອບຫຼຽນໄຊພິລະອາດຫານ ແລະ ໃບຍ້ອງຍໍສັນລະເສີນຜົນງານດີເດັ່ນໃຫ້ແກ່ນາຍ ແລະ ພົນຕໍາຫຼວດເຂົ້າຮ່ວມມີ ພັອ ປອ ທອງເຄນ ບຸນໝັ້ນ ຫົວໜ້າກອງບັນຊາການ ປກສ ແຂວງວຽງຈັນ ແລະ ພັທ ຈະເລີນ ເລີດມຸງຄຸນ ຮອງຫົວໜ້າກອງບັນຊານການ ປກສ ແຂວງ ມີຕາງໜ້າຫ້ອງ, ກອງພັນປ້ອງກັນເຄື່ອນທີ່, ຄ້າຍຄຸມຂັງ-ດັດສ້າງ ພ້ອມດ້ວຍພະນັກງານກ່ຽວຂ້ອງເຂົ້າຮ່ວມ.
ພັທ ຄໍາແຝງ ສີມູນ ຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງຂອງກະຊວງປ້ອງກັນປະເທດ ເລກທີ 2633, ເລກທີ 7/ກປທ ວ່າດ້ວຍການຍ້ອງຍໍສັນລະເສີນຜົນງານໃຫ້ແກ່ນາຍ ແລະ ພົນຕໍາຫຼວດກະຊວງປ້ອງກັນຄວາມສະຫງົບ, ຂໍ້ຕົກລົງລັດຖະມົນຕີກະຊວງປ້ອງກັນຄວາມສະຫງົບ ເລກທີ 2433/ ປກສ, ເລກທີ 1478/ກນບ ວ່າດ້ວຍການມອບໃບຍ້ອງຍໍໃຫ້ນາຍ ແລະ ພົນຕໍາຫຼວດກອງບັນຊາການ ປກສ ແຂວງ ແລະ ຂໍ້ຕົກລົງກົມໃຫຍ່ການເມືອງປ້ອງກັນຄວາມສະຫງົບ ເລກທີ 3967/ ກມປສ, ເລກທີ 1461/ກນບ ວ່າດ້ວຍການມອບໃບຍ້ອງຍໍ ໃຫ້ນາຍ ແລະ ພົນຕໍາຫຼວດ ກອງບັນຊາການ ປກສ ແຂວງວຽງຈັນ ເພື່ອຕອບສະໜອງຜົນງານໃຫ້ແກ່ນາຍ ແລະ ພົນຕໍາຫຼວດ ເວົ້າລວມ ເວົ້າສະເພາະ ແມ່ນກອງບັນຊາການ ປກສ ແຂວງວຽງຈັນ ທີ່ມີຜົນງານດີເດັ່ນໃນການປະຕິບັດໜ້າທີ່ອໍາພາງລົງກໍ່ສ້າງຮາກຖານການເມືອງຢູ່ຈຸດສຸມ ເຮັດໃຫ້ຂອບເຂດດັ່ງກ່າວ ມີຄວາມສະຫງົບ-ປອດໄພ ແລະ ມອບໃບຍ້ອງຍໍກະຊວງປ້ອງກັນຄວາມສະຫງົບໃຫ້ນາຍ ແລະ ພົນຕໍາຫຼວດ ທີ່ມີຜົນງານດີເດັ່ນໃນການປ້ອງກັນວຽກງານອື່ນໆ.
ໃນນີ້, ມີຫຼຽນໄຊພິລະອາດຫານ ຊັ້ນ II ໃຫ້ຈໍານວນ 7 ສະຫາຍ, ຫຼຽນໄຊພິລະອາດຫານ ຊັ້ນ III ໃຫ້ຈໍາ ນວນ 17 ສະຫາຍ, ໃບຍ້ອງຍໍລັດຖະບານໃຫ້ 1 ສະຫາຍ, ມອບໃບຍ້ອງຍໍກະຊວງປ້ອງກັນຄວາມສະຫງົບ ໃຫ້ຈຳນວນ 62 ສະຫາຍ ແລະ ມອບໃບຍ້ອງຍໍກົມໃຫຍ່ການເມືອງປ້ອງກັນຄວາມສະຫງົບ ຈໍານວນ 30 ສະຫາຍ. ໂອກາດດຽວກັນ, ຍັງໄດ້ຜ່ານຂໍ້ຕົກລົງ ເລກທີ 417/ ປກສ ວ່າດ້ວຍການອະນຸມັດໃຫ້ນາຍຕໍາຫຼວດພັກການຮັບອຸດໜູນບໍານານ ໃນນີ້ມີ ພັທ ຈັນທະ ພົມມະລືສີ ຮອງຫົວໜ້າກອງບັນຊາການ ປກສ ເມືອງວຽງຄໍາ.