ທ້າຍອາທິດຜ່ານມາ, ຫ້ອງການຍຸຕິທໍາ ເມືອງສີສັດຕະນາກ ນະຄອນຫຼວງວຽງຈັນ ໄດ້ເປີດຝຶກອົບຮົມກົດໝາຍໄລຍະສັ້ນ 45 ວັນ ໂດຍການເປັນປະທານຂອງ ທ່ານ ບຸນຄໍາ ວິຈິດລາສີ ຮອງເຈົ້າເມືອງໆສີສັດຕະນາກ ຜູ້ຊີ້ນໍາວຽກງານຍຸຕິທໍາຮາກຖານ, ມີ ທ່ານ ບົວເກດ ພົມມະຈັນ ຮອງຫົວໜ້າພະແນກຍຸຕິທໍາ ນະຄອນຫຼວງວຽງຈັນ ພ້ອມດ້ວຍພາກສ່ວນທີ່ກ່ຽວຂ້ອງ ແລະ ນັກສໍາມະນາກອນເຂົ້າຮ່ວມ.
ທ່ານ ສົມຈັນ ຈັນດາມະນີ ຫົວໜ້າຫ້ອງການຍຸຕິທໍາເມືອງ ກ່າວວ່າ:
ການເປີດຝຶກອົບຮົມໃນ ຄັ້ງນີ້ ມີຜູ້ເຂົ້າຮ່ວມ ຈຳນວນ 35 ທ່ານ. ໃນນັ້ນ, ມີຮອງນາຍບ້ານ 6 ທ່ານ, ປກສ ບ້ານ 5 ທ່ານ, ສະຫະພັນແມ່ຍິງບ້ານ 7 ທ່ານ, ຄະນະຊາວໜຸ່ມ 2 ທ່ານ, ແນວລາວສ້າງຊາດ 2 ທ່ານ ແລະ ພະນັກງານຫ້ອງການອ້ອມຂ້າງອີກຈໍານວນ 13 ທ່ານ; ປະກອບມີ 34 ວິຊາ, 22 ໜ່ວຍກິດ ແລະ 360 ຊົ່ວໂມງ. ຈຸດປະສົງຂອງການຝຶກອົບຮົມກໍເພື່ອເປັນການຈັດຕັ້ງປະຕິບັດວຽກງານສ້າງບຸກຄະລາກອນກົດໝາຍ ໃຫ້ແກ່ພະນັກງານຮາກຖານບ້ານ ແລະ ພະນັກງານຫ້ອງການອ້ອມຂ້າງເມືອງ.
ພ້ອມດຽວກັນນີ້, ຍັງເປັນການຜັນຂະຫຍາຍເນື້ອໃນຈິດໃຈຂອງຄໍາສັ່ງເລກທີ 46/ນຍ, ລົງວັນທີ 29 ກັນຍາ 2009 ກ່ຽວກັບການເພີ່ມທະວີຕໍ່ວຽກງານຍຸຕິທໍາຮາກຖານຂັ້ນພື້ນຖານໃນຫຼັກສູດ 45 ວັນ ເຊິ່ງເປົ້າໝາຍແມ່ນຈະສ້າງໃຫ້ກາຍເປັນຜູ້ສືບທອດ ແລະ ໃຫ້ໄດ້ຮັບຜົນທາງດ້ານຄຸນນະພາບ ແລະ ມີຄວາມຮູ້-ຄວາມສາມາດທາງດ້ານກົດໝາຍ.