ຄະນະບໍລິຫານງານຊາວໜຸ່ມ ກົມໃຫຍ່ການເມືອງ ກະຊວງ ປກສ ໄດ້ຈັດພິທີປິດຊຸດຝຶກອົບຮົມ ພາສາຫວຽດນາມ ໄລຍະສັ້ນ 6 ເດືອນ ຊຸດທີ I ພ້ອມທັງມອບໃບຢັ້ງຢືນໃຫ້ບັນດາສະຫາຍທີ່ສຳເລັດການຝຶກອົບຮົມ ໃນວັນທີ 3 ພຶດສະພາ 2019, ເຂົ້າຮ່ວມ ແລະ ມອບໃບຢັ້ງຢືນໂດຍ ພົຈວ ປອ ສຸວັນນີ ສີສຸພາບມີໄຊ ຮອງຫົວໜ້າກົມໃຫຍ່ການເມືອງ, ມີບັນດາສະຫາຍໃນອົງການຜູ້ຕາງໜ້າ ກະຊວງຕຳຫຼວດ ສສ ຫວຽດນາມ ປະຈຳ ສປປ ລາວ, ບັນດາຄະນະພັກກົມໃຫຍ່, ຄະນະຊາວໜຸ່ມກົມໃຫຍ່, ພາກສ່ວນກ່ຽວຂ້ອງ ແລະ ນັກສຳມະນາກອນ ເຂົ້າຮ່ວມ.
ພັຕ ແກ້ວອຸດອນ ວິໄລທອງ ຮອງເລຂາຄະນະບໍລິຫານງານຊາວໜຸ່ມ ກົມໃຫຍ່ການເມືອງ ປກສ ຜ່ານບົດລາຍງານໃຫ້ຮູ້ວ່າ:
ຊຸດຝຶກອົບຮົມ ພາສາຫວຽດນາມ ໄດ້ເລີ່ມການຮໍ່າຮຽນແຕ່ວັນທີ 20 ກັນຍາ 2018 – 3 ພຶດສະພາ 2019 ໂດຍມີນັກສໍາມະນາກອນທີ່ມາຈາກ ກົມກອງອ້ອມຂ້າງກົມໃຫຍ່ການເມືອງ ປກສ ທັງໝົດ 42 ສະຫາຍ ຍິງ 17 ສະຫາຍ, ເຊິ່ງນັບແຕ່ເລີ່ມເປີດຝຶກອົບຮົມເປັນຕົ້ນມາ ບັນດານັກສຳມະນາກອນແຕ່ລະສະຫາຍ ໄດ້ຍົກສູງຄວາມຮັບຜິດຊອບໃນການຄົ້ນຄວ້າຮໍ່າຮຽນ, ເອົາໃຈໃສ່ຝຶກຝົນຫໍ່ຼຫຼອມຕົນເອງທາງດ້ານຄຸນສົມບັດ, ສິນທຳປະຕິວັດ ຕິດພັນກັບ ການຄົ້ນຄວ້າຮໍ່າຮຽນວິຊາສະເພາະ;
ເວົ້າສະເພາະແມ່ນ ຮຽນຮູ້ພື້ນຖານການນຳໃຊ້ພາສາຫວຽດນາມ ແລະ ການສົນທະນາຕົວຈິງ ເພື່ອຍົກສູງລະດັບຄວາມຮູ້-ຄວາມສາມາດທາງດ້ານພາສາຕ່າງປະເທດ ໃຫ້ແກ່ນາຍ ແລະ ພົນຕຳຫຼວດຂອງກົມໃຫຍ່ການເມືອງ ກໍຄືສະມາຊິກຊາວໜຸ່ມອ້ອມຂ້າງກົມໃຫຍ່ການເມືອງ ປກສ ໃຫ້ສູງຂຶ້ນເລື້ອຍໆ ເພື່ອພ້ອມກັນເຮັດສຳເລັດໜ້າທີ່ການເມືອງ-ທີ່ການຈັດຕັ້ງມອບໝາຍໃຫ້ຢ່າງມີປະສິດທິພາບ;
ຜ່ານການຮໍ່າຮຽນ ສາມາດສະຫຼຸບຕີລາຄາຈັດແບ່ງປະເພດ ຄື: ປະເພດເກັ່ງ ມີ 15 ສະຫາຍ ຍິງ 7 ສະຫາຍ, ກາງ 25 ສະຫາຍ ຍິງ 10 ສະຫາຍ ແລະ ປະເພດອ່ອນ ມີ 2 ສະຫາຍ.
ໂອກາດດຽວກັນ, ພົຈວ ປອ ສຸວັນນີ ສີສຸພາບມີໄຊ ໄດ້ສະແດງຄວາມຊົມເຊີຍຕໍ່ ຄະນະຮັບຜິດຊອບ ແລະ ພະນັກງານຄູ-ອາຈານ ທີ່ຕັ້ງໜ້າເອົາໃຈໃສ່ປະຕິບັດການສິດສອນຕາມແຜນການທີ່ ຄະນະພັກຂັ້ນເທິງ ໄດ້ກຳນົດໄວ້ຢ່າງມີຜົນສຳເລັດ, ພ້ອມທັງມີທິດຊີ້ນຳໃຫ້ບັນດານັກສຳມະນາກອນ ຈົ່ງພ້ອມກັນສືບຕໍ່ສຶກສາຄົ້ນຄວ້າຮໍ່າຮຽນພາສາຫວຽດນາມ ທີ່ໄດ້ຮຽນມາຢ່າງເປັນປົກກະຕິ ເພື່ອຍົກສູງລະດັບຄວາມຮູ້ຂອງແຕ່ລະສະຫາຍໃຫ້ເຂົ້າສູ່ລວງເລິກ ແລະ ເຂົ້າໃຈຕໍ່ກັບພາສາດັ່ງກ່າວ ເພື່ອນຳໄປພັດທະນາຕົນເອງໃຫ້ສາມາດເວົ້າໄດ້, ຂຽນໄດ້ ຢ່າງຄ່ອງແຄ້ວ ແລະ ດີຂຶ້ນໃນຕໍ່ໜ້າ ໃຫ້ສາມາດຕອບສະໜອງໄດ້ຕໍ່ກັບວຽກງານການເມືອງຂອງຕົນໃນສະເພາະໜ້າ ແລະ ຍາວນານ ຢ່າງມີຄຸນນະພາບ.
