ຄະນະບໍລິຫານງານຊາວໜຸ່ມ ວິທະຍາຄານສັນຕິບານປະຊາຊົນ ( ວສປ ) ກະຊວງ ປກສ ໄດ້ຈັດຕັ້ງປາຖະກະຖາຫວນຄືນມູນເຊື້ອ ວັນສ້າງຕັ້ງຄະນະຊາວໜຸ່ມປະຊາຊົນ ປະຕິວັດລາວ ຄົບຮອບ 64 ປີ ( 14 ເມສາ 1955-14 ເມສາ 2019 ) ໃນວັນທີ 3 ພຶດສະພາ ຜ່ານມາ, ໃຫ້ກຽດປາຖະກະຖາໂດຍ ພັອ ບຸນນ້ອມ ໄຊຍະພູມ ຮອງອໍານວຍການ ວສປ, ມີ ຄະນະບໍລິຫານງານ ຊາວໜຸ່ມ, ພະນັກງານຄູ-ອາຈານ ແລະ ສະມາຊິກຊາວໜຸ່ມ ເຂົ້າຮ່ວມ.
ພັອ ບຸນນ້ອມ ໄຊຍະພູມ ໄດ້ຍົກໃຫ້ເຫັນມູນເຊື້ອການກໍາເນີດເຕີບໃຫຍ່ຂະຫຍາຍຕົວຂອງ ຄະນະຊາວໜຸ່ມປະຊາຊົນ ປະຕິວັດລາວ ວ່າ:
ໃນວັນທີ 14 ເມສາ 1955, ພັກປະຊາຊົນ ປະຕິວັດລາວ ໄດ້ສ້າງຕັ້ງ ອົງການຈັດຕັ້ງຊາວໜຸ່ມຕະລຸມບອນ ຂຶ້ນໃນຖັນແຖວພະນັກງານປະກອບອາວຸດ ເຊິ່ງອົງການຈັດຕັ້ງດັ່ງກ່າວໄດ້ກາຍເປັນເຈົ້າການເຕົ້າໂຮມ ແລະ ສຶກສາອົບຮົມຊາວໜຸ່ມ ປະຕິບັດພາລະບົດບາດປະຈັນບານໃນທຸກສະໜາມຮົບດ້ວຍມານະຈິດ ທີ່ວ່າ:
“ ຍອມຕາຍ ດີກວ່າ ເສຍເອກະລາດ, ເດັດຂາດ ບໍ່ໃຫ້ປະເທດຊາດ ຖືກຕັດແບ່ງ ແລະ ຄວາມປອງດອງຊາດ ຖືກທໍາລາຍ ”
ຊາວໜຸ່ມເປັນໝື່ນເປັນແສນຄົນ ໄດ້ສະໝັກເຂົ້າຮັບໃຊ້ຊາດ, ເປັນກໍາລັງປະກອບອາວຸດຢູ່ແຖວໜ້າ, ເປັນກໍາລັງແນວຫຼັງໃນການລໍາລຽງຂົນສົ່ງ, ເປັນກໍາລັງຂົນຂວາຍປະກອບອາວຸດ, ເປັນກໍາລັງຕໍ່ສູ້ດ້ານການເມືອງຢູ່ 10 ແຂວງ ແລະ ເປັນກໍາລັງຕໍ່ສູ້ປົກປັກຮັກສາສອງແຂວງເຕົ້າໂຮມ ( ຫົວພັນ ແລະ ຜົ້ງສາລີ ).
ເຂົາເຈົ້າຍັງແມ່ນກໍາລັງປະກອບອາວຸດ ທີ່ໄດ້ປະກອບສ່ວນໃນການສ້າງວິລະກໍາອັນລໍ້າເລີດ ແລະ ເຫດການມະຫັດສະຈັນໃນປະຫວັດສາດ ເຊັ່ນ:
ການຜ່າວົງປິດລ້ອມຂອງ ກອງພັນທີສອງ ອອກຈາກທົ່ງໄຫຫີນ ແລະ ການເອົາຜູ້ນໍາແນວລາວຮັກຊາດ ໜີອອກຈາກຄຸກໂພນເຄັງ ແລະ ວິລະກໍາອື່ນໆ.
ທ່ານຮອງອໍານວຍການ ວສປ ຍັງໄດ້ກ່າວຕື່ມອີກວ່າ:
ຄຽງຄູ່ກັນນີ້, ເພື່ອສືບຕໍ່ວິລະກໍາອັນລໍ້າເລີດຂອງຊາວໜຸ່ມຮຸ່ນກ່ອນ ພວກເຮົາເປັນຊາວໜຸ່ມຮຸ່ນສືບທອດ ຈະຕ້ອງສືບຕໍ່ປະຕິບັດແນວຄິດ ແລະ ອຸດົມການຂອງ ປະທານ ໄກສອນ ພົມວິຫານ ໃນການຊີ້ນໍາ-ນໍາພາສະມາຊິກຊາວໜຸ່ມ ໃຫ້ນັບມື້ໜັກແໜ້ນເຂັ້ມແຂງ, ມີຫົວຄິດປະດິດສ້າງ, ມີຄວາມຮູ້-ຄວາມສາມາດ ນໍາພາຊາວໜຸ່ມລາວ ກ້າວຂຶ້ນໃຫ້ທັນກັບຍຸກສະໄໝໃໝ່ ໃຫ້ສົມກັບຂະໜານນາມວ່າ “ ຊາວໜຸ່ມ ຈົ່ງກາຍເປັນນົກອິນຊີທີ່ບໍ່ຫວັ່ນກົວຕໍ່ພາຍຸລົມແດງ ຈົ່ງການເປັນສິນໄຊແຫ່ງຍຸກສະໄໝພວກເຮົາ ”.
ໂອກາດດຽວກັນ, ພັຕ ໄພບູນ ກິດຕິສັກ ຮອງເລຂາຄະນະບໍລິຫານງານຊາວໜຸ່ມ ວສປ ໄດ້ຜ່ານຂໍ້ຕົກລົງຂອງ ຄະນະບໍລິຫານງານຊາວໜຸ່ມ ກະຊວງ ປກສ ເລກທີ 134/ຄຊ.ປກສ ລົງວັນທີ 1 ເມສາ 2019 ວ່າດ້ວຍ ການຢັ້ງຢືນໜ່ວຍຊາວໜຸ່ມຮາກຖານ ທີ່ຂຶ້ນກັບ ຄະນະຊາວໜຸ່ມ ວສປ ເປັນໜ່ວຍຊາວໜຸ່ມ 4 ບຸກ ປະຈໍາປີ 2018 ມີຈໍານວນ 13 ໜ່ວຍ ຄື:
- ໜ່ວຍຊາວໜຸ່ມຮາກຖານ ຫ້ອງພະລາທິການ
- ໜ່ວຍຊາວໜຸ່ມຮາກຖານ 12 ຄະນະວິຊາຄູ
- ໜ່ວຍຊາວໜຸ່ມຮາກຖານບໍລິຫານ 1
- ໜ່ວຍຊາວໜຸ່ມຮາກຖານບໍລິຫານ 2
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 15 ກອງຮ້ອຍ 1
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 15 ກອງຮ້ອຍ 2
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 21 ກອງຮ້ອຍ 1
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 21 ກອງຮ້ອຍ 2
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 21 ກອງຮ້ອຍ 3
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 21 ກອງຮ້ອຍ 4
- ຄະນະຊາວໜຸ່ມຮາກຖານ ນັກສຶກສາຮຸ່ນທີ 22 ກອງຮ້ອຍ 1
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 22 ກອງຮ້ອຍ 2
- ໜ່ວຍຊາວໜຸ່ມຮາກຖານ ນັກສຶກສາຮຸ່ນທີ 22 ກອງຮ້ອຍ 3
ເຊິ່ງໃຫ້ກຽດມອບໃບຢັ້ງຢືນ ໃຫ້ແກ່ແຕ່ລະໜ່ວຍຊາວໜຸ່ມ ໂດຍ ພັອ ບຸນນ້ອມ ໄຊຍະພູມ.