ກອງບັນຊາການ ປກສ ເມືອງຈັນທະບູລີ ນະຄອນຫຼວງວຽງຈັນ (ນວ) ໄດ້ຈັດພິທີເຊັນບົດບັນທຶກມອບ-ຮັບໜ້າທີ່ ຮັກສາການຫົວໜ້າກອງບັນຊາການ ປກສ ເມືອງຈັນທະບູລີ ໃນວັນທີ 8 ພຶດສະພາ ທີ່ຜ່ານມາ ໂດຍມີ ທ່ານ ນາງ ບົວລອນ ວົງດາລາແສນ ເຈົ້າເມືອງໆຈັນທະບູລີ, ຄະນະພັກ-ຄະນະບັນຊາ ປກສ ນວ, ປກສ ເມືອງ, ປກສ ກຸ່ມ ແລະ ພະນັກງານ-ນັກຮົບ ພາຍໃນ ປກສ ເມືອງ ເຂົ້າຮ່ວມ.
ພັທ ປອ ບຸນພັນ ເທບໄກສອນ ຫົວໜ້າພະແນກການເມືອງ ປກສ ເມືອງຈັນທະບູລີ ຜ່ານຂໍ້ຕົກລົງຂອງ ຫົວໜ້າກອງບັນຊາການ ປກສ ນວ ເລກທີ 151/ປກສ.ນວ ລົງວັນທີ 12 ເມສາ 2019 ວ່າດ້ວຍ ການແຕ່ງຕັ້ງ ຮັກສາການຫົວໜ້າກອງບັນຊາການ ປກສ ເມືອງຈັນທະບູລີ ໂດຍຕົກລົງແຕ່ງຕັ້ງ ພັທ ຊຽງພັນ ອິນທະປັນຍາ ຮອງຫົວໜ້າກອງບັນຊາການ ປກສ ເມືອງຈັນທະບູລີ ເປັນ ຮັກສາການຫົວໜ້າກອງບັນຊາການ ປກສ ເມືອງຈັນທະບູລີ, ສ່ວນຮອງຫົວໜ້າທີ່ມີຢູ່ແລ້ວ ແມ່ນຮັກສາໄວ້ຄືເກົ່າ.
ຈາກນັ້ນ, ພັທ ໄມວິໄລສຸກ ແສນອຸໄທ ຫົວໜ້າກອງບັນຊາການ ປກສ ເມືອງຈັນທະບູລີ ( ຜູ້ເກົ່າ ) ທີ່ໄດ້ຮັບນະໂຍບາຍພັກການ ຮັບອຸດໜູນບຳນານ ໄດ້ເຊັນມອບໜ້າທີ່ໃຫ້ ພັທ ຊຽງພັນ ອິນທະປັນຍາ ຮັກສາການຫົວໜ້າກອງບັນຊາການ ປກສ ເມືອງຈັນທະບູລີ ເຊັນຮັບໜ້າທີ່ ເພື່ອສືບຕໍ່ຊີ້ນຳວຽກງານ ໃຫ້ມີຄຸນນະພາບສູງຂຶ້ນກວ່າເກົ່າ.
ໂອກາດດຽວກັນ, ທ່ານ ນາງ ບົວລອນ ວົງດາລາແສນ ໄດ້ຊົມເຊີຍຕໍ່ຜົນງານທີ່ ຫົວໜ້າກອງບັນຊາການ ປກສ ເມືອງ ຜູ້ເກົ່າ ທີ່ໄດ້ທຸ່ມເທເຫື່ອແຮງ ແລະ ສະຕິປັນຍາ ເຂົ້າໃນການຊີ້ນຳ-ນຳພາຄະນະ ແລະ ພະນັກງານຫຼັກແຫຼ່ງ ເຄື່ອນໄຫວເຮັດວຽກງານມີຜົນສຳເລັດຫຼາຍດ້ານ; ພ້ອມທັງຊີ້ນໍາໃຫ້ທ່ານ ຮັກສາການຫົວໜ້າກອງບັນຊາການ ປກສ ເມືອງຈັນທະບູລີ ຈົ່ງສືບຕໍ່ຈັດຕັ້ງປະຕິບັດພາລະກິດທີ່ການຈັດຕັ້ງຂັ້ນເທິງມອບໝາຍ ໃຫ້ຮັບປະກັນມີຜົນສຳເລັດ, ເປັນແບບຢ່າງນຳໜ້າໃນການຊີ້ນຳ-ນຳພາເຮັດວຽກເປັນໝູ່ຄະນະ ແລະ ມີຄວາມຮັບຜິດຊອບສູງ ແລະ ສືບຕໍ່ເພີ່ມທະວີໃນການຊີ້ນຳ-ນຳພາວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ-ນັກຮົບ ໃຫ້ມີແນວຄິດອຸ່ນອຽນທຸ່ນທ່ຽງ ແລະ ປະຕິບັດລະບຽບວິໄນ ຢ່າງເຂັ້ມງວດ ພ້ອມກັນສືບຕໍ່ເຮັດວຽກງານວິຊາສະເພາະ ໃຫ້ມີຜົນສໍາເລັດ ແລະ ຮັບປະກັນໃຫ້ ເມືອງຈັນທະບູລີ ມີຄວາມສະຫງົບ-ປອດໄພ.