ວັນທີ 11 ກໍລະກົດຜ່ານມາ, ກະຊວງ ປກສ ໄດ້ຈັດພິທີປາຖະກະຖາຫວນຄືນມູນເຊື້ອ ວັນເກີດ ປະທານ ສຸພານຸວົງ ຄົບຮອບ 110 ປີ ( 13 ກໍລະກົດ 1909 – 13 ກໍລະກົດ 2019 ), ປາຖະກະຖາໂດຍ ພົຕ ກົງທອງ ພົງວິຈິດ ຮອງລັດຖະມົນຕີ ກະຊວງ ປກສ, ມີບັນດາຄະນະພັກ – ຄະນະກົມກອງ ອ້ອມຂ້າງ ກະຊວງ ປກສ ເຂົ້າຮ່ວມ.
ພົຕ ກົງທອງ ພົງວິຈິດ ໃຫ້ຮູ້ເຖິງ ປະຫວັດຄວາມເປັນມາ ແລະ ຜົນງານຂອງ ປະທານ ສຸພານຸວົງ ໂດຍຫຍໍ້ວ່າ:
ປະທານ ສຸພານຸວົງ ເກີດເມື່ອວັນທີ 13 ກໍລະກົດ 1909 ທີ່ແຂວງຫຼວງພະບາງ ໃນຄອບຄົວເຊື້ອເຈົ້າ, ເປັນໂອຣົດຂອງ ເຈົ້າມະຫາອຸປະຣາດ ບຸນຄົງ ແລະ ໝ່ອມ ຄໍາອ້ວນ, ມີເອື້ອຍ-ນ້ອງ 2 ຄົນ ຄື: ເຈົ້າຍິງ ທະວີວັນ ແລະ ເຈົ້າຍິງ ຈິນດາຣັດສະໝີ, ມີອ້າຍ-ນ້ອງຕ່າງມານດາ 2 ຄົນ ຄື: ເຈົ້າເພັດຊະຣາດ ແລະ ເຈົ້າສຸວັນນະພູມມາ.
+ ເມື່ອ ປະທານ ສຸພານຸວົງ ອາຍຸໄດ້ 7 ປີ
ທ່ານໄດ້ເຂົ້າຮຽນຢູ່ໂຮງຮຽນປະຖົມສຶກສາ ທີ່ຫຼວງພະບາງ, ເພິ່ນເປັນນັກຮຽນທີ່ຂະຫຍັນໝັ່ນພຽນ ແລະ ມີພອນສະຫວັນຫຼາຍດ້ານ, ຮຽນເກັ່ງ ແລະ ສອບເສັງໄດ້ຄະແນນດີເລີດ ມາຕະຫຼອດຈົນຈົບຊັ້ນປະຖົມສົມບູນ.
+ ມາກາງປີ 1920, ທ່ານໄດ້ໄປຮຽນຕໍ່ຊັ້ນມັດທະຍົມ ຢູ່ອານແບກຊາໂຣ ທີ່ຮ່າໂນ້ຍ ສສ ຫວຽດນາມ
ຢູ່ທີ່ນັ້ນ ທ່ານໄດ້ຕັ້ງໃຈຮຽນທັງວິຊາທໍາມະຊາດ ແລະ ສັງຄົມ, ຮຽນພາສາຕ່າງປະເທດ ຫຼາຍພາສາ, ຮຽນທາງດ້ານສິລະປະ – ວັນນະຄະດີ, ທັງຫຼິ້ນກິລາ ແລະ ດົນຕີ, ມີພອນສະຫວັນໃນດ້ານແຕ້ມຮູບ ແລະ ຂຽນບົດກະວີ, ທ່ານໄດ້ຮຽນຈົບ ຂະແໜງວິຊາວິທະຍາສາດ ແລະ ອັກສອນສາດ ດ້ວຍຄະແນນດີເລີດ ແລະ ຖືກ ຄັດເລືອກເປັນນັກຮຽນດີເດັ່ນຂອງ ໂຮງຮຽນໂປຼເຕັກໂຕຣາ ແຫ່ງແຄວ້ນ ອິນດູຈີນ.
+ ມາປີ 1931, ທ່ານໄດ້ໄປສຶກສາຕໍ່ ຢູ່ປະເທດຝຣັ່ງ ທີ່ມະຫາວິທະຍາໄລຂົວທາງແຫ່ງຊາດ
ທ່ານມີພອນສະຫວັນ ໃນການຮຽນຮູ້ພາສາຂອງຊາດຕ່າງໆ ເຊິ່ງເພິ່ນສາມາດເວົ້າໄດ້ເຖິງ 10 ພາສາ ທີ່ໃຊ້ຫຼາຍໃນສາກົນ ແລະ ປີ 1937, ປະທານ ສຸພານຸວົງ ໄດ້ຮັບ ໃບປະກາສະນີຍະບັດ ວິສາວະກອນຂົວທາງ ທີ່ຝຣັ່ງ ເປັນຄົນທໍາອິດຂອງປະເທດລາວ.
ປະທານ ສຸພານຸວົງ ເປັນຜູ້ນຳທີ່ມີຄວາມຈົງຮັກພັກດີຕໍ່ ອຸດົມການປະຕິວັດ ຢ່າງເດັດຂາດ, ຕໍ່ສູ້ຢ່າງກ້າແກ່ນ ແລະ ພິລະອາດຫານ; ເຊິ່ງຍາມໃດ, ກໍຍົກສູງສະຕິລະບຽບວິໄນຕໍ່ ການຈັດຕັ້ງ, ນັບຖື ໝູ່ຄະນະ, ເອື້ອເຟື້ອຮັກແພງມິດສະຫາຍ ຢ່າງຈິງຈັງ, ດຳລົງຊີວິດ ຢ່າງຊື່ສັດສຸດຈະລິດ ແລະ ລຽບງ່າຍ, ມີນໍ້າໃຈຮັກຊາດອັນດູດດື່ມ, ມີນໍ້າໃຈຕໍ່ສູ້ທີ່ອາດຫານກ້າແກ່ນ, ມີທັດສະນະຫຼັກໝັ້ນອັນໜັກແໜ້ນ ແລະ ນໍ້າໃຈເສຍສະລະອັນສູງສົ່ງ ເພື່ອ ຊາດ ແລະ ເພື່ອປະຊາຊົນ ຢ່າງແທ້ຈິງ; ທ່ານເປັນໜຶ່ງໃນບັນຜູ້ນຳທີ່ດີເດັ່ນ ແລະ ເຄົາລົບຮັກຂອງປະຊາຊົນລາວ ບັນດາເຜົ່າ ເພາະວ່າ ທ່ານປະທານ ສຸພານຸວົງ ບໍ່ວ່າຈະຢູ່ໃນຕຳແໜ່ງໃດ, ຄວາມຮັບຜິດຊອບໃດ ເພິ່ນກໍໄດ້ອຸທິດໝົດຈິດໝົດໃຈ, ໝົດຄວາມສາມາດ ແລະ ຫົວຄິດປະດິດສ້າງຂອງຕົນ ໃຫ້ແກ່ພາລະກິດຕໍ່ສູ້ປົດປ່ອຍຊາດ, ປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອເອກະລາດ, ອະທິປະໄຕຂອງຊາດ ແລະ ຄວາມສົມບູນພູນສຸກຂອງປະຊາຊົນລາວ.
ຫຼັງຈາກນັ້ນ, ພົຕ ວັນທອງ ກອງມະນີ ຫົວໜ້າກົມໃຫຍ່ການເມືອງ ປກສ ໄດ້ເຜີຍແຜ່ ດຳລັດ ເລກທີ 184/ລບ ລົງວັນທີ 26 ມິຖຸນາ 2019 ວ່າດ້ວຍ ຈັນຍາບັນຂອງ ພະນັກງານ – ລັດຖະກອນ ເຊິ່ງປະກອບມີ 3 ໝວດ ແລະ 14 ມາດຕາ.
ໃນນັ້ນ, ມາດຕາ 1 ໄດ້ ລະບຸວ່າ:
ດຳລັດສະບັບນີ້ ໄດ້ກຳນົດ ຫຼັກການ, ລະບຽບການ ແລະ ມາດຕະການ ເພື່ອເປັນບ່ອນອີງໃຫ້ ການຈັດຕັ້ງພັກ – ລັດ, ແນວລາວສ້າງຊາດ, ສະຫະພັນນັກຮົບເກົ່າ ແຫ່ງຊາດ, ອົງການຈັດຕັ້ງມະຫາຊົນ ຂັ້ນສູນກາງ ແລະ ທ້ອງຖິ່ນ ໃນການຈັດຕັ້ງປະຕິບັດແນໃສ່ຄຸ້ມຄອງ ແລະ ສຶກສາອົບຮົມໃຫ້ ພະນັກງານ – ລັດຖະກອນ ມີຄຸນທາດການເມືອງ, ຄຸນສົມບັດສິນທຳປະຕິວັດ ໜັກແໜ້ນ, ມີຄວາມຮັບຜິດຊອບສູງ ຕໍ່ໜ້າທີ່ວຽກງານຂອງຕົນ, ມີສະຕິຕື່ນຕົວເຄົາລົບ, ປະຕິບັດກົດໝາຍ ແລະ ລະບຽບການ ຢ່າງເຂັ້ມງວດ; ພ້ອມທັງ ມີປະສິດທິພາບ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ ໃຫ້ຈະເລີນຮຸ່ງເຮືອງກ້າວຂຶ້ນ ຢ່າງບໍ່ຢຸດຢັ້ງ.