ກອງປະຊຸມໃຫຍ່ ຄັ້ງທີ IV ຂອງໜ່ວຍພັກກົມ ຮ່ວມມືສາກົນ ກະຊວງແຜນການ ແລະ ການລົງທຶນ ໄດ້ຈັດຂຶ້ນໃນວັນທີ 6 ສິງຫາ 2019, ໂດຍການເຂົ້າຮ່ວມຂອງ ສະຫາຍ ປອ ສຸພັນ ແກ້ວມີໄຊ ກໍາມະການສູນກາງພັກ ເລຂາຄະນະບໍລິຫານງານພັກ ລັດຖະມົນຕີກະຊວງແຜນການ ແລະ ການລົງທຶນ, ມີເລຂາໜ່ວຍພັກ, ຜູ້ແທນສົມບູນ-ສໍາຮອງ, ແຂກຮັບເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ນາງ ສີສົມບູນ ອຸນາວົງ ຄະນະບໍລິຫານງານພັກກະຊວງ ເລຂາໜ່ວຍພັກກົມຮ່ວມມືສາກົນ ໄດ້ລາຍ ງານວ່າ: ໃນໄລຍະ 5 ປີຜ່ານມາ, ໄດ້ເອົາໃຈໃສ່ນໍາພາ-ຊີ້ນໍາດ້ານວຽກງານວິຊາສະເພາະຕາມພາລະບົດບາດທີ່ໄດ້ຮັບມອບໝາຍ, ເຊິ່ງມີຜົນສໍາເລັດສະແດງອອກ ຄື: ສາມາດບັນລຸເປົ້າໝາຍຢ່າງເປັນຮູບປະທໍາ ເປັນຕົ້ນແມ່ນ ບັນລຸເປົ້າໝາຍສະຫັດສະວັດດ້ານການພັດທະນາໃນປີ 2015, ເປົ້າໝາຍຫຼຸດພົ້ນອອກຈາກສະຖານະພາບດ້ອຍພັດທະນາໃນປີ 2024 ແລະ ເປົ້າໝາຍພັດທະນາແບບຍືນຍົງໃນປີ 2030 ໂດຍເຮັດວຽກຮ່ວມມືກັບຕ່າງປະ ເທດບົນພື້ນຖານຕ່າງຝ່າຍຕ່າງມີຜົນປະໂຫຍດ, ບໍ່ແຊກແຊງເຂົ້າກິດຈະການພາຍໃນຂອງກັນແລະກັນ, ເປີດກວ້າງການພົວພັນຮ່ວມມືເສດຖະກິດກັບຕ່າງປະເທດ ແລະ ການຮ່ວມມືເພື່ອການພັດທະນາກັບບັນດາປະເທດເພື່ອນມິດ ຍຸດທະສາດ ແລະ ທຶນການຊ່ວຍເຫຼືອສົກປີ 2014-2018 ສາມາດຈັດຕັ້ງປະຕິບັດໄດ້ 4.233,99 ລ້ານໂດລາສະຫັດ. ໃນນັ້ນ, ຊ່ວຍເຫຼືອລ້າ ຈໍານວນ 1.620,77 ລ້ານ ໂດລາສະຫະລັດ ແລະ ກູ້ຢືມ 2.614,22 ລ້ານໂດລາສະຫະລັດ.
ຄຽງຄູ່ກັນນີ້, ຍັງໄດ້ດໍາເນີນຊີວິດການເມືອງເປັນປົກກະຕິ ເພື່ອຕໍານິສົ່ງຂ່າວ ແລະ ກໍ່ສ້າງເຊິ່ງກັນແລະ ກັນ, ເອົາ ໃຈໃສ່ນໍາພາ-ຊີ້ນໍາສະມາຊິກໃຫ້ເປັນແບບຢ່າງໃນການປະຕິບັດລະບຽບພັກ ແລະ ຄໍາຂວັນ ໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ, ຍົກລະດັບຄວາມຮູ້-ຄວາມສາມາດໃຫ້ພະນັກງານທັງພາຍໃນ-ຕ່າງປະເທດທາງດ້ານທິດສະດີການເມືອງ ກໍຄືວຽກງານວິຊາສະເພາະຢ່າງເປັນລະບົບ ແລະ ຕໍ່ເນື່ອງທາງດ້ານທິດສະດີຫຼາຍກວ່າ 80% ສ່ວນວິຊາສະເພາະແມ່ນ 90% ຂຶ້ນໄປ; ນອກນັ້ນ, ໜ່ວຍພັກກົມຮ່ວມມືສາກົນ ຍັງໄດ້ຮັບໃບຢັ້ງຢືນໜ່ວຍພັກແຂງ-ຮູ້ນໍາພາຮອບດ້ານ 4 ປີ ຊ້ອນ ແລະ ໄດ້ຮັບໃບຍ້ອງຍໍຫຼາຍປະເພດນໍາອີກ.
ກອງປະຊຸມໄດ້ປ່ອນບັດຄັດເລືອກເອົາຄະນະໜ່ວຍພັກຊຸດໃໝ່, ເຊິ່ງມີຜູ້ລົງສະໝັກ 7 ສະຫາຍ ເລືອກເອົາ 5 ສະຫາຍ ຜ່ານການປ່ອນບັດເລືອກໄດ້ສະຫາຍ ນາງ ສີສົມບູນ ອຸນາວົງ ເປັນເລຂາ, ສະຫາຍ ນາງ ສາຍໝອນຄໍາ ມັງໜໍ່ເມກ ເປັນຮອງເລຂາ, ສະຫາຍ ສີສົມພອນ ເພັດດາວເຮືອງ ເປັນປະທານກວດກາ ແລະ ອີກ 2 ສະ ຫາຍ ເປັນຄະນະໜ່ວຍພັກ.
