ກອງບັນຊາການປ້ອງກັນທີ່ຕັ້ງ ກະຊວງ ປກສ ໄດ້ຈັດ ກອງປະຊຸມ ເປີດບັ້ນດໍາເນີນຊີວິດການເມືອງ ປະຈໍາປີ 2019 ໃນວັນທີ 14 ສິງຫາ 2019 ເປັນປະທານ ໂດຍ ພົຈວ ບົວພັນ ຍໍລະວົງສາ ຄະນະພັກກະຊວງ ຫົວໜ້າກອງບັນຊາການປ້ອງກັນທີ່ຕັ້ງ, ມີບັນດາຮອງເລຂາຄະນະພັກ, ເລຂາ-ຮອງເລຂາໜ່ວຍພັກຮາກຖານ, ຄະນະພັກຮາກຖານ, ໜ່ວຍພັກ, ສະມາຊິກພັກ ແລະ ພະນັກງານຫຼັກແຫຼ່ງພາຍໃນກອງບັນຊາການ ເຂົ້າຮ່ວມ.
ພັທ ນາງ ບຸນທ່ຽງ ພົມແພງມີ ຄະນະພັກກອງບັນຊາການ ຫົວໜ້າຫ້ອງການເມືອງ ກ່າວວ່າ: ການເປີດບັ້ນດໍາເນີນຊີວິດການເມືອງຄັ້ງນີ້ ກໍເພື່ອຍົກສູງຄຸນນະພາບຂອງການຈັດຕັ້ງຮາກຖານພັກ, ກົມກອງ ແລະ ສະມາຊິກພັກ, ພະນັກງານ-ນັກຮົບ, ເພີ່ມທະວີບົດບາດຄວາມສາມາດນໍາພາ-ບັນຊາຂອງຄະນະພັກ-ຄະ ນະບັນຊາຕໍ່ວຽກງານ ແລະ ຕໍ່ກໍາລັງປ້ອງກັນຄວາມສະຫງົບ ໃຫ້ມີບົດບາດກ້າວຂຶ້ນເຮັດສໍາເລັດໜ້າທີ່ຂອງຕົນທີ່ໄດ້ກໍານົດໄວ້ໃນກົດລະບຽບຂອງພັກ, ກົດໝາຍຂອງລັດ, ສ້າງກົມກອງໃຫ້ປອດໃສ, ເຂັ້ມແຂງ, ໜັກແໜ້ນ, ຍົກສູງຄວາມສາມັກຄີ, ຄວາມສາມາດ, ຄວາມຮັບຜິດຊອບ, ແບບແຜນວິທີເຮັດວຽກ, ລະບຽບວິໄນໃຫ້ແກ່ກໍາລັງປ້ອງກັນຄວາມສະຫງົບເວົ້າລວມ, ເວົ້າສະເພາະແມ່ນຢູ່ພາຍໃນກອງບັນຊາການປ້ອງກັນທີ່ຕັ້ງໃຫ້ມີຄວາມເຂັ້ມແຂງຂຶ້ນຕື່ມອີກບາດກ້າວໜຶ່ງ.
ບັ້ນດໍາເນີນຊີວິດການເມືອງຄັ້ງນີ້, ຈະໄດ້ຄົ້ນຄວ້າ, ເຊື່ອມຊຶມບັນດາເອກະສານສໍາຄັນຕ່າງໆ ເປັນຕົ້ນເອກະສານຄໍາສັ່ງແນະນໍາຂອງຄະນະບໍລິຫານງານພັກ ກະຊວງປ້ອງກັນຄວາມສະຫງົບ ສະບັບເລກທີ 03/ຄພ.ປກສ, ລົງວັນທີ 12 ພະຈິກ 2018 ວ່າດ້ວຍການເພີ່ມທະວີການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນໃນກໍາລັງປ້ອງກັນຄວາມສະຫງົບ; ຝຶກຝົນຫຼໍ່ຫຼອມ ຄຸນສົມບັດ-ສິນທໍາປະຕິວັດ ຂອງພະນັກງານ-ນັກຮົບໃນໄລຍະໃໝ່, ປັບປຸງແບບແຜນວິທີເຮັດວຽກ ແລະ ຍົກສູງຄວາມສາມາດນໍາພາ ຂອງພະນັກງານຂັ້ນຕ່າງໆ, ແນະນໍາຮ່າງບົດສະຫຼຸບ, ຮ່າງຂຽນໃບສໍາຫຼວດຂອງບຸກຄົນຢ່າງເປັນລາຍລັກອັກສອນ ແລະ ຕີລາຄາຄຸນນະພາບແບ່ງປະເພດຂອງຕົນເອງ, ແນະນໍາການສະຫຼຸບ-ສັງລວມຕີລາຄາຄຸນນະພາບ, ແບ່ງປະເພດສະມາຊິກພັກ ແລະ ໜ່ວຍພັກ, ແນະນໍາແບບຟອມສັງລວມ ຄະແນນສຽງຕີລາຄາຄຸນນະພາບຂອງສະມາຊິກພັກ ແລະ ສະມາຊິກພັກ, ດໍາເນີນການສໍາຫຼວດກວດກາ, ຜ່ານໃບສໍາຫຼວດຕົນເອງຂອງສະມາຊິກພັກ, ພະນັກງານ-ນັກຮົບ ແລະ ຕີລາຄາຄຸນນະ ພາບ ແລະ ຈັດແບ່ງປະເພດຂອງບຸກຄົນ ແລະ ໜ່ວຍພັກ, ສັງລວມຄະແນນສຽງຕີລາຄາຄຸນນະພາບ ແລະ ແບ່ງປະເພດສະມາຊິກພັກ, ໜ່ວຍພັກ, ສະຫຼຸບລາຍງານຜົນການຕີລາຄາຄຸນນະພາບ ແລະ ຈັດແບ່ງປະເພດຂອງສະມາຊິກພັກ ແລະ ໜ່ວຍພັກ.