ວັນທີ 14 ສິງຫາ 2019, ທີ່ສະໂມສອນເມືອງອະນຸວົງ ທີມງານ ກະຊວງແຮງງານ ແລະ ສະຫວັດດີການສັງຄົມ ລົງພົບປະຢ້ຽມຢາມ ແລະ ເຮັດວຽກຢູ່ແຂວງໄຊສົມບູນ ນຳພາໂດຍ ທ່ານ ຄຳປີງ ແສງຕານນະລາດ ຫົວໜ້າກົມນະໂຍບາຍ ກະຊວງແຮງງານ ແລະ ສະຫວັດດີການສັງຄົມ ພ້ອມດ້ວຍທີມງານ; ໃຫ້ກຽດຕ້ອນຮັບໂດຍ ທ່ານ ສົມບູນສອນ ລິດທິເດດ ຫົວໜ້າພະແນກແຮງງານ ແລະ ສະຫວັດດີການສັງຄົມແຂວງ ພ້ອມດ້ວຍຄະນະ ແລະ ພະນັກງານ-ວິຊາການຢ່າງອົບອຸ່ນ.
ໃນພິທີ, ທ່ານ ສົມບູນ ສອນລິດ ທິເດດ ໄດ້ຂຶ້ນລາຍງານການຈັດຕັ້ງປະຕິບັດວຽກງານຂອງພະແນກແຮງງານ ແລະ ສະຫວັດດີການສັງຄົມ 6 ເດືອນຕົ້ນປີ ແລະ ແຜນການເຄື່ອນໄຫວ 6 ເດືອນທ້າຍປີ 2019 ແລະ ແຜນການປີ 2020; ຈາກນັ້ນ, ຜູ້ເຂົ້າຮ່ວມກອງປະຊຸມຍັງໄດ້ຜັດປ່ຽນກັນປະກອບຄໍາຄິດເຫັນຕໍ່ກັບບົດລາຍງານຢ່າງກົງໄປ-ກົງມາ ເພື່ອໃຫ້ເນື້ອໃນຄົບຖ້ວນ ແລະ ສົມບູນຍິ່ງຂຶ້ນ.
ໃນໂອກາດຂອງການລົງພົບປະຢ້ຽມຢາມ ແລະ ເຮັດວຽກໃນຄັ້ງນີ້, ທ່ານ ຄຳປີງ ແສງຕານນະລາດ ຍັງໄດ້ໂອ້ລົມຕໍ່ພະນັກງານຫຼັກແຫຼ່ງຂອງພະແນກແຮງງານ ແລະ ສະຫວັດດີການສັງຄົມ ຈົ່ງພ້ອມກັນເອົາໃຈໃສ່ປະຕິບັດໜ້າທີ່ການເມືອງຂອງຕົນດ້ວຍຄວາມຮັບຜິດຊອບສູງ, ມີສະຕິຕໍ່ການຈັດຕັ້ງ, ມີວິໄສທັດທີ່ກວ້າງຂວາງ ແລະ ຜູກມັດກັບບັນດາພະແນກການ, ອົງການ, ກົມກອງອ້ອມຂ້າງແຂວງໃຫ້ນັບມື້ນັບຫຼາຍຂຶ້ນ.
ພ້ອມນີ້, ທາງທີມງານຍັງໄດ້ມອບເຄື່ອງອຸປະໂພກ-ບໍລິໂພກຈຳນວນໜຶ່ງໃຫ້ພະແນກແຮງງານ ແລະ ສະຫວັດດີການສັງຄົມແຂວງ, ເຄື່ອງທີ່ນຳມາມອບໃນຄັ້ງນີ້ມີ: ເຂົ້າສານຈາກກອງທຶນ KR1 (ເຄອາໜຶ່ງ) ຈຳນວນ 10.572 ກິໂລກຼາມ, ເຄື່ອງນຸ່ງຫົ່ມ ແລະ ເກີບຈາກ ສ ເກົາຫຼີ ຈຳນວນ 100 ແກັດ.