ກະຊວງພາຍໃນ ໄດ້ຈັດ ກອງປະຊຸມຄົ້ນຄວ້າຮ່າງດຳລັດ ວ່າດ້ວຍການແຕ່ງດອງລະຫວ່າງພົນລະເມືອງລາວ ກັບຄົນຕ່າງປະເທດ ( ສະບັບປັບປຸງ 2019) ໃນລະຫວ່າງວັນທີ 20-21 ສິງຫານີ້, ໂດຍການເປັນປະທານຂອງ ທ່ານ ສີພຸກ ວົງພັກດີ ຮອງລັດຖະມົນຕີ ກະຊວງພາຍໃນ, ມີ ພົຈວ ບຸນມີ ແສງຄໍາຢອງ ຫົວໜ້າກົມໃຫຍ່ສັນຕິບານ ກະຊວງ ປກສ ແລະ ຜູ້ຕາງໜ້າບັນດາຫົວໜ້າ-ຮອງຫົວໜ້າກົມ, ຫົວໜ້າພະ ແນກ, ປກສ ນະຄອນຫຼວງວຽງຈັນ ພ້ອມດ້ວຍບັນດາແຂວງ ໃນຂອບເຂດທົ່ວປະເທດ ເຂົ້າຮ່ວມ.
ທ່ານ ສີພຸກ ວົງພັກດີ ໄດ້ກ່າວໃນກອງປະຊຸມວ່າ: ການຈັດກອງປະຊຸມໃນຄັ້ງນີ້ ແມ່ນເພື່ອປັບປຸງຂະບວນການຂໍອະນຸມັດແຕ່ງດອງໃຫ້ສັ້ນລົງກວ່າເກົ່າ, ໃຫ້ມີເນື້ອໃນຮັດກຸມ, ຄົບຖ້ວນ, ຊັດເຈນ, ເປັນເອກະພາບກັນ ແລະ ສອດຄ່ອງກັບພາລະບົດບາດຂອງຂະແໜງການທີ່ກ່ຽວຂ້ອງຕາມທີ່່ກໍານົດໃນກົດໝາຍ ແລະ ປັບປຸງຂອດການປະສານສົມທົບລະຫວ່າງຂະແໜງການທີ່ກ່ຽວຂ້ອງໃຫ້ກົມກຽວ. ພ້ອມທັງ ເພື່ອຈັດຕັ້ງປະຕິບັດສົນທິສັນຍາສາກົນທີ່ ສປປ ລາວ ເຂົ້າເປັນພາຄີກ່ຽວກັບວຽກງານສິດທິມະນຸດ, ສິດທິເດັກ, ຂໍ້ຕົກລົງສາກົນ ວ່າດ້ວຍການແຕ່ງດອງ ແລະ ຖະແຫຼງການພາກພື້ນອາຊີ-ປາຊີຟິກ ການຈົດທະບຽນ ແລະ ກຳສະຖິຕິພົນລະເມືອງ ໃຫ້ມີປະສິດທິພາບ ແລະ ປະສິດທິຜົນ; ເຊິ່ງຮ່າງດຳລັດ ວ່າດ້ວຍ ການແຕ່ງດອງ ລະຫວ່າງ ພົນລະເມືອງລາວ ກັບ ຄົນຕ່າງປະເທດ ປະກອບມີ 6 ໝວດ ກັບ 28 ມາດຕາ ໂດຍກົດຮ່າງດໍາລັດ ຈະໄດ້ກໍານົດກ່ຽວກັບນະໂຍບາຍຂອງລັດ, ຫຼັກການ ກ່ຽວກັບການແຕ່ງດອງ, ເງື່ອນໄຂໃນການແຕ່ງດອງ, ເອກະສານປະກອບຄຳຮ້ອງຂໍອະນຸມັດການແຕ່ງດອງ ລະຫວ່າງພົນລະເມືອງລາວ ກັບຄົນຕ່າງປະເທດ, ຂັ້ນຕອນຂອງການອະນຸມັດການແຕ່ງດອງ, ການຢືື່ນຄຳຮ້ອງ, ການຈົດທະບຽນ ແລະ ອອກໃບຢັ້ງຢືນ, ສິດ ແລະ ໜ້າທີ່ຂອງພາກສ່ວນທີ່ກ່ຽວຂ້ອງ.
ນອກຈາກນີ້, ທ່ານຍັງໄດ້ຮຽກຮ້ອງໃຫ້ຜູ້ເຂົ້້າຮ່ວມ ຈົ່ງເອົາໃຈໃສ່ເຂົ້າໃນການຄົ້ນຄວ້າ, ປະກອບຄຳຄິດຄຳເຫັນໃສ່ຮ່າງດໍາລັດດັ່ງກ່າວ ຢ່າງກົງໄປ-ກົງມາ ພ້ອມທັງໃຫ້ມີເນື້ອໃນເລິກເຊິ່ງ, ຮັດກຸມ, ຈະແຈ້ງ ແລະ ສອດຄ່ອງກັບການຈັດຕັ້ງປະຕິບັດວຽກງານຕົວຈິງ ເພື່ອຮັບປະກັນໃຫ້ເນື້ອໃນຄົບຖ້ວນ-ຖືກຕ້ອງ ແລະ ມີປະສິດທິພາບສູງ.
 ໃນລະຫວ່າງວັນທີ 20-21 %){kind=link}