ທ່ານ ສຈ ປອ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫຼງຂ່າວວັດທະນະທຳ ແລະ ທ່ອງທ່ຽວ ( ຖວທ ) ພ້ອມດ້ວຍຄະນະ ຢ້ຽມຢາມຄົນເຈັບຈາກອຸບັດຕິເຫດລົດເມຮັບສົ່ງ ນັກທ່ອງທ່ຽວຊາວຈີນຕົກເຫວ ເສັ້ນທາງກາສີ-ເມືອງນານ ໃນວັນທີ 19 ສິງຫາ 2019 ຜ່ານມາ ທີ່ກໍາລັງປິ່ນປົວຢູ່ໂຮງໝໍ 103 ນະຄອນຫຼວງວຽງຈັນ, ໃນວັນທີ 21 ສິງຫາ 2019 ເພື່ອເປັນການຢື້ຢາມຖາມຂ່າວ, ຕິດຕາມອາການ ແລະ ໃຫ້ກຳລັງໃຈຜູ້ທີ່ໄດ້ຮັບບາດເຈັບ, ຄອບຄົວໃຫ້ມີຈິດໃຈທີ່ເຂັ້ມແຂງ, ຍອມຮັບ ແລະ ຜ່ານຜ່າຕໍ່ກັບອຸປະສັກນີ້ໄປໃຫ້ໄດ້.
ພັອ ຈັນທະພອນ ອຸດົມສຸກ ຮອງຜູ້ອຳນວຍການໂຮງໝໍ 103 ໄດ້ລາຍງານວ່າ: ໃນວັນທີ 20 ສິງ ຫາ 2019, ໄດ້ມີຄົນເຈັບຈາກອຸບັດຕິເຫດລົດເມຮັບສົ່ງນັກທ່ອງທ່ຽວຊາວຈີນ ທີ່ໄດ້ຕົກເຫວເສັ້ນທາງກາສີ-ເມືອງນານ ທັງໝົດ 22 ຄົນເຂົ້າມາປິ່ນປົວ, ຮັກສາ ແລະ ຕິດຕາມອາການ. ໃນນັ້ນ, ຢູ່ພະແນກກະທົບກະດູກ ມີ 12 ຄົນ, ພະແນກໂຜ້ງເອິກ 5 ຄົນ, ພະແນກໂຜ້ງທ້ອງ 2 ຄົນ ແລະ ພະແນກ ICU 1 ຄົນ. ສ່ວນຄົນເຈັບອີກ 2 ຄົນ ແມ່ນອາການບາດເຈັບບໍ່ຮ້າຍແຮງ ແລະ ສາມາດກັບບ້ານໄດ້.
ທ່ານ ສຈ ປອ ບໍ່ແສງຄໍາ ວົງດາລາ ໄດ້ຮຽກຮ້ອງໃຫ້ແພດໝໍ ຈົ່ງເອົາໃຈໃສ່ປິ່ນປົວຄົນເຈັບຈໍານວນດັ່ງກ່າວຢ່າງໃກ້ຊິດ, ຕິດຕາມອາກາດ, ປິ່ນປົວຕາມຫຼັກການວິຊາສະເພາະ ໃຫ້ຄົນເຈັບທຸກຄົນຫາຍດີ ແລະ ກັບຄືນເປັນປົກກະຕິໂດຍໄວ. ພ້ອມນັ້ນ, ທ່ານກໍໄດ້ກ່າວຕໍ່ຄົນເຈັບໃຫ້ມີຄວາມອົດພະຍາຍາມ, ເຊື່ອຟັງ ແລະ ປະຕິບັດ
ຕາມການບອກຂອງແພດໝໍໃຫ້ເຂັ້ມງວດ ແລະ ກໍໃຫ້ທຸກຄົນ ຈົ່ງປິ່ນປົວຈົນກວ່າຫາຍດີຈຶ່ງກັບບ້ານຂອງຕົນ.