ກົມໃຫຍ່ການເມືອງ ປກສ ປາຖະກະ ຖາວັນ ລັດຖະທຳມະນູນ ແລະ ວັນຍຶດອຳນາດ

ກົມໃຫຍ່ການເມືອງ ກະຊວງ ປກສ ໄດ້ຈັດຕັ້ງ ປາຖະກະຖາວັນ ລັດຖະທຳມະນູນແຫ່ງ ສປປ ລາວ ແລະ ວັນຍຶດອຳນາດ 23 ສິງຫາ ເພື່ອໃຫ້ບັນດາຄະນະພັກ-ຄະນະບັນຊາ, ພະນັກງານຫຼັກແຫຼ່ງກົມກອງອ້ອມຂ້າງກົມໃຫຍ່ການເມືອງ ເຊື່ອມຊຶມກຳແໜ້ນເນື້ອໃນສ້າງສະຕິເຄົາລົບກົດໝາຍ ເພື່ອນຳມາຜັນຂະຫຍາຍເຂົ້າໃນການປະຕິ ບັດໜ້າທີ່, ການດຳລົງຊີວິດໃນປັດຈຸບັນ, ພ້ອມທັງຮັບຮູ້ເຖິງມູນເຊື້ອຄວາມເສຍສະລະຂອງບັນພະບູລຸດ ແລະ ປະຊາຊົນໃນເມື່ອກ່ອນ ເພື່ອຍາດເອົາຄວາມເປັນເອກະລາດ, ເສລີພາບ ແລະ ຄວາມຢູ່ດີກິນດີມາສູ່ປະຊາຊົນໃນປັດຈຸບັນ.

ການປາຖະກະຖາດັ່ງກ່າວ ໄດ້ມີຂຶ້ນວັນທີ 30 ສິງຫາ 2019, ພົຈວ ອຸ່ນຫຼ້າ ວົງພະຈັນ ຮອງຫົວໜ້າກົມໃຫຍ່ການເມືອງ ກະຊວງ ປກສ ໃຫ້ຮູ້ວ່າ: ລັດຖະທຳມະນູນແຫ່ງ ສປປ ລາວ ສະບັບທຳອິດ ໄດ້ຮັບການປະກາດໃຊ້ໃນວັນ 15 ສິງຫາ 1991 ມາເຖິງປີນີ້ແມ່ນໝູນວຽນມາບັນຈົບ ຄົບຮອບ 28 ປີ ໃນປີ 2019 ສປປ ລາວ ໄດ້ຫັນລັດຖະທຳມະນູນເປັນກົດໝາຍແຕ່ລະຂົງເຂດ ແລະ ແຕ່ລະກະຊວງປະກາດໃຊ້ ໄດ້ທັງໝົດ 144 ສະບັບ, ນິຕິກຳລຸ່ມກົດໝາຍ ( ລັດຖະບັນຍັດ ແລະ ດຳລັດ ) ໄດ້ຫຼາຍຮ້ອຍສະບັບເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ນັບມື້ເປັນລະບົບຄົບຊຸດເທື່ອລະກ້າວ, ເປັນພື້ນຖານຄໍ້າປະກັນໃຫ້ແກ່ການປະຕິບັດ ແລະ ເສີມຂະຫຍາຍສິດ ເປັນເຈົ້າຂອງປະຊາຊົນບັນດາເຜົ່າ. ໃນນີ້, ມີກົດໝາຍທີ່ກະຊວງ ປກສ ປະ ກາດໃຊ້ 5 ສະບັບ, ເຊິ່ງສະບັບຫຼ້າສຸດແມ່ນກົດໝາຍ ວ່າດ້ວຍກຳລັງປ້ອງກັນຄວາມສະຫງົບປະຊາຊົນ ສະບັບປັບປຸງປີ 2017.

ສໍາລັບວັນຍຶດອໍານາດ 23 ສິງ ຫາ 1945 ແລະ 23 ສິງຫາ 1975, ທ່ານຮອງຫົວໜ້າກົມໃຫຍ່ການເມືອງ ປກສ ໃຫ້ຮູ້ວ່າ: ປີ 1930 ພັກກອມມູນິດອິນດູຈີນ ໄດ້ກຳເນີດເກີດຂຶ້ນ, ພາຍໃຕ້ການນຳພາຂອງພັກປະຕິວັດດັ່ງກ່າວ ໄດ້ນຳພາປະຊາຊົນລາວ ລຸກຂຶ້ນຕໍ່ສູ້ເພື່ອຄວາມເປັນເອກະລາດເສລີພາບ ແລະ ຄວາມຢູ່ດີກິນດີຂອງຕົນ ດ້ວຍຄວາມເສຍສະລະ ສາມາດ ຍຶດອຳນາດການປົກຄອງໃນທົ່ວ ປະເທດຕ້ານກັບພວກລ່າເມືອງຂຶ້ນຝຣັ່ງ ໃນວັນທີ 23 ສິງຫາ 1945.

ພາຍຫຼັງພວກລ່າເມືອງຂຶ້ນຝຣັ່ງ ຖືກປະລາໄຊ, ຈັກກະພັດອາເມລິກາ ກໍໄດ້ກະໂດດເຂົ້າມາແທນດຳເນີນການແຊກແຊງ ແລະ ຮຸກຮານປະເທດລາວໂດຍທັນທີ; ຕໍ່ສະພາບຄວາມຮຽກຮ້ອງຕ້ອງການຂອງການຕໍ່ສູ້ ເພື່ອຕີເອົາຊະນະ ສັດຕູຜູ້ຮຸກຮານ, ວັນທີ 22 ມີນາ 1955 ພັກປະຊາຊົນ ປະຕິວັດລາວ ໄດ້ຮັບການສ້າງຕັ້ງຂຶ້ນ ເພື່ອ ນຳພາປະຊາຊົນລາວບັນດາເຜົ່າດຳເນີນການຕໍ່ສູ້ກູ້ຊາດຕ້ານອາເມລິກາ ໂດຍນຳໃຊ້ 3 ບາດຄ້ອນຍຸດທະສາດ ຄື: ( ການລຸກຮື້ຂຶ້ນຂອງມະຫາຊົນ, ການໜູນໜີບຂອງກຳລັງປະກອບອາວຸດປະຕິວັດ, ການແຍກຕົວອອກຂອງກຳລັງທະຫານສັດຕູ ) ຈົນສາມາດຍຶດອຳນາດການປົກຄອງປະຕິວັດໃນທົ່ວປະ ເທດ ໃນວັນທີ 23 ສິງຫາ 1975 ຢ່າງສົມບູນ.