ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ຮ່ວມກັບ ອົງການໂທລະຄົມມະ ນາຄົມອາຊີ-ປາຊີຟິກ (Asia-Pacific Tele community, APT) ໄດ້ຈັດກອງປະຊຸມສໍາມະນາ ແລະ ເປີດນໍາໃຊ້ລະບົບອິນເຕີເນັດ ຟຣີວາຍຟາຍ ເພື່ອສົ່ງເສີມການທ່ອງທ່ຽວ ແລະ ການສຶກສາ ຢູ່ ສປປ ລາວ ຂຶ້ນໃນວັນທີ 3 ກັນຍາ 2019, ທີ່ ໂຮງແຮມລາວພຣາຊ່າ, ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ປທສ, ແລະ ທ່ານ ນາງ Areewan HAO-RANGSI, ເລຂາທິການໃຫຍ່ອົງການ APT, ມີບັນດາຜູ້ຕາງໜ້າຈາກກົມທຽບເທົ່າພາຍໃນ ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ແຂກຮັບເຊີນຈາກພາກສ່ວນທີ່ກ່ຽວຂ້ອງທັງພາກລັດ ແລະ ເອກະຊົນ ເຂົ້າຮ່ວມ.
ທ່ານ ບຸນສະເຫຼີມໄຊ ເຄນນາວົງ ກ່າວວ່າ: ມີບົດບາດສຳຄັນໃນການພັດທະນາເສດຖະກິດ-ສັງຄົມໃນທຸກໆປະ ເທດ. ໂດຍສະເພາະອິນເຕີເນັດ ໄດ້ມີບົດບາດສຳຄັນໃນຊີວິດປະຈຳວັນຂອງພວກເຮົາ, ເຮັດໃຫ້ຊີວິດການເປັນຢູ່ຂອງພວກເຮົາມີຄວາມທັນສະໄໝ. ປັດຈຸບັນ, ອຸດສາຫະກຳການທ່ອງທ່ຽວໃນປະເທດເຮົາກຳລັງຂະຫຍາຍຕົວໃນແຕ່ລະປີ, ເພື່ອຕອບສະໜອງຄວາມຕ້ອງການໃນການເຂົ້າເຖິງອິນເຕີເນັດໃນທຸກສະຖານທີ່ທ່ອງທ່ຽວໃນປະ ເທດ. ສະເພາະໃນ ສປປ ລາວ, ເຄືອຂ່າຍໂທລະສັບມືຖືກວມເອົາ 94% ແລະ ເຄືອຂ່າຍອິນເຕີເນັດມືຖື ມີເຖິງ 78% ຂອງບ້ານທັງໝົດໃນທົ່ວປະເທດ. ຜູ້ໃຊ້ອິນເຕີເນັດມີເກືອບ 40% ຂອງປະຊາກອນທັງໝົດ, ເຊິ່ງສະແດງໃຫ້ເຫັນການຂະຫຍາຍຕົວຂອງຜູ້ຊົມໃຊ້ສື່ສັງຄົມອອນລາຍໃນລາວເຊັ່ນກັນ.
ກອງປະຊຸມສໍາມະນາຄັ້ງນີ້, ຈັດຂຶ້ນເພື່ອທົບທວນຄືນການຈັດຕັ້ງປະຕິບັດວຽກງານໃນໄລຍະຜ່ານມາ ໂດຍຄະ ນະຮັບຜິດຊອບໂຄງການ ແລະ ເຕັກນິກຊ່ຽວຊານຈາກ ສ.ເກົາຫຼີ, ພ້ອມທັງຍົກໃຫ້ເຫັນເຖິງຄວາມສໍາຄັນໃນການສົ່ງເສີມການນໍາໃຊ້ຟຣີວາຍຟາຍອິນເຕີເນັດ ເຂົ້າໃນວຽກງານການທ່ອງທ່ຽວ ແລະ ການສຶກສາຢູ່ໃນ ສປປ ລາວ ໂດຍສະເພາະນະຄອນຫຼວງວຽງຈັນ ໄດ້ກໍານົດເອົາການຕິດຕັ້ງລະບົບ 3 ຈຸດ ຄື: ສະໜາມບິນສາກົນວັດໄຕ, ສວນອາຫານນໍ້າພຸ ແລະ ຫໍພະແກ້ວ.
ຈັດກອງປະຊຸມສໍາມະນາ ແລະ ເປີດນໍາໃຊ້ລະບົບອິນເຕີເນັດ ຟຣີວາຍຟາຍ
ກະຊວງໄປສະນີ, ໂທລະຄົມມະນາຄົມ ແລະ ການສື່ສານ ໄດ້ຮັບການຊ່ວຍເຫຼືອຈາກອົງການໂທລະຄົມມະນາ ຄົມອາຊີ-ປາຊີຟິກ ຫຼື APT ໃນການສະໜອງງົບປະມານ ເພື່ອຈັດຕັ້ງປະຕິບັດໂຄງການສົ່ງເສີມການນໍາໃຊ້ຟຣີ ວາຍຟາຍອິນເຕີເນັດ ເພື່ອສົ່ງເສີມການທ່ອງທ່ຽວໃນລາວ ແລະ ສ້າງສິ່ງອໍານວຍຄວາມສະດວກໃຫ້ແກ່ນັກທ່ອງ ທ່ຽວ ໃນການຊົມໃຊ້ອິນເຕີເນັດແບບບໍ່ເສຍຄ່າເປັນທາງເລືອກທີ່ດີອີກທາງໜຶ່ງ; ເຊິ່ງໂຄງການນີ້ຖືເປັນການເລີ່ມ ຕົ້ນທໍາອິດທີ່ເຮັດໃຫ້ ສປປ ລາວ ໂດຍສະເພາະນະຄອນຫຼວງວຽງຈັນ ໄດ້ມີຟຣີອິນເຕີເນັດ ທີ່ນໍາໃຊ້ໃນເຂດສະ ຖານທີ່ທ່ອງທ່ຽວສໍາຄັນ ເປັນຕົ້ນສະໜາມບິນສາກົນວັດໄຕ, ສວນສາທາລະນະນໍ້າພຸໃຈກາງເມືອງ ແລະ ບໍລິ ເວນພິພິທະພັນຫໍພະແກ້ວ, ເຊິ່ງເປັນໄລຍະທົດລອງການໃຫ້ບໍລິການແບບບໍ່ເສຍຄ່າເປັນເວລາໜຶ່ງປີນັບ ແຕ່ມື້ເປີດນຳໃຊ້.
ໃນຕອນທ້າຍກອງປະຊຸມ, ຄະນະປະທານນໍາໂດຍ ທ່ານ ບຸນສະເຫຼີມໄຊ ເຄນນາວົງ, ຮອງລັດຖະມົນຕີກະຊວງໄປສະນີ ໂທລະຄົມມະນາຄົມ ແລະ ການສື່ສານ ແລະ ທ່ານ ນາງ Areewan HAORAGSI, ເລຂາທິການ ໃຫຍ່ອົງການໂທລະຄົມມະນາ ຄົມອາຊີ-ປາຊີຟິກ (APT) ໄດ້ໃຫ້ກຽດຮ່ວມກັນຕັດແຖບຜ້າເປີດນໍາໃຊ້ຟຣີວາຍຟາຍອິນເຕີເນັດ (MPT public free-wifi) ໃນສະຖານທີ່ທ່ອງທ່ຽວດັ່ງກ່າວຢ່າງເປັນທາງການ.
