ໃນລະຫວ່າງວັນທີ 2 ກັນຍາ ເປັນຕົ້ນມາ, ເກີດມີຝົນຕົກໜັກໃນຫຼາຍພື້ນທີ່ ຢູ່ເຂດພາກກາງ ແລະ ພາກໃຕ້ຂອງລາວ ເນື່ອງຈາກໄດ້ຮັບອິດທິພົນຈາກ ພາຍຸເດີເປຼຊັນ ທີ່ພັດຜ່ານ. ໃນນັ້ນ, ໜັກກວ່າໝູ່ແມ່ນ ແຂວງສາລະວັນ ໂດຍສະເພາະກໍແມ່ນ ເມືອງຄົງເຊໂດນ, ເທດສະບານເມືອງສາລະວັນ ເຊິ່ງກະແສນໍ້າໄດ້ໄຫຼເຂົ້າຖ້ວມເຮືອນຊານ, ເນື້ອທີ່ນາ ແລະ ຖະໜົນຫົນທາງເປ່ເພເສຍຫາຍ ເຊິ່ງບາງບ່ອນຈົນບໍ່ສາມາດສັນຈອນໄດ້.
ປັດຈຸບັນ, ປະຊາຊົນເມືອງຄົງເຊໂດນ ຕ້ອງການຄວາມຊ່ວຍເຫຼືອເປັນການດ່ວນ ເປັນຕົ້ນແມ່ນ ນໍ້າດື່ມ, ເຄື່ອງນຸ່ງຫົ່ມ ແລະ ອາຫານແຫ້ງ. ຍິ່ງໄປກວ່ານັ້ນ, ຍັງມີປະຊາຊົາຈຳນວນໜຶ່ງ ຍັງຕິດຄ້າງຢູ່ເຮືອນ ອອກມາບໍ່ໄດ້; ສະນັ້ນ, ສຳຫຼັບທ່ານໃດທີ່ມີອຸປະກອນ ແລະ ເຄື່ອງຊ່ວຍເຫຼືອ ສາມາດບໍລິຈາກໄດ້ ທີ່ ຫ້ອງການປົກຄອງເມືອງຄົງເຊໂດນ.
ຂະນະທີ່, ການນຳເມືອງຄົງເຊໂດນ ກໍໄດ້ເລັ່ງຍົກຍ້າຍປະຊາຊົນ ໃນກຸ່ມເທດສະບານ, ກຸ່ມຄຳທອງ, ກຸ່ມແກ້ງຫວດ, ກຸ່ມແກ້ງໂຄນ ໃຫ້ອອກຈາກບ້ານເຮືອນເປັນການດ່ວນທີ່ສຸດ ເນື່ອງຈາກນໍ້າມາແຮງ ແລະ ໃຫ້ໄປຢູ່ບ່ອນສູງ ຫຼື ຍ້າຍເຂົ້າໄປໃນເຂດຕົວເມືອງ, ສະໂມສອນຫ້ອງວ່າການ ແລະ ສຳນັກງານອົງການ ທີ່ປອດໄພ ເປັນການດ່ວນ.
