ໃນອາທິດແຜ່ານມາ, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍຄະນະ ໄດ້ລົງຢ້ຽມຢາມ ແລະ ຊຸກຍູ້ຂະບວນການປູກພືດລະດູຝົນ (ຜັກເຮືອນຮົ່ມ) ຢູ່ບ້ານນາແກ່ນຄໍາ ເມືອງຫົງສາ ແຂວງໄຊຍະບູລີ, ໃຫ້ການຕ້ອນຮັບ ແລະ ນໍາພາລົງພື້ນທີ່ທໍາການຜະລິດໂດຍ ທ່ານ ຄໍາຫຼ້າ ຜິວວັນນາ ເຈົ້າເມືອງໆຫົງສາ, ມີພະນັກງານວິຊາການ ແລະ ປະຊາຊົນຊາວກະສິກອນ ພາຍໃນບ້ານດັ່ງກ່າວເຂົ້າຮ່ວມ.
ການລົງຢ້ຽມຢາມໃນຄັ້ງນີ້ແມ່ນໄດ້ຮັບຟັງການລາຍງານຫຍໍ້ຂອງບັນດາສະຫະກອນສົ່ງເສີມກະສິກໍາ ຈາກຕາງໜ້າກຸ່ມ, ສະຫະກອນສົ່ງເສີມກະສິກໍາເມືອງຫົງສາ ເກີດຂຶ້ນຈາກການເຕົ້າໂຮມເອົາ 10 ກຸ່ມຜະລິດ ຄື: ກຸ່ມພັດທະນາໄມ້ປ່ອງ, ກຸ່ມສົ່ງເສີມກະສິກໍາສະອາດ, ກຸ່ມຕັດຫຍິບ, ກຸ່ມປຸງແຕ່ງຜົນຜະລິດກະສິ ກໍາ, ກຸ່ມປູກຝ້າຍພື້ນເມືອງ, ກຸ່ມປູກພືດຜັກສະອາດ, ກຸ່ມປູກເຫັດ, ກຸ່ມລ້ຽງສັດ ໃຫຍ່, ກຸ່ມລ້ຽງໝູລາດ ແລະ ກຸ່ມປຸງແຕ່ງຜະລິດຕະພັນແຈ່ວ; ເຊິ່ງລວມມີ 138 ຄອບຄົວ ຈາກ 4 ບ້ານ ເຊັ່ນ: ບ້ານນາແກ່ນຄໍາ, ສີມຸງຄຸນ, ໂພນຈັນ ແລະ ບ້ານຫານ, ປັດຈຸບັນ ສະຫະກອນແມ່ນກຸ່ມປູກພືດຜັກສະອາດ ໂດຍໄດ້ເລັ່ງໃສ່ໃນການປູກຜັກບົ່ວ ແລະ ຜັກຫອມປ້ອມໃນເຮືອນຮົ່ມ ເຊິ່ງມີຈໍານວນເຮືອນຮົ່ມ 38 ຫຼັງ, ສ່ວນກຸ່ມອື່ນກໍສືບຕໍ່ຜະລິດຢ່າງເປັນຂະບວນ, ສ່ວນຜົນຜະລິດຕ່າງໆແມ່ນສົ່ງປ້ອນຕະຫຼາດເມືອງຫົງສາ, ເມືອງເງິນ ແລະ ແຂວງຫຼວງພະບາງ
ຈໍານວນໜຶ່ງ, ສາມາດສ້າງລາຍຮັບເຂົ້າແຕ່ລະກຸ່ມ ໄດ້ 76 ລ້ານກວ່າກີບຕໍ່ເດືອນ; ສະຫະກອນດັ່ງກ່າວ ໄດ້ຮັບການສະໜັບສະໜູນຈາກ ບໍລິສັດ HPC ປະກັນຊີວິດ ແລະ ບໍລິສັດ ໄຟຟ້າຫົງສາ.
ໂອກາດດັ່ງກ່າວ, ທ່ານ ເຈົ້າແຂວງໆໄຊຍະບູລີ ໄດ້ຊີ້ນໍາ ແລະ ຮຽກຮ້ອງໃຫ້ສະມາຊິກແຕ່ລະກຸ່ມ ແລະ ປະຊາຊົນພາຍໃນບ້ານນາແກ່ນຄໍາ ຈົ່ງສືບຕໍ່ເສີມຂະຫຍາຍມູນເຊື້ອດຸໝັ່ນໃນການອອກແຮງງານ ແລະ ເອົາໃຈໃສ່ໃນການບົວລະບັດຮັກສາພືດລະດູຝົນ, ພ້ອມທັງຂະຫຍາຍເນື້ອທີ່ການປູກໃຫ້ກວ້າງຂວາງ ເພື່ອຮັບປະກັນພຽງພໍໃນຄວາມຕ້ອງ ການຂອງຕະຫຼາດພາຍໃນ ແລະ ຕ່າງແຂວງ; ສືບຕໍ່ປຸງແຕ່ງຜະລິດຕະພັນກະສິກໍາໃຫ້ໄດ້ມາດຕະຖານ ແລະ ຄຸນນະພາບ ເພື່ອສົ່ງອອກ; ເອົາໃຈໃສ່ຕໍ່ບັນຫາປະກົດການຫຍໍ້ທໍ້ພາຍໃນບ້ານ ເຊັ່ນ: ບັນຫາຢາເສບຕິດ, ອາລະວາດຄອບຄົວ, ອຸບັດຕິເຫດຕາມທ້ອງຖະໜົນ, ໂສເພນີ, ການປະ-ຢ່າຮ້າງ ແລະອື່ນໆ ໃຫ້ມີຄວາມສະຫງົບ ໂດຍເລີ່ມຈາກການສຶກສາອົບຮົມແຕ່ຂັ້ນຄອບຄົວ ເພື່ອໃຫ້ລູກຫຼານຮູ້ ແລະ ເຂົ້າໃຈຕໍ່ຜົນຮ້າຍຂອງຢາເສບຕິດ; ເອົາໃຈໃສ່ຕໍ່ວຽກງານວັດທະນະທໍາ-ສັງຄົມ ເປັນຕົ້ນແມ່ນ ສືບຕໍ່ແກ້ໄຂການສຶກສາ ໂດຍລະດົມໃຫ້ແຕ່ລະຄອບຄົວ ສົ່ງ ເສີມລູກຫຼານໃຫ້ໄດ້ເຂົ້າຮຽນຕາມເກນ ອາຍຸ ແລະ ໄດ້ຮຽນຕໍ່ວິຊາຊີບ, ຫຼີກລ່ຽງການປະລະການຮຽນ; ໂຄສະນາສຸຂະ ສຶກສາ ເພື່ອຕ້ານ ແລະ ສະກັດກັ້ນການລະບາດຂອງພະຍາດຕາມລະດູການ; ເກັບກໍາສະຖິຕິແຮງງານທີ່ໄປອອກແຮງງານນໍາບໍລິສັດໄຟຟ້າ, ໄປອອກແຮງງານຢູ່ຕ່າງປະເທດຂອງແຕ່ລະຄອບຄົວໃຫ້ລະອຽດ, ຈະແຈ້ງ ເພື່ອເຮັດໃຫ້ການຄຸ້ມຄອງມີຄວາມສະດວກ ແລະ ເອົາໃຈໃສ່ປັບປຸແບບແຜນນໍາພາ ແລະ ແບບແຜນວິທີເຮັດວຽກຂອງຄະນະບ້ານ ແນໃສ່ເຮັດໃຫ້ເສດຖະກິດຂອງບ້ານ ກໍຄືເມືອງຫົງສາ ເຕີບໃຫຍ່ເຂັ້ມແຂງຂຶ້ນເລື້ອຍໆ.