ໃນວັນທີ 30 ກັນຍາ 2019, ທ່ານ ເພັດ ພົມພິພັກ ລັດຖະມົນຕີ ຫົວໜ້າຫ້ອງວ່າການ ສຳນັກງານນາຍົກລັດຖະມົນຕີ ໄດ້ຕາງໜ້າລັດຖະບານຮັບເງິນຊ່ວຍເຫຼືອ ຜູ້ປະສົບໄພນໍ້າຖ້ວມ ຈາກກຸ່ມບໍລິສັດ ຄຳໄພຊະນະ ຈຳນວນ 200.000.000 ກີບ, ເຊິ່ງມອບໂດຍ ທ່ານ ຄໍາໄພ ສົມຊະນະ ປະທານກຸ່ມບໍລິສັດດັ່ງກ່າວ ໂດຍມີພະນັກງານທີ່ກ່ຽວຂ້ອງ ແລະ ກຸ່ມບໍລິສັດ ເຂົ້າຮ່ວມ.
ທ່ານ ຄໍາໄພ ສົມຊະນະ ກ່າວວ່າ:
ການນໍາເງິນມາມອບໃນຄັ້ງນີ້ ແມ່ນຈໍານວນ 200.000.000 ກີບ ເພື່ອທີ່ຈະນໍາໄປຊ່ວຍເຫຼືອຜູ້ປະສົບໄພນໍ້າຖ້ວມ ທາງພາກໃຕ້ ພາຍຫຼັງທີ່ໄດ້ຮັບຜົນກະທົບເປັນຈໍານວນຫຼາຍ ແລະ ເພື່ອເປັນການຟື້ນຟູຊີວິດການເປັນຢູ່ຂອງພໍ່-ແມ່ປະຊາຊົນ ເປັນຕົ້ນແມ່ນ ເຮືອນ-ຊານ, ຮົ້ວ-ສວນ, ໄຮ່ນາ ແລະ ແຫຼ່ງທໍາການຜະລິດ ໃຫ້ກັບຄືນສູ່ສະພາບປົກກະຕິໂດຍໄວ. ນອກນີ້, ໃນຕໍ່ໜ້າ ທາງກຸ່ມບໍລິສັດ ແມ່ນຍັງຈະສືບຕໍ່ໃຫ້ການຊ່ວຍເຫຼືອ ທາງດ້ານວັດຖຸ-ປັດໄຈ ເພື່ອນໍາມາມອບໃຫ້ແກ່ລັດຖະບານຕື່ມອີກ.
ໃນໂອກາດນີ້, ທ່ານ ເພັດ ພົມພິພັກ ໄດ້ກ່າວສະແດງຄວາມຂອບໃຈ ແລະ ຊົມເຊີຍຕໍ່ທ່ານປະທານກຸ່ມບໍລິສັດ ທີ່ໄດ້ນຳເອົາເງິນມາມອບ ເພື່ອຊ່ວຍເຫຼືອຜູ້ປະສົບໄພນໍ້າຖ້ວມໃນຄັ້ງນີ້ ແລະ ເງິນຊ່ວຍເຫຼືອດັ່ງກ່າວ ແມ່ນຈະໄດ້ນຳໄປມອບໃຫ້ ກະຊວງແຮງງານ ແລະ ສະຫວັດດີການສັງຄົມ ເພື່ອນຳໄປຊ່ວຍເຫຼືອບັນເທົາທຸກແກ່ ຜູ້ປະສົບໄພນໍ້າຖ້ວມ ໃນປີນີ້.
ການຊ່ວຍເຫຼືອດັ່ງກ່າວ ຈະເປັນກຳລັງໃຈໃຫ້ແກ່ປະຊາຊົນ ແລະ ປະກອບສ່ວນເຮັດໃຫ້ການແກ້ໄຂໄພພິບັດ ກໍຄື ຜົນກະທົບຕໍ່ຊີວິດການເປັນຢູ່ຂອງ ຜູ້ປະສົບໄພນໍ້າຖ້ວມ ຢູ່ທ້ອງຖິ່ນຕ່າງໆ ໃຫ້ສາມາດຜ່ານພົ້ນຄວາມຫຍຸ້ງຍາກໃນຄັ້ງນີ້ໄປໄດ້.
