ຫ້ອງວ່າການ ກະຊວງ ປກສ ໄດ້ຈັດພິທີປະກາດເລື່ອນຊັ້ນໃຫ້ພະນັກງານ ຈໍານວນ 10 ສະຫາຍ ຍິງ 1 ສະຫາຍ ທີ່ມີຜົນງານດີເດັ່ນ ແລະ ຄົບມາດຖານເງື່ອນໄຂໃນການເລື່ອນຊັ້ນ ໃນວັນທີ 25 ຕຸລາ 2019, ປະດັບຊັ້ນໂດຍ ພົຈວ ສົມວັນ ສາຍລ້ອງພາ ຫົວໜ້າຫ້ອງວ່າການ ກະຊວງ ປກສ, ມີ ຄະນະພັກ-ຄະນະບັນຊາ, ຄະນະພະແນກ ແລະ ພະນັກງານທີ່ໄດ້ຮັບການເລື່ອນຊັ້ນ ເຂົ້າຮ່ວມ.
ພັທ ສັກດາ ໄຊຍະສົງຄາມ ຮອງຫົວໜ້າຫ້ອງການເມືອງ ຫ້ອງວ່າການ ກະຊວງ ປກສ ໄດ້ຜ່ານຂໍ້ຕົກລົງ ເລກທີ 2099/ປກສ ລົງວັນທີ 26 ກັນຍາ 2019 ວ່າດ້ວຍ ການເລື່ອນຊັ້ນໃຫ້ພະນັກງານ-ນັກຮົບ ຫ້ອງວ່າການ ກະຊວງ ປກສ ໃນນີ້ມີ:
- ເລື່ອນຊັ້ນ ຮ້ອຍເອກ ຂຶ້ນ ພັນຕີ 1 ສະຫາຍ
- ຮ້ອຍໂທ ຂຶ້ນ ຮ້ອຍເອກ 9 ສະຫາຍ ຍິງ 1 ສະຫາຍ
ເຊິ່ງບັນດາຜູ້ທີ່ໄດ້ຮັບການເລື່ອນຊັ້ນໃນຄັ້ງນີ້ ລ້ວນແຕ່ແມ່ນ ພະນັກງານ-ນັກຮົບທີ່ຄົບມາດຖານເງື່ອນໄຂ ໄດ້ຮັບນະໂຍບາຍເລື່ອນຊັ້ນ ແລະ ແມ່ນຜູ້ທີ່ມີຄວາມຫ້າວຫັນ ໃນການປະຕິບັດໜ້າທີ່ວຽກງານ ມີຜົນສໍາເລັດ.
ໃນຕອນທ້າຍ, ພົຈວ ສົມວັນ ສາຍລ້ອງພາ ໄດ້ເນັ້ນໃຫ້ພະນັກງານທີ່ໄດ້ຮັບການເລື່ອນຊັ້ນໃນຄັ້ງນີ້ ຈົ່ງກໍາແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ ຂອງກໍາລັງປ້ອງກັນຄວາມສະຫງົບ, ມີສະຕິຕໍ່ການຈັດ ຕັ້ງ, ມີສະຕິລະວັງຕົວຕໍ່ກົນອຸບາຍຂອງກຸ່ມຄົນບໍ່ດີ, ມີຄວາມບຸກບືນຫ້າວຫັນ ແລະ ມີຄວາມຮັບຜິດຊອບສູງຕໍ່ໜ້າທີ່ວຽກງານ ທີ່ການຈັດຕັ້ງມອບໝາຍໃຫ້ ພ້ອມທັງຊອກຮູ້ຮໍ່າຮຽນ ເພື່ອພັດທະນາຕົນເອງໃນທຸກດ້ານ ແລະ ເປັນແບບຢ່າງທີ່ດີໃຫ້ມະຫາຊົນ.
