ທ່ານ ບຸນຍັງ ວໍລະຈິດ ປະທານປະເທດ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ເຮັດວຽກ ຢູ່ແຂວງວຽງຈັນ ໃນວັນທີ 20 ພະຈິກ 2019 ເພື່ອເປັນການຊຸກຍູ້ໃຫ້ການນໍາແຂວງວຽງຈັນ ນໍາພາພະນັກງານ ຕະຫຼອດຮອດປະຊາຊົນໃຫ້ມີຄວາມຕື່ນຕົວທາງດ້ານການເມືອງ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ໂດຍການຕ້ອນຮັບຂອງ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ, ມີບັນດາການນໍາແຂວງ-ເມືອງ ຕະຫຼອດຮອດພະນັກງານຫຼັກແຫຼ່ງເຂົ້າຮ່ວມ.
ໂອກາດນີ້, ທ່ານ ຄຳພັນ ສິດທິດຳພາ ໄດ້ລາຍງານບາງດ້ານ ເຊັ່ນ: ຈັດຕັ້ງປະຕິບັດວຽກງານໃນໄລຍະ 9 ເດືອນຜ່ານມາ ໃນແຜນການປີ 2019 ແຂວງວຽງຈັນ, ມີຄວາມຕ້ອງການທຶນເພື່ອການພັດທະນາທັງໝົດ 2.648,27 ຕື້ກີບ ກວມເອົາ 34,22% ຂອງ GDP ໃນ 9 ເດືອນປະຕິບັດໄດ້ 2.616,26 ຕື້ກີບ, ເທົ່າກັບ 98,79% ຂອງແຜນການ, ກວມເອົາ 33,80 % ຂອງ GDP. ໃນນີ້, ແຜນການລົງທຶນຂອງລັດຕາມແຜນປົກກະຕິມູນຄ່າ 65,63 ຕື້ກີບ, ປະຕິບັດໄດ້ 62,20 ຕື້ກີບ, ເທົ່າກັບ 94,78% ຂອງແຜນການ. ພ້ອມນີ້ ຍັງໄດ້ລາຍງານວຽກງານການກະກຽມໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນ ຂອງ ແຂວງວຽງຈັນ ເຊິ່ງຄາດວ່າກອງປະຊຸມໃຫຍ່ອົງຄະນະພັກເມືອງ, ຮາກຖານພັກ ແລະ ໜ່ວຍພັກໃຫ້ສຳເລັດໃນທ້າຍເດືອນມີນາ ປີ 2020.
ທ່ານ ບຸນຍັງ ວໍລະຈິດ ໄດ້ຊີ້ນໍາໃຫ້ການນໍາແຂວງ-ເມືອງ ເອົາໃຈໃສ່ສຶກສາອົບຮົມການເມືອງ ແນວຄິດໃຫ້ບັນດາຖັນແຖວສະມາຊິກພັກ, ພະນັກງານ ຕະຫຼອດຮອດປະຊາຊົນ ໃຫ້ມີຄວາມຕື່ນຕົວທາງດ້ານການເມືອງ; ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືການແກ້ໄຂບັນຫາລຶບລ້າງຄວາມທຸກຍາກ ເປັນຕົ້ນແມ່ນ ໃຫ້ສືບຕໍ່ຊີ້ນຳການປູກ-ການລ້ຽງປະເພດຕ່າງໆ ແລະ ທາງດ້ານການບໍລິການເຮັດໃຫ້ປະຊາຊົນມີລາຍຮັບສູງຂຶ້ນ, ປຸກລະດົມການປະຢັດມັດທະຍັດຕ້ານການໃຊ້ຈ່າຍຟຸມເຟືອຍ, ຫັນປ່ຽນດ້ານແນວຄິດຫຍໍ້ທໍ້ທີ່ເປັນສິ່ງອັດຕັນ ແລະ ກົດໜ່ວງທ່ວງດຶງ.
ນອກນີ້, ໄດ້ຫັນເອົາພະນັງານລົງກໍ່ສ້າງຮາກຖານການເມືອງ ໃຫ້ມີຄວາມແທດເໝາະ ເພື່ອປັບປຸງລະບົບຮາກຖານການເມືອງຂັ້ນຮາກຖານໃຫ້ມີຄວາມຫນັກແໜ້ນເຂັ້ມແຂງ ແລະ ເອົາໃຈໃສ່ການພັດທະນາຊັບພະຍາກອນມະນຸດ ໂດຍສະເພາະແມ່ນການກໍ່ສ້າງ ແລະ ບຳ ລຸງພະນັກງານໃນແຕ່ລະຂັ້ນ, ເພື່ອສ້າງໃຫ້ໄດ້ພະນັກງານນຳພາຄຸ້ມຄອງ ແລະ ພະນັກງານສືບທອດປ່ຽນແທນສືບຕໍ່ນຳພາຈັດຕັ້ງປະຕິບັດວຽກງານໃນຕໍ່ໜ້າ ກໍຄືການສືບຕໍ່ນຳພາສ້າງສາ ແລະ ພັດທະນາປະເທດຊາດ.