ໃນວັນທີ 28 ມັງກອນ 2018, ເຈົ້າໜ້າທີ່ພະແນກຕໍາຫຼວດກັດກັ້ນ ແລະ ຕ້ານຢາເສບຕິດ ປກສ ແຂວງຫົວພັນ ສົມທົບກັບກໍາລັງວິຊາສະເພາະ ປກສ ເມືອງ ເຂົ້າກວດຄົ້ນເຮືອນຂອງ ທ້າວ ຈົງເຕັ່ງ ອາຍຸ 53 ປີ ບ້ານວຽງຮັງ ເມືອງສົບເບົາ ແຂວງຫົວພັນ ເຊິ່ງເປັນເປົ້າໝາຍຄ້າຂາຍຢາເສບຕິດ ພົບເຫັນເຮໂຣອິນ 10 ເແທ່ງ ພ້ອມອາວຸດປືນ ແລະ ລູກກະສຸນຫຼາຍຊະນິດ.
ເຈົ້າໜ້າທີ່ ປກສ ແຂວງຫົວພັນ ໃຫ້ຮູ້ວ່າ: ພາຍຫຼັງສືບຮູ້ວ່າ ທ້າວ ຈົງເຕັ່ງ ໄດ້ລັກລອບເອົາເຮໂຣອິນມາຊຸກເຊື່ອງໄວ້ຢູ່ເຮືອນຂອງຜູ້ກ່ຽວ ຈຶ່ງໄດ້ຈັດຕັ້ງກຳລັງລົງເກັບກຳຂໍ້ມູນເພື່ອພິສູດແຫຼ່ງຂ່າວ ແລະ ເຫັນວ່າມີມູນຄວາມຈິງ. ຮອດວັນທີ 28 ມັງກອນ 2018 ຈຶ່ງໄດ້ປະສານສົມທົບກັບກອງບັນຊາການ ປກສ ເມືອງສົບເບົາ ແລະ ພາກສ່ວນທີ່ກ່ຽວຂ້ອງ ພ້ອມດ້ວຍອຳນາດການປົກຄອງບ້ານ ດັ່ງກ່າວ ນຳກຳລັງເຈົ້າໜ້າທີ່ເຂົ້າປິດລ້ອມເຮືອນຂອງເປົ້າໝາຍ ເພື່ອກວດຄົ້ນ. ຜ່ານການກວດຄົ້ນ, ພົບເຮໂຣອິນ ຈຳນວນ 10 ແທ່ງ ໜັກ 3,8 ກຼາມ ພ້ອມດ້ວຍອາວຸດປືນ 59 ຈໍານວນ 1 ກະບອກ, ປືນວີແຢັດ 1 ກະບອກ, ປືນຍິງລູກອັດ 1 ກະບອກ ແລະ ປືນແວ່ງ 1 ກະບອກ ພ້ອມລູກກະສູນປືນອາກາ 10 ລູກ, ລູກ 59 10 ລູກ, ລູກຊອງ 4 ລູກ ແລະ ລູກປືນວີແຢັດ 14 ລູກ. ດັ່ງນັ້ນ, ຈຶ່ງໄດ້ຈັບຕົວທ້າວ ຈົງເຕັ່ງ ມາດຳເນີນການສືບສວນ-ສອບສວນຂະຫຍາຍຜົນ.
ທ້າວ ຈົງເຕັ່ງ ສາລະພາບໃນເບື້ອງຕົ້ນວ່າ: ເຮໂຣອິນ ແລະ ອາວຸດປືນຈໍານວນດັ່ງກ່າວ ເປັນຂອງຜູ້ກ່ຽວແທ້. ປັດຈຸບັນ, ເຈົ້າໜ້າທີ່ກໍາລັງດໍາເນີນການສືບສວນ-ສອບສວນ ເພື່ອຂະຫຍາຍຜົນເພີ່ມຕື່ມ ຫາພັກພວກກຸ່ມແກ້ງດຽວກັນ.
